Amérika Uyghur birleshmisi alma mehsulatlirini mexsus sétish dukinining aldida namayish ötküzdi

Muxbirimiz jüme
2021-01-17
Share
Amérika Uyghur birleshmisi alma mehsulatlirini mexsus sétish dukinining aldida namayish ötküzdi Amérika Uyghur birleshmisi 17-yanwar wirginiye shtatining prins wilyam nahiyesidiki alma mehsulatlirini mexsus sétish dukinining aldida namayish ötküzdi.
Photo: RFA

Amérika Uyghur birleshmisi 17-yanwar wirginiye shtatining prins wilyam nahiyesidiki alma mehsulatlirini mexsus sétish dukinining aldida namayish ötküzüp, mezkur shirketni xitayning Uyghurlargha qaratqan mejburiy emgek jinayitige shérik bolup qalmasliqqa chaqiridi.

Amérika Uyghur birleshmisi Uyghurlargha qaritilghan mejburiy emgekni axirlashturush bash témisidiki namayish qilish herikitini ötken yili dékabirda bashlighan idi.

Bu nöwetlik namayish shu xildiki namayishlarning bir qismi bolup, namayish burunqidekla tinch yosunda dawam qildi.

Namayishchilar qollirida "Jaza lagérliri taqalsun", "Kishilik hoquqni qoghdash ehdenglerge asiyliq qildinglar" dégen sho'arlar chüshürülgen pilakatlarni kötürüshken idi.

"Uyghur mejburiy emgikini cheklesh qanuni" bu yil séntebirde amérika dölet mejlisi awam palatasida mutleq yuqiri awaz bilen maqullan'ghan we kéngesh palatasigha sunulghan idi.

Halbuki, qanun awam palatasida maqullinip uzun ötmey "Alma", "Nayki" we "Koka-kola" qatarliq shirketler mezkur qanunni ajizlashturush üchün heriketke ötken.

Eyni chaghda ziyaritimizni qobul qilghan amérika Uyghur birleshmisining programma diréktori maks gélbér yuqirida tilgha élin'ghan shirketler "Uyghur mejburiy emgikini cheklesh qanuni" gha qarshi bashlighan heriketlerning aldini élip, mezkur qanunning ongushluq maqullinishigha kapaletlik qilish meqsitide heriket bashlighanliqini bildürgenidi.

Amérika Uyghur birleshmisining hey'et ezasi elfidar iltebirning bildürüshiche, ular bu xildiki namayishlarni her hepte bir qétim oxshimighan orunlardiki "Alma" yaki "Nayki" mehsulatlirini mexsus sétish dukanlirining aldida izchil dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet