3-Қетимлиқ анатолийә сәпири қизғин давамлашмақта

Ихтиярий мухбиримиз азиғ
2021.11.10
3-Қетимлиқ анатолийә сәпири қизғин давамлашмақта 3-Қетимлиқ “шәрқи түркистан үчүн анатолийә сәпири” паалийити җәрянида хатирә сүрәт. 2021-Йили ноябир, түркийә.
RFA/Azigh

1-Ноябир күни “шәрқи түркистан үчүн анатолийә сәпири” паалийитиниң үчинчи қетимлиқ сәпири түркийәниң чорум шәһиридә башланғаниди. Мәзкур паалийәт лагер тутқунлириниң түркийәдики йеқинлири тәрипидин тәшкилләнгән болуп, паалийәтчиләр түркийәниң һәрқайси шәһәр вә вилайәтлиридә түркийәниң уйғур қирғинчилиқини тонуши үчүн җамаәт пикри шәкилләндүрүш мәқситидә бир қатар паалийәтләрни уюштуруп кәлмәктә.

Паалийәтчиләр 3-қетимлиқ “шәрқи түркистан үчүн анатолийә сәпири” паалийити җәрянида йозгат, малатя вә қәһриманмараш қатарлиқ шәһәрләрни айлинип нөвәттә адияман шәһиригә йетип кәлгән. Улар түрк очақлири тәшкилатиниң адияман шөбә башлиқи гөкһан турсун вә адияман валийси тәрипидин күтүвелинған.

Түркийәдики уйғур кишилик һоқуқ паалийәтчилиридин мәдинә назими ханим зияритимизни қобул қилип, 3-қетимлиқ анатолийә сәпири паалийити җәрянида елип барған хизмәтләр тоғрисида тохталди.

“шәрқи түркистан үчүн анатолийә сәпири” паалийитини тәшкиллигән лагер тутқунлири йеқинлири түркийәдики һәр қайси шәһәрләрдә шәһәрлик һөкүмәт башлиқлири вә валийлар тәрипидин қизғин күтивелинмақта. Лагер тутқунлири йеқинлириниң анатолийә сәпири паалийити җәрянида елип барған паалийәтлири йәрлик пуқрави тәшкилатлар, сиясий партийәләр вә йәрлик һөкүмәт хадимлири тәрипидин кәң қоллашқа еришмәктә.

Лагер тутқунлири йеқинлиридин уйғур кишилик һоқуқ паалийәтчиси җәвлан ширмәмәт зияритимизни қобул қилип, паалийәт елип барған шәһәр вә вилайәтләрдики йәрлик тәшкилатларниң қайси сиясий чүшәнчидә болушидин қәтийнәзәр өзлирини қоллап қуввәтләп келиватқанлиқини, паалийәтчиләрниң паалийәт җәрянида, һәрқайси шәһәрләрдики шәһәрлик һөкүмәттин уйғур йәр-җай намлиридин бирини, мәзкур шәһәрләрдики бир йәргә беришни тәләп қилип келиватқанлиқини, һәрқайси шәһәрлик һөкүмәтләрниң бу мәсилигә иҗабий позитсийә билдүрүватқанлиқини ейтти.

Лагер тутқунлири йеқинлириниң паалийәтлири түрк мәтбуатлирида кәң хәвәр қилинип келиниватқан болуп, лагер тутқунлири йеқинлири тәрипидин түркийәдики хитай дипломатик органлири алдида елип берилған “милләт нөвәттә” һәрикити вә “шәрқи түркистан үчүн анатолийә сәпири” паалийити қатарлиқлар йеқинқи йиллардин буян елип берилған түркийәдики тәсири әң күчлүк уйғур сиясий һәрикити дәп қаралмақта. Мәзкур паалийәт түркийәдики йәрлик пуқрави тәшкилатлар вә сиясий партийәләрдин башқа уйғур җамаити вә уйғур тәшкилатлири тәрипидинму күчлүк қоллашқа еришмәктә.

Мәзкур паалийәтниң тәшкиллигүчилиридин мирзәхмәт илясоғли әпәндим зияритимизни қобул қилип, үч қетимлиқ шәрқий түркистан үчүн анатолийә сәпири паалийити җәрянида мәзкур паалийәтниң тосалғусиз илгирилиши үчүн “или мәшрипи вәхписи” ниң маддий вә мәниви җәһәттин алаһидә ярдәмдә болғанлиқини, һәбибулла күсән, ели әкбәр дамоллам, махмут дамоллам қатарлиқ уйғур җамаәт әрбаблириниң маддий вә мәниви җәһәттин қоллап қуввәтлигәнликини, униңдин сирт дуня уйғур қурултийи вә уйғур һәрикити қатарлиқ тәшкилатларниңму қоллишиға еришип келиватқанлиқини ейтти.

Хитайниң уйғур елидики қирғинчилиқ сиясәтлири түпәйли аилә әзалиридин айрилип қалған муһаҗирәттики уйғурлар йиллардин буян хитай һөкүмитидин из-дерики болмайватқан яки йиғивелиш лагериға соланған аилә әзалири һәққидә учур беришни тәләп қилип кәлмәктә. Түркийәдики лагер тутқунлири йеқинлири һәр хил сиясий вә иҗтимаий паалийәтләрни тәшкилләш арқилиқ түрк һөкүмити вә хәлқигә нөвәттики уйғур вәзийитини тонуштуруп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.