Amérika kéngesh palatasi xitaygha taqabil turush üchün yene bir qanun tonushturdi
2021.04.11
Amérika kéngesh palatasi tashqi munasiwetler komitéti xitaygha taqabil turush üchün tonushturghan yéngi layiheside Uyghur mesilisige alahide orun bérilgen.
2021-Yildiki “Istratégiyelik riqabet qanuni” dep atalghan bu qanun layiheside kishilik hoquqni ilgiri sürüsh, bixeterlik yardimi bilen teminlesh we tetür teshwiqatqa qarshi küresh qilish arqiliq amérikaning xitayning dunyawi tesirni kéngeytish urunushigha taqabil turush iqtidarini yuqiri kötürüsh tedbirliri otturigha qoyulghan.
Bu qanun layihesi 280 betlik bolup, buningda “Amérikining hindi-tinch okyandiki siyasiy meqsitige yétish üchün zörür bolghan herbiy meblegh sélishni aldinqi orun'gha qoyush”, xitay bilen bolghan iqtisadiy riqabet mesilisini hel qilish, Uyghurlargha qaratqan zulumliri seweblik xitayni jazalash we xongkongdiki démokratiyeni qollash qatarliq mezmunlar orun alghan.
Qanun layihesining bir nechche yéride Uyghurlar mesilisi tilgha élin'ghan bolup, ularning ikkiside: “Shinjang Uyghur aptonom rayonidiki mejburiy emgekke munasiwetlik jaza yürgüzüsh, sistémiliq basqunchiliq, mejburlash xaraktérlik bala chüshürüsh, mejburiy tughmas qilish, yaki mejburiy hamilidarliqtin saqlinish opératsiyesi qilishqa qarita jaza yürgüzüsh,” qatarliqlar körsitilgen.
Layihede yene, xitayning tetür teshwiqatigha taqabil turush üchün erkin asiya radiyosining Uyghur, tibet, xitay we gu'angdung bölümlirining meblighini ashurush teklipi bérilgen.
Qanun layihesini amérika kéngesh palata ezasi, kéngesh palatasi tashqi munasiwetler komitétining re'isi bob ménéndéz, we jumhuriyetchiler partiyesining ezasi jim rich qatarliqlar birlikte tonushturghan.
Melum bolushiche, qanun layihesi 21-aprél kéngesh palatasida awazgha qoyulidiken.