Ikkinchi qétimliq "Sherqi türkistan üchün anatoliye sepiri" pa'aliyiti siwas shehiride bashlandi

Ixtiyariy muxbirimiz azigh
2021-09-17
Share

17-Séntebir küni lagér tutqunlirining türkiyediki yéqinliri teripidin teshkillen'gen "Sherqi türkistan üchün anatoliye sepiri" pa'aliyitining ikkinchi qétimliq sepiri siwas shehiride bashlandi.

Uyghur pa'aliyetchiler bu qétimliq anatoliye sepiride Uyghurlarning nöwettiki weziyitini 14 wilayetke bérip, xelqqe neq meydandin anglitishni nishan qilghan bolup, mezkur nishan'gha yétish üchün bir ay waqit serp qilidiken.

Medine nazimi xanim ziyaritimizni qubul qilip, türk xelqining Uyghurlar uchrawatqan zulumni bilsimu, lékin uning qanchilik derijide ikenlikini bilmeydighanliqini, özlirige oxshash a'ile ezaliri biwaste xitayning ziyankeshlikige uchrighan kishilerning xelqqe biwasite ehwalni anglatqinida téximu ünümlük bolidighanliqini, lagér tutqunliri yéqinlirining xitayning qirghinchiliq jinayitini dunyagha anglitish üchün pütün küchi bilen tirishiwatqanliqini éytti.

"Sherqi türkistan üchün anatoliye sepiri" pa'aliyitining tunji békiti siwas shehri bolup, pa'aliyet anatoliye yashlar teshkilati, türk ojaqliri we milliy yashlar wexpi qatarliq puqrawi teshkilatlarning qizghin qollishigha érishken. Siwas sheher meydanida axbarat élan qilish yighini we imza toplash pa'aliyiti ötküzülgen bolup, pa'aliyet yerlik axbarat wastiliri we siwas xelqining qollap quwwetlishi bilen intayin qizghin dawamlashqan.

Ili meshripi Uyghur wexpining re'isi qudret ghulja ependim ziyaritimizni qubul qilip, siwastiki pa'aliyetler heqqide tepsiliy melumat berdi.

Lagér tutqunlirining türkiyediki yéqinliri xitayning ziyankeshlikige uchrighan a'ile ezalirini qutuldurush we xitayning qirghinchiliq siyasitini dunyagha anglitish üchün her xil pa'aliyetlerni teshkillep kéliwatqan bolup, ötken yili 18-dékabir bashlan'ghan "Millet nöwette" pa'aliyiti Uyghur mesilisini türkiyege we dunyagha tonutushta muhim rol oynighan idi.

Türkiyediki Uyghur kishilik hoquq pa'aliyetchisi jewlan shirmemet ependim ziyaritimizni qubul qilip, "Sherqi türkistan üchün anatoliye sepiri" pa'aliyitining meqsiti we nishani heqqide tepsiliy melumat berdi.

Xitay hökimiti 2016-yilidin buyan yighiwélish lagéri we xalighanche tutqun qilish siyasitini Uyghur élining herqaysi jaylirida keng qanat yaydurghan idi. Xitay da'irilirining qirghinchiliq siyasiti seweplik nurghunlighan a'ililer parchilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet