Amérikaning yardemchi tashqi ishlar ministiri Uyghur qatarliq hörlükke teshna xelqlerni qollaydighanliqini bildürdi

Muxbirimiz jüme
2020-05-24
Élxet
Pikir
Share
Print
Amérikaning yardemchi tashqi ishlar ministiri robért destro ependi.
Amérikaning yardemchi tashqi ishlar ministiri robért destro ependi.
Social Media

Amérikaning yardemchi tashqi ishlar ministiri robért destro Uyghur qatarliq hörlükke teshna xelqlerni qollaydighanliqini bildürdi.

Uning, 22-may élan qilghan twittér bayanati xitay hökümiti xongkonggha alaqidar xewpsizlik qanuni chiqirishqa tutun'ghan, korona wirusi seweblik Uyghur mesilisige qaritilghan diqqet nuqtisi burulup ketken mezgilge toghra keldi. 

Destro bayanatida mundaq dédi: "Xitay kommunist partiyesining öz xelqining iradisige qulaq sélishni ret qilishi, bu mustebit, bir partiyelik döletning qurulghandin buyanqi xaraktérini süretlep béridu. Biz 1989-yildiki tyen'enméndin xongkong, bügünki shinjang we tibetkiche hörlükke teshna hemmeylenni qollaymiz."

Xitay hökümiti bu nöwetlik "Ikki qurultay" mezgilide xongkongning alahide aptonomiyelik ornigha munasiwetlik bir dölet xewpsizlik qanuni maqullaydighanliqini bildürgen.

Qanunda xongkong 1997-yili xitaygha qayturup bérilgendin buyan xongkong xelqi behrimen bolup kelgen pikir, yighilish we axbarat erkinlikining qattiq cheklimige uchraydighanliqi mölcherlen'gen. 

B b s ning neqil qilishiche, xongkongning parlamént ezasi dennis kwok: "Bu, 'bir dölette ikki xil tüzüm bolush' prinsipigha xatime bérilgenliktin dérek béridu" dégen.

Mezkur qanunning xitay xelq qurultiyida awazgha qoyulidighanliqi we maqulluqtin ötidighanliqi mölcherlen'gen.

Bu qanunning tonushturulushi amérika hökümitining naraziliqini qozghighan. 

Peyshenbe küni amérika tashqi ishlar ministirliqi bayanatchisi morgan ortagus xanim "Xongkong xelqning iradisi eks ettürülmigen herqandaq shekildiki dölet xewpsizlik qanunining dunyawi lenetke uchraydighanliqi" ni bildürgen. 

Közetküchilerning qarishiche, yardemchi tashqi ishlar ministiri robért destroning twittér bayanati bu heqte xitaygha bérilgen eng küchlük signallarning biri iken. 

Destro ependimning mezkur bayanati yekshenbe künigiche 3 ming qétimgha yéqin hembehirlen'gen, 4 ming qétimgha yéqin yaxshi körüshke érishken. Bu bayanatqa yézilghan inkaslar 200 qétimgha yéqinlashqan.

Inkaslarning köpinchiside robért destro ependimge teshekkürler éytilghan we xitaygha émbargo qoyush chaqiriqlirimu yer alghan. Bezi inkaslarda "Shinjangning bügüni, xongkongning etisi" dégen agahlandurushlarmu yézilghan.

Xitay hökümiti ötken 3 yildin buyan Uyghur élige qaritilghan basturush we zulum siyasetlirini misli körülmigen derijide kücheytken. Bu jeryanda Uyghur rayonining mukemmel saqchi dölitige aylandurulghanliqi, 1. 8 Milyondin 3 milyon'ghiche Uyghur qatarliq türkiy milletlerning lagérlargha tashlan'ghanliqi mölcherlen'gen idi.

Toluq bet