Amérika-yaponiye rehberlirining tunji uchrishishida Uyghur mesilisi tilgha élindi

Muxbirimiz memetjan jüme
2021-04-18
Share
Amérika-yaponiye rehberlirining tunji uchrishishida Uyghur mesilisi tilgha élindi Prézidént jow baydén yaponiye bash weziri yoshixidé sugani aq sarayda kütüwaldi. 2021-Yili 16-aprél.
Social Media

Amérika prézidénti jow baydén jüme küni yaponiye bash weziri bilen aq sarayda ötküzgen söhbiti jeryanida Uyghur mesilisinimu sözleshken.

Prézidént jow baydén yaponiye bash weziri yoshixidé sugani aq sarayda kütüwalghan we xitaygha qarshi ittipaqini kücheytish istratégiyesi üstide muzakire élip barghan idi.

Aq sarayning tor bétidiki birleshme bayanatqa qarighanda, söhbet jeryanida xitay peyda qiliwatqan xewpsizlik mesilisi, xitayning teywen'ge yéqin jaylarda barghanche éship bériwatqan herbiy heriketliri, xongkong we Uyghurlargha qaratqan kishilik hoquq buzghunchiliqi asasliq témilarning biri süpitide otturigha qoyulghan.

Birleshme bayanatta mundaq déyildi: "Biz xongkong we shinjang Uyghur aptonom rayonidiki kishilik hoquq weziyitidin jiddiy endishilinidighanliqimizni ortaqlashtuq."

Amérika prézidénti jow baydén söhbettin kéyin muxbirlargha bergen birleshme bayanatida xitaygha taqabil turush mesilisi üstide toxtilip mundaq dédi: "Biz xitaydin kélidighan riqabetlerge birlikte taqabil turushqa hemde erkin we ochuq hindi okyanning kelgüsige kapaletlik qilish üchün sherqiy déngiz, jenubiy déngiz, shundaqla shimaliy koréye qatarliq mesililerde hemkarlishishqa wedileshtuq."

Yaponiye bash weziri yoshixidé suga baydén bilen ötküzülgen söhbetning tepsilatini ashkarilashni xalimaydighanliqini bildürgen bolsimu, teywen boghuzinng muqimliqi we tinchliqini saqlash mesiliside amérika we yaponiyening ortaq tonushqa ige ikenlikni éytti.

Bu, jow baydénning wezipige olturghandin buyanqi tunji chet'el rehbirini aq sarayda kütüwélishi bolup hésablinidu.

Yaponiye bash weziri suga amérika sepirini bashlashtin ilgiri amérikadiki nopuzluq istratégiyelik tetqiqat organlardin rand tetqiqat jem'iyitining xitay ishliri mutexessisi skot harold bir obzor élan qilip, yaponiyeni xitay Uyghurlar ustidin yürgüzüwatqan irqiy qirghinchiliqni étirap qilishqa chaqirighan idi.

Amérika-yaponiye rehberlirining aq saraydiki uchrishishi we uchrishishtin kéyin élan qilin'ghan birleshme bayanatlarning xitayni intayin bi'aram qilghanliqi melum.

Xitayning amérikada turushluq bash elchiliki bu heqte élan ilghan bayanatida bu birleshme bayanatqa küchlük étiraz bildüridighanliqini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet