Ghuljadiki aq meschitni saldurghan yaqup haji bilen selim haji késiwétilgen

Muxbirimiz shöhret hoshur
2019-04-15
Élxet
Pikir
Share
Print
Ijtima'iy taratqulardiki "Menmu Uyghur" programmilirigha chiqirilghan süret. Üstünki ret soldin ikkinchisi yaqup haji.
Ijtima'iy taratqulardiki "Menmu Uyghur" programmilirigha chiqirilghan süret. Üstünki ret soldin ikkinchisi yaqup haji.
Social Media

Ashkarilishiche, ghulja su derwazidiki ot otken meschitning ornigha yéngi meschit sélishni ghuljidiki elsöyer sodigerlerdin yaqup haji bilen selim haji taliship qalghan. Jama'etning kélishtürüshi bilen ikkisi ortaq desmaye chiqirip, 4 milyon yüenche meblegh bilen "Aq meschit" namida yéngidin bir meschit salghan. Ularning bu aktipliqi 2017‏-yiligha kelgende "Diniy esebiylikning alamiti" dep qarilip, ular yighiwélish lagérigha soliwélin'ghan. Ötken yili yighiliwélish lagéridiki bir türküm tutqunlar üstidin sotsiz höküm chiqishqa bashlighanda bu ikki saxawetchining her ikkisi késiwétilgen.

Uyghur rayonidin yéqinda chetke chiqqan we ghulja weziyiti heqqide radiyomizgha yazma melumat yollighan bir tijaretchining bayan qilishiche, ghulja su derwazidiki eslidiki ot ketken meschitning ornigha 2006‏-yili aq meschitni bina qilghan elsöyer sodigerlerdin yaqup haji 15 yilliq késiwétilgen. Déyilishiche, selim hajimu késilgen, emma uning jaza mudditi melum emes. Ghuljadiki alaqidar saqchi xadimliri yaqup haji we selim hajilarning jaza hökümliri heqqide melumat bermidi.

Weziyettin xewerdar kishining radiyomizgha yetküzüshiche, bu yil 45 yashlar chamisidiki yaqup haji 2017-yili 5-ayda bir qétim tutulup qoyuwétilgen. 2018‏-Yili 3‏-ayda ikkinchi qétim tutup kétilgen. Her ikki qétimliq tutulushida uning 2006‏-yili aq meschitni sélishqa i'ane bérishtiki teshebbuskarliqi seweb bolghan, yeni bu teshebbuskarliq diniy jehette "Esebiylishishning alamiti" dep qarilip, uning qachan we qeyerlerde qaysi diniy zatlardin telim alghanliqi izchil soraq qilin'ghan.

Weziyettin xewerdar kishi yaqup hajining ghulja sheher qazanchi mehellisidin ikenliki we ghulja sheherlik dölet amanliq saqchiliri teripidin tutulghanliqini melum qilghan idi. Téléfonimizni qobul qilghan alaqidar saqchi xadimi yaqup hajining qaysi türmide ikenlikini dep bermidi, emma uning sherqiy shinxu'a yoli (shinxu'a donglu) tewelikidiki saqchi xadimliri teripidin tutqun qilin'ghanliqini ashkarilidi. Yene bir saqchi xadimimu yaqup hajini tutqun qilghan saqchixana heqqide yuqiriqi jawabni tekrarlidi. Weziyettin xewerdar kishi ghuljadiki "Elqesir" réstoranining sahibi selim hajiningmu aq meschitke i'ane qilghanliqi üchün tutulghan we késilgenlikini melum qilghan idi. Emma éniqlashlirimiz dawamida selim hajining késilgenliki téxi delillenmidi.

Yaqup haji bilen bilen ilgiri tijaret seperliride bille bolghan qazaqistandiki bir Uyghur tijaretchi yaqup hajining tijariy hayati heqqide melumat berdi. Uning déyishiche, yaqup haji meshhur saxawetchi nurtay hajining shérikliridin biri bolup, u bir mehel ghulja nahiyeside öy-mülük sodisi bilen shughullan'ghan. U yene se'udi erebistandiki bir ereb öy bézek shirkitige pay qoshup, mekke we medinelerdimu soda qilghan.

Weziyettin xewerdar kishining bayan qilishiche, nöwette ghuljada tutqun qilin'ghan sodigerlerning hemmisi dégüdek saxawetchi sodigerler bolup, ularning saxawet ishliri qanche chong, saxawettiki teshebbuskarliqi qanche küchlük bolghanliri shunche baldur tutqun qilin'ghan we éghir késiwétilgen. Ilgiriki éniqlashlirimiz dawamida ghuljadiki "Nurtay iskender yétim balilar mektipi" ning qurghuchisi nurtay hajim, turpanyüzi "Ümid mektipi" ning qurghuchisi sadiqjan we saqihajilarningmu tutqun qilin'ghanliqi delillen'gen idi.

Toluq bet