Adleyd shehiridiki ta'am féstiwalida Uyghur ta'am medeniyiti diqqet qozghidi

Washin'gtondin muxbirimiz méhriban teyyarlidi
2023.12.19
adileyd-taam-02-1024 Awstraliyening adleyd shehiride ötküzülgen “Asiya ta'am medeniyiti féstiwali” gha qatnashturulghan Uyghur chédirining körünüshi. 2023-Yili 14-dékabir, adleyd
Awstraliye tengritagh Uyghur ayalliri jem'iyitining re'isi ramile xanim teminligen

Igilishimizche “Awstraliye tengritagh Uyghur ayallar jem'iyiti” bu yil 14-dékabirdin 17-dékabirghiche adleyd shehiride ötküzülgen “Asiya ta'am medeniyiti féstiwali” gha qatniship, mezzilik Uyghur ta'amliri bilen birlikte Uyghurlarning kimliki, Uyghur medeniyiti we Uyghurlarning nöwettiki weziyitini anglatqan.

“Sherqiy türkistanning ay-yultuzluq kök bayriqi” ésilip, Uyghurche medeniyet alahidiliki bilen bézelgen hemde Uyghurche ta'amlar sétilghan Uyghur chédiri töt kün ichide 3000 din artuq ziyaretchini kütüwalghan. Shuningdek ziyaretchilerni eng jelp qilghan chédirlarning birige aylan'ghan.

Awstraliyening adleyd shehiride ötküzülgen “Asiya ta'am medeniyiti féstiwali” gha qatnashturulghan Uyghur chédirining körünüshi. 2023-Yili 14-dékabir, adleyd
Awstraliyening adleyd shehiride ötküzülgen “Asiya ta'am medeniyiti féstiwali” gha qatnashturulghan Uyghur chédirining körünüshi. 2023-Yili 14-dékabir, adleyd
Awstraliye tengritagh Uyghur ayalliri jem'iyitining re'isi ramile xanim teminligen

“ Awstraliye tengritagh Uyghur ayallar jem'iyiti” ning re'isi ramile xanim buning bulturdin buyan 2- qétim adleyd shehiride ötküzülgen “Asiya ta'am medeniyiti féstiwali” gha qatnishishi ikenlikini bildürdi. U bu toghrisida toxtilip, bu  féstiwalda asiyaning oxshimighan rayonliridin kelgen xelqlerning yémeklik we medeniyet alahidilikliri namayan qilin'ghanliqini eskertti.

Uning bayan qilishiche, “Uyghur chédiri”diki Uyghurche tatliq-turum, kawap we polu qatarliq mezzilik Uyghur ta'amlirini ziyaretchiler bes-beste sétiwalghan bolsa, qiz- yigitlerning Uyghurche milliy kiyimliri we ular orunlighan Uyghurche sen'et nomurliri qizghin alqishqa érishken. Uyghurlarning milliy kimliki, medeniyiti we nöwettiki weziyiti  heqqidiki mesililer ziyaretchiler eng köp sorighan so'allardin bolup qalghan.

“ Awstraliye tengritagh Uyghur ayallar jem'iyiti” ning mes'ulliridin yultuz téyipjan xanimning bildürüshiche, “Uyghur chédiri” ning féstiwaldiki  “Qiziq nuqta” gha aylinishi uyushma ezalirining ortaq tirishchanliqining, jümlidin töt künlük pa'aliyet mezgilide her küni dégüdek 20 dek Uyghurning etigen sa'et 11 din kech sa'et 11 ge qeder jan pidaliq bilen japaliq mulazimet qilishining netijisi iken.

Awstraliyening adleyd shehiride ötküzülgen “Asiya ta'am medeniyiti féstiwali” gha qatnashturulghan Uyghur chédirining körünüshi. 2023-Yili 14-dékabir, adleyd
Awstraliyening adleyd shehiride ötküzülgen “Asiya ta'am medeniyiti féstiwali” gha qatnashturulghan Uyghur chédirining körünüshi. 2023-Yili 14-dékabir, adleyd
Awstraliye tengritagh Uyghur ayalliri jem'iyitining re'isi ramile xanim teminligen

 Yultuz téyipjan xanim bu qétimqi “Asiya ta'am medeniyiti féstiwali” ni netijilik boldi, dep qaraydu. Uning bildürüshiche, töt künlük pa'aliyettin awstraliyede téximu köp kishilerning Uyghurlargha bolghan tonushini qolgha keltürüshte  bu xildiki medeniyet pa'aliyetlirining qanchilik muhim rol oynaydighanliqini körüwélish mumkin iken. U sözide muhajirettiki Uyghurlarning her xil wasitilerdin paydilinip, chet'ellerde Uyghurlar we Uyghur weziyitige bolghan tonush we qollash  imkaniyiti yaritish  kéreklikini tekitlidi.

Yuqiriqi awaz ulinishidin tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.