Qirghizistanda Uyghur yash-ösmürlirining ana tilim-dana tilim” namliq musabiqe pa'aliyiti ötküzüldi

Musa'éw xamzat abduxaliq Uyghurning “Oyghan” namliq shé'irini oquwatidu. 2024-Yili 2-mart, bishkek

2-Mart küni bishkek shehiri, alamédin 1-mehellisining “Medeniyet öyi” de qirghizistan Uyghurliri “Ittipaq” jem'iyitining uyushturushi bilen yash-ösmürlerning “Ana tilim-dana tilim” namidiki Uyghur ana til musabiqisi bolup ötti.

Bu musabiqe pa'aliyitige qirghizistan Uyghurliri “Ittipaq” jem'iyitining mu'awin re'isi tursuntay nazarow bashchiliqidiki jem'iyetning hey'et ezaliri, mehelle yigitbashliri, ayallar kéngeshlirining re'isliri, Uyghur ana tilida ders bériwatqan mu'ellimler, Uyghur oqughuchilar we ularning ata-aniliri qatnashti.

Mezkur musabiqe pa'aliyiti “Dunya ana til küni” munasiwiti bilen ötküzülgen bolup, pa'aliyet qirghizistanning milliy marshi bilen bashlandi. Pa'aliyet jeryanida Uyghur ana tilida oquwatqan oqughuchilar Uyghur xelqining ilim-meripetke bolghan söygüliri izhar qilin'ghan we ana til küylen'gen shé'irlarni déklamatsiye qildi.

Mezkur pa'aliyetke qatnashqan tes mehellisidiki ayallar kéngishining re'isi hajerbowi xanim radi'omiz ziyaritini qobul qilip, bu pa'aliyetni teshkilligüchilerge we ana til oqutushigha ejrini singdürüwatqan mu'ellimlerge öz minnetdarliqini bildürdi. U yene mushundaq pa'aliyetlerni dawamlashturushqa özining her waqit teyyar ikenlikini izhar qildi.

2023-Yili öktebir éyida qirghizistan Uyghurliri “Ittipaq” jem'iyitining uyushturushi bilen bishkektiki Uyghurlar topliship olturaqlashqan alamédin mehellisi bilen komsomol we bélowodsk yézilirida Uyghur ana tili oqutush kursliri échilghan idi. Bu kurslar jem'iy 8 nöwet teshkillen'gen bolup, 200 din oshuq oqughuchi Uyghur tilini öginishke bashlighan idi. 2023-Yilining axiridiki üch ay jeryanida, oqughuchilar kiril élibbesi asasidiki Uyghur yéziqini ögen'gen 2024-yili yanwardin bashlap ereb élibbesi asasidiki Uyghur kona yéziqini öginishke bashlighan.

RFA/Feruze

21-Féwral “Dunya ana tili küni” yétip kelgende, bu kurslarning mu'ellimliri her guruppidin 5-6 neperdin yaxshi oqughan oqughuchilarni tallap, jem'iy 40 neper oqughuchini Uyghur ana tilida shé'ir oqush musabiqisige qatnashturghan. Oqughuchilar jarangliq awazda Uyghur sha'irlirining ana til heqqide yalqunluq shé'irlirini shé'irlirini kolléktip déklamatsiye qilghan.

Mezkur musabiqini bahalash hey'itige yawro-asiya Uyghur akadémiyesining mu'awin prézidénti, pelsepe penlirining namzati ekberjan ba'udunow riyasetchilik qildi. Bahalash heyitining ezaliri “Ittipaq” gézitining bash muherriri zumret roziyéwa, “Ittipaq” jem'iyitining mu'awin re'isi eziz xudaybérdénow, yazghuchi abdusalam ghapparlardin teshkil tapti.

RFA/Feruze

Bu qétimqi ana til pa'aliyiti heqiqiy musabiqe qa'idisi boyiche ötküzüldi. Bahalash hey'itining adil we biterep shekilde bahalishi netijiside, irade xudaybérgénowa we abduraxman nasirowlar üchinchi derijilik, patime baqiyéwa bilen menzure ayupowalar ikkinchi derijilik, xamzat musayéw we ayluna qadiraliyéwalar birinchi derijilik mukapatqa érishti.

Mezkur musabiqige bir top oqughuchilarni bashlap kelgen bélowodsk yézisidiki Uyghur mu'ellimi aygül niyazowa xanim radiyomiz ziyaritini qobul qilip, özining ikki oqughuchisining diplom we mukapatlarni alghanliqidin bekmu xursen bolghanliqini bildürdi.

RFA/Feruze

Pa'aliyet axirida qirghizistan Uyghurliri “Ittipaq” jem'iyitining mu'awin re'isi tursuntay nazarow söz qilip, musabiqide utup chiqqan oqughuchilarni tebriklidi. U, Uyghur ana tili oqutushida xalis ejir singdürüwatqan mu'ellimlerge qirghizistan Uyghurliri “Ittipaq” jem'iyitining namidin minnetdarliq bildürdi.

Bu pa'aliyet, ana til musabiqiside birinchi derijilik mukapatqa érishken oqughuchi xamzat musayéwning sha'ir nurtay abdurehim yazghan “Oyghan Uyghur” namliq shé'irni jarangliq awazda déklamatsiyesi qilishi bilen axirlashti.