Awstiraliyening adélayd shehiride "Uyghur ana til küni" qutlandi

Ixtiyariy muxbirimiz uchqun
2019-06-13
Élxet
Pikir
Share
Print
Jenubiy awstraliye ana til mektipining oqutquchi we oqughuchiliri shundaqla ata-anilarning qatnishishida ötküzgen roza héyt we "Uyghur ana til küni" pa'aliyitidin körünüsh. 2019-Yili 8-iyun, adélayd awstraliye.
Jenubiy awstraliye ana til mektipining oqutquchi we oqughuchiliri shundaqla ata-anilarning qatnishishida ötküzgen roza héyt we "Uyghur ana til küni" pa'aliyitidin körünüsh. 2019-Yili 8-iyun, adélayd awstraliye.
RFA/Uchqun

Muhajirettiki Uyghurlar öz mewjutluqini saqlash üchün ana til ma'aripini ching tutushqa tiriship kelmekte.

6-Ayning 8-küni awstiraliyening adélayd shehiride jenubiy awistiraliye ana til mektipining oqutquchi we oqughuchiliri shundaqla ata-anilarning qatnishishida roza héyit we "Uyghur ana til küni" munasiwiti bilen mol mezmunluq pa'aliyet ötküzgen. Biz bu pa'aliyet heqqide tepsiliy melumat igilesh üchün jenubiy awstiraliye ana til mektipining oqutquchisi yultuz xanimni ziyaret qilduq. U mezkur pa'aliyet heqqide melumat bérip mundaq dédi:

"Méning ismim yultuz, jenubiy awistiraliye Uyghur tili mektipining oqutquchisi hem izchilar sinipining sinip mes'uli. 6-Ayning 8-küni bizning Uyghur tili mektipimiz 'merhaba roza héyit, merhaba Uyghur tili' pa'aliyitini nahayiti ehmiyetlik we köngüllük ötküzduq. Weten söygüsi we milliy iptixari bilen terbiyeliniwatqan omaq perzentlirimiz pidakar ustazlirigha we qedirlik ata-anilirigha öz teshekkürlirini Uyghur tilidiki qoshaq, shé'ir we naxshiliri bilen teqdim qildi."

Yultuz xanim yene ana til mektipi oqughuchilirining körsetken nomurliri heqqidimu toxtilip mundaq dédi: ""Maysilar" sinipi obche qoshaq yadlidi shundaqla Uyghur doppilirining ismini éytip berdi. "Sebiyler" sinipidin zulpiqar sadir palwan qoshaqlirini déklamatsiye qilip berdi. 'ghunchilar' sinipidin imran 'salam xelqim' namliq naxshisini éytip, qelbimizni hayajan'gha saldi. Uningdin bashqa oqughuchimiz munire 'bughraxanlar tezkirisi' din bir abzas déklamatsiye qildi, hemze 'ah, atilar' shé'irini déklamatsiye qilip berdi. Bu ehmiyetlik pa'aliyettin hemmimiz shunchilik ümidlenduq we jasaretke ége bolduq. Axirida oqughuchilirimizgha héytliq sowghat süpitide somka teqdim qilduq."

Jenubiy awistiraliye Uyghur tili mektipining oqutquchisi melikezat xanim mezkur mektepning qurulushi heqqide toxtilip, munularni bildürdi: "Jenubiy awstiraliye Uyghur tili mektipi awistiraliye sherqiy türkistan jem'iyitining teshebbusi we qollishi arqiliq qurulghan bolup, 20 yildin artuq tarixqa ége. Mezkur Uyghur tili mektipi muhajirettiki Uyghur tili mekteplirining ichide tarixi uzun bolghan Uyghur tili mekteplirining biri hésablinidu. Mektipimizde hazir 100 din artuq oqughuchi bar bolup, bu oqughuchilar Uyghur tili sewiyesige qarap 5 sinipqa bölün'gen. Balilar bu mektepte her shenbe küni 2 yérim sa'et oquydu. Ata-anilarmu balilarning Uyghur tilini puxta égilishi üchün öz nöwiti boyiche sinipqa kirip oqutquchilargha yardemlishidu."

U yene Uyghur tili mektipige awstraliye hökümitiningmu yardemde bolidighanliqini qeyt qilip mundaq dédi: "Balilarning ana til söygüsi we mektepke kélish qizghinliqini yuqiri kötürüsh üchün oqutquchilar we ata-anilar birliship her türlük pa'aliyetlerni uyushturup turimiz. Mektepning toxtap qalmay muntizim halda dawam qilishi üchün mektep mudirliri ma'arip idarisige iltimas qilidu, ma'arip idarisimu mektipimizni qollap, her jehetlerdin yardem béridu."

Mezkur pa'aliyette yene "Ghunchilar" sinipidin munire yüsüp "Bughraxanlar tezkirisi" din ariyeni, "Izchilar" sinipining oqughuchisi, awstiraliyede tughulup chong bolghan hemze shemsidin sha'ir abduréhim abdullaning "Ah, atilar" shé'irni déklamatsiye qilip bergen.

Jenubiy awstraliye Uyghur tili mektipi awstraliyening adélayd shehirige jaylashqan bolup, muhajirettiki Uyghur tili mekteplirining ichide tarixi uzun mekteplerning biri hésablinidiken.

Pikirler (0)
Share
Toluq bet