Gérmaniyediki parlamént ezasi martin patzélt Uyghurlarning "A'ilem nede" namayishini qollidi

Muxbirimiz méhriban
2021-03-16
Share
Gérmaniyediki parlamént ezasi martin patzélt Uyghurlarning Gérmaniyediki "Ilham toxti instituti" bashliqi enwerjan ependi "A'ilem nede" témisidiki namayishchilargha medet bérish üchün kelgen gérmaniyediki hakimiyet béshidiki xristi'an démokratlar ittipaqining fédéral parlaménttiki wekili martin patzélt ependige doppa sogha qildi. 2021-Yili 15-mart, myunxén.
Enwerjan teminligen

Gérmaniyediki Uyghur teshkilatliridin "Yawropa sherqiy sherqiy türkistan birliki" ning orunlashturushi, "Ilham toxti inistittoti" ning qollishi bilen bir aydin buyan myunxén shehiridiki xitay konsulxanisi aldida dawamlishiwatqan "A'ilem nede" namayishi 15-mart küni ayaqlashqan.

Radiyomiz ziyaritini qobul qilghan gérmaniyediki "Ilham toxti inistitoti" bashliqi enwerjan ependining bildürüshiche, 15-mart küni gérmaniyediki hakimiyet béshidiki xiristiyan démokratlar ittipaqining fédéral parlaménttiki wekili martin patzélt ependi namayish meydanigha kélip, Uyghurlargha medet bergen.

15-Mart künidiki namayish heqqidiki sin körünüshidin melum bolushiche, martin ependi shu küni xitayning myunxéndiki konsulxanisi aldida Uyghur doppisini kiyip, qolida bir deste gülni tutup, sherqiy türkistanning ay-yultuzluq kök bayriqi lepildep turghan meydanda namayishqa qatnashqan.

Martin ependi "Yawrupa sherqiy sherqiy türkistan birliki" ning re'isi esqer janning teklipi boyiche 15-mart küni 600 kélométir yolni bésip, myunxéndiki namayish meydanigha yétip kelgen iken.

Enwer jan ependi martin ependining namayish jeryanida "Uyghurlarning heqqaniy herkitini qollaymen" dégen sözini neqil élip ötti.

Enwer jan ependining bildürüshiche, martin ependi xitay konsulxanisigha qarap turup: "Hökümitingiz bir xelqni qirghin qiliwatidu, insanliqqa qarshi herket qiliwatidu" dep waqirap sho'ar towlighan. Martin ependi yene gérmaniye hökümitining Uyghurlar mesiliside peqetla xitay hökümitini tenqit qilish bilenla chekliniwatqanliqini tenqitligen. U gérmaniye hökümitining xitaygha bésim ishlitip, Uyghurlar qamalghan jaza lagérlirini taqash üchün emeliy herket qilishni telep qilghan.

Melum bolushiche, martin patzélt ependi 2017-yilidin buyan gérmaniye xiristiyan démokratlar ittipaqining 18-we 19-nöwetlik fédéral parlaménttiki ezasi iken. U gérmaniyediki siyasiyonlar ichide Uyghur weziyitige üzlüksiz köngül bölüp kéliwatqan we Uyghur teshkilatlirining pa'aliyetlirini yéqindin qollap kéliwatqan siyasiy erbaplarning biri iken.

Enwer jan ependining bildürüshiche, martin ependi yene xitay türmisidiki Uyghur ziyaliysi ilham toxti mesilisigimu yéqindin köngül bölüp kelgen siyasiyonlarning biri iken.

Enwer jan ependining tekitlishiche, martin ependige oxshash siyasiy erbaplarning Uyghurlar weziyitige köngül bölüshi we Uyghurlarning pa'aliyetlirige ishtirak qilip qollishi, chet ellerdiki Uyghur dewasi üchün aktip rol oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet