Австиралийәниң аделайд шәһиридә "уйғур ана тил күни" қутланди

Ихтиярий мухбиримиз учқун
2019-06-13
Share
awstraliye-2019-ana-til.jpg Җәнубий австралийә ана тил мәктипиниң оқутқучи вә оқуғучилири шундақла ата-аниларниң қатнишишида өткүзгән роза һейт вә "уйғур ана тил күни" паалийитидин көрүнүш. 2019-Йили 8-июн, аделайд австралийә.
RFA/Uchqun

Муһаҗирәттики уйғурлар өз мәвҗутлуқини сақлаш үчүн ана тил маарипини чиң тутушқа тиришип кәлмәктә.

6-Айниң 8-күни австиралийәниң аделайд шәһиридә җәнубий авистиралийә ана тил мәктипиниң оқутқучи вә оқуғучилири шундақла ата-аниларниң қатнишишида роза һейит вә "уйғур ана тил күни" мунасивити билән мол мәзмунлуқ паалийәт өткүзгән. Биз бу паалийәт һәққидә тәпсилий мәлумат игиләш үчүн җәнубий австиралийә ана тил мәктипиниң оқутқучиси юлтуз ханимни зиярәт қилдуқ. У мәзкур паалийәт һәққидә мәлумат берип мундақ деди:

"мениң исмим юлтуз, җәнубий авистиралийә уйғур тили мәктипиниң оқутқучиси һәм изчилар синипиниң синип мәсули. 6-Айниң 8-күни бизниң уйғур тили мәктипимиз ‹мәрһаба роза һейит, мәрһаба уйғур тили' паалийитини наһайити әһмийәтлик вә көңүллүк өткүздуқ. Вәтән сөйгүси вә миллий иптихари билән тәрбийәлиниватқан омақ пәрзәнтлиримиз пидакар устазлириға вә қәдирлик ата-анилириға өз тәшәккүрлирини уйғур тилидики қошақ, шеир вә нахшилири билән тәқдим қилди."

Юлтуз ханим йәнә ана тил мәктипи оқуғучилириниң көрсәткән номурлири һәққидиму тохтилип мундақ деди: ""майсилар" синипи обчә қошақ ядлиди шундақла уйғур доппилириниң исмини ейтип бәрди. "сәбийләр" синипидин зулпиқар садир палван қошақлирини декламатсийә қилип бәрди. ‹Ғунчилар' синипидин имран ‹салам хәлқим' намлиқ нахшисини ейтип, қәлбимизни һаяҗанға салди. Униңдин башқа оқуғучимиз мунирә ‹буғраханлар тәзкириси' дин бир абзас декламатсийә қилди, һәмзә ‹аһ, атилар' шеирини декламатсийә қилип бәрди. Бу әһмийәтлик паалийәттин һәммимиз шунчилик үмидләндуқ вә җасарәткә егә болдуқ. Ахирида оқуғучилиримизға һейтлиқ совғат сүпитидә сомка тәқдим қилдуқ."

Җәнубий авистиралийә уйғур тили мәктипиниң оқутқучиси мәликәзат ханим мәзкур мәктәпниң қурулуши һәққидә тохтилип, мунуларни билдүрди: "җәнубий австиралийә уйғур тили мәктипи авистиралийә шәрқий түркистан җәмийитиниң тәшәббуси вә қоллиши арқилиқ қурулған болуп, 20 йилдин артуқ тарихқа егә. Мәзкур уйғур тили мәктипи муһаҗирәттики уйғур тили мәктәплириниң ичидә тарихи узун болған уйғур тили мәктәплириниң бири һесаблиниду. Мәктипимиздә һазир 100 дин артуқ оқуғучи бар болуп, бу оқуғучилар уйғур тили сәвийәсигә қарап 5 синипқа бөлүнгән. Балилар бу мәктәптә һәр шәнбә күни 2 йерим саәт оқуйду. Ата-аниларму балиларниң уйғур тилини пухта егилиши үчүн өз нөвити бойичә синипқа кирип оқутқучиларға ярдәмлишиду."

У йәнә уйғур тили мәктипигә австралийә һөкүмитиниңму ярдәмдә болидиғанлиқини қәйт қилип мундақ деди: "балиларниң ана тил сөйгүси вә мәктәпкә келиш қизғинлиқини юқири көтүрүш үчүн оқутқучилар вә ата-анилар бирлишип һәр түрлүк паалийәтләрни уюштуруп туримиз. Мәктәпниң тохтап қалмай мунтизим һалда давам қилиши үчүн мәктәп мудирлири маарип идарисигә илтимас қилиду, маарип идарисиму мәктипимизни қоллап, һәр җәһәтләрдин ярдәм бериду."

Мәзкур паалийәттә йәнә "ғунчилар" синипидин мунирә йүсүп "буғраханлар тәзкириси" дин арийәни, "изчилар" синипиниң оқуғучиси, австиралийәдә туғулуп чоң болған һәмзә шәмсидин шаир абдуреһим абдулланиң "аһ, атилар" шеирни декламатсийә қилип бәргән.

Җәнубий австралийә уйғур тили мәктипи австралийәниң аделайд шәһиригә җайлашқан болуп, муһаҗирәттики уйғур тили мәктәплириниң ичидә тарихи узун мәктәпләрниң бири һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт