Pompéyo amérika-teywen munasiwitidiki cheklimilerni bikar qildi

Amérika tashqi ishlar ministiri mayk pompéyo shenbe küni amérika we teywen emeldarliri otturisidiki diplomatik alaqilerge qoyulghan cheklimilerni bikar qiliwatqanliqini jakarlidi.

Bezi axbarat wasitiliride bu heriketning amérika-teywen munasiwetlirini tüptin özgertip, xitayni ghezeplendüridighanliqi we béyjing bilen washin'gton otturisidiki ziddiyetni kücheytiwétidighanliqi ilgiri sürüldi.

Pompéyo bayanatida mundaq dédi: “Tashqi ishlar ministirliqi nechche on yildin buyan amérika diplomatliri, herbiy xadimlar we bashqa emeldarlarning teywenlik kesipdashliri bilen bolghan alaqisige murekkep ichki cheklimilerni qoyup kelgen. Amérika hökümiti béyjingdiki kommunistik hakimiyetni razi qilish üchünla bu qararlarni bir tereplime halda yolgha qoyghan. Emdi u künler kelmeske ketti.”

U yene mundaq dédi: “Bügün men, özimizge özimiz qoyghan bu cheklimilerning hemmisini bikar qilghanliqimni jakarlaymen.”

Melum bolushiche, bu cheklimiler teywen emeldarlirini amérika tashqi ishlar ministirliqida qobul qilmasliq, ular bilen sözlishish toghra kelse méhmanxana qatarliq biresmiy sorunlarda uchrishish qatarliqlarni öz ichige alidiken.

Amérika tashqi ishlar ministirining mezkur qarari teywen da'irilirining alqishigha érishti.

Teywenning washin'gtondiki wekili shyaw méychin xanim bu heqte yollighan twittér uchurida: “Nechche on yilliq kemsitish bikar qilindi. Bu öz'ara munasiwitimizdiki ghayet zor bir kün. Men buningdiki her bir pursetni qedirleymen,” dédi.

Amérika tashqi ishlar ministiri mayk pompéyo xitaygha qarita qattiq pozitsiye tutqan we uni amérika duch kelgen asasliq uzun muddetlik tehdit dep békitken idi.

Xitayning amérikining mezkur qararigha qandaq inkas qayturghanliqi hazirche melum emes.