Atushta sen'et pa'aliyetliri we ziyapet uyushturush arqiliq ramizan'gha tosqunluq hem buzghunchiliq qilin'ghan

Washin'gtondin muxbirimiz shöhret hoshur teyyarlidi
2024.03.27
diniy-zatlar-kommunist-partiye.jpg Xitay millet we din xizmiti kadirliri, diniy zatlarni qerellik halda xitay kommunist partiyisining alaqidar siyaset, qanun-tüzümliri bilen terbiyilesh üchün qurulghan mektep oqughuchiliri. Poskam.
dihan.com.cn

Ijtima'iy axbaratlardin ashkarilinishiche we muxbirimizning éniqlap delillishiche, xitay da'iriliri ramizan kirgendin buyan Uyghur élida her xil sen'et pa'aliyetlirini ötküzüshke bashlighan. Bu pa'aliyetlerde dastixan hazirlap ahalilerning roza tutuwatqan yaki tutmaywatqanliqini nazaret qilghan, shundaqla yoshurun rozi tutuwatqanlarning rozisini buzushqa urun'ghan. Atushtiki bu pa'aliyetlerge nechche minglighan kishi qatnashturulup, daghdughiliq shekilde élip bérilghan.

Doyin qatarliq ijtima'iy axbarat wasitiliridiki uchurlardin melum bolushiche, Uyghur élining herqaysi jaylirida sen'et pa'aliyetliri we bezme-ziyapetler ramizan kirgendin buyan san we daghdugha jehettin ilgirikige qarighanda nechche hesse ashqan.

Ramizanning yettinchi küni tarqalghan bir sin körünüshide, nechche minglighan kishining naxsha éytip, ussulgha chüshkenlikini körgili bolsa؛ yene bir sinda, yüzligen kishi jem bolghan bir sorunda dastixan üstige piwa botulkilirining tiklen'genlikini körüshke bolidu. Bu heqte mexsus uchur toplawatqan bir féyisbuk qollan'ghuchining chüshendürüshiche, bu pa'aliyetler peqet kishilerning roza tutuwatqan yaki tutmaywatqanliqini nazaret qilish, yeni tutqanlarni bayqap jazalash üchün orunlashturulghan. Yene ilgiri sürülüshiche, da'iriler bu arqiliq kishilerning rozini yoshurun tutushining aldini alghan.

Téléfonimizni qobul qilghan üstün atushtiki bir kent amanliq mudirining ashkarilishiche, mezkur kentte ramizan kirgendin buyan kechte, yeni iptar we tarawa mezgilide ahaliler kent yighin zaligha toplinip siyasiy öginish élip barghan.

 Ijtima'iy taratqulardiki yene bezi uchurlardin körülüshiche, da'iriler ramizan mezgilide  sen'et nomurlirini körsitishke teshkilligen heweskar sen'etchilerni xitayche naxsha éytquzghan. Atush sheher ichidin téléfonimizni qobul qilghan bir saqchi xadimi, ramizan mezgilidiki bu sen'et pa'aliyetlirini teshkilleshte saqchilarmu muhim rol oynighan. Bezi saqchilar, bixeterlik ishlirigha, beziliri nazaret qilishqa mes'ul bolghan bolsa؛ yene beziliri sen'et nomurlirida rol alghan.

Muhajirettiki inkaslarda yene ramizan'gha tosquluq we buzghunchiliq mahiyitidiki sen'et pa'aliyetliridin “Dowyin” gha chiqqanlirining emeliyette élip bériliwatqanlirining intayin az bir qismi ikenliki, bu xil pa'aliyetlerning yéza-qishlaqlarda mexsus siyasiy heriket süpitide sistémiliq élip bériliwatqanliqi ilgiri sürülidu.

Xadimlarning bayanliridin melum bolushiche, sheherdiki her derijilik emeldarlar, siyasiy-qanun xadimliri ishtirak qilghan bu pa'aliyetlerde, gerche ashkara halda ramizanni cheklesh nutuqliri sözlenmigen bolsimu, jem'iyet tertipi we muqimliq heqqide léksiyeler sözlinip, iptar we tarawa pa'aliyetlirige qatniship qalmasliq wasitilik halda puritilghan. Da'iriler rozi tutmasliqini buyrush ornigha, waqtida ozuqlinip saghlamliqni asrashni tapilighan.

Ramizan mezgilidiki bu tamaq tarqitishning ahalilerde naraziliq keypiyati peyda qilghan yaki qilmighanliqini sorighinimizda, alaqidar xadimlar, nöwette kishilerning “Angliqliq” sewiyesining ashqanliqi, shunga naraziliq bayqalmighanliqi, bu “Ilghar” liqning shekillinishide partiye-hökümetning chong roli barliqini tilgha aldi.

Yuqirida Uyghur élida ramizan'gha tosqunluq we buzghunchiliq xaraktérlik sen'et pa'aliyetlirining ötküzülgenliki, shundaqla yémek-ichmek bérilgenliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.