Qazaqistandiki kishilik hoquq adwokati ayman umarowa tekrar tehditke uchrighanliqini élan qildi

Qazaqistandiki dangliq kishilik hoquq adwokati ayman omarowa üchün roza héytning harpa axshimi, qara basqan bir kéche boldi. Bu kéche uning ermek iti oz qorusida sirliq halda öltürülgen. Ziyaritimizni qobul qilghan ayman buni özining aghzini yumdurmaqchi bolghanlarning tehdit suyiqesti dep bildürdi. Buning aldida uning ishiki aldigha bir müshükning ölüki tashlap qoyulghan iken.

Lagér shahiti sayragülni 3-iyun qazaqistandin salamet shwétsiyege uzitip, ikkinchi qedemde mirza qamaqtiki "Ata yurt pida'iyliri" ning rehbiri sérikjan bileshni erkinlikke chiqirish üchün xizmetke kirishken, adwokat ayman omarowa bügün radiyomizgha özining yéqindin buyan tekrar tehditke uchrighanliqini bildürdi.

Ayman omarowaning bildürüshige qarighanda, 4-iyun küni shiwétsiyege yétip barghan lagér shahiti sayragül bilen téléfonda sözliship, uning u jayda özini nahayiti bixeter we erkin, xatirjem hés qilghanliqini anglap, uning ümidlik bolup qalghanliqidin xosh bolghan bolsimu, epsus u kéche uning üchün uyqusiz bir endishilik kéche bolghan. U, kéchiche qorusida gheyriy awazlarni tuyghan, emma uyquchiliqta némilikini jezimleshtürelmigen. Etisi etigen sa'et 9 da bolsa u baliliri bilen teng öz qorusida ermek iti barsning échinishliq halda ölgenlikini körgen.

Ayman itini "Öltürülgen" dep jezm qilishidiki seweblerni itning jesitining süretlirini körsitip turup mundaq dep sherhlidi: "Birinchidin resimlerdin qarisingiz éniq körünüp turidu. Uning jénini biri mejburiy alghan. Éghzigha topa tiqilghan.

Ikkinchidin, bars a'ilimizde turuwatqinigha besh yil bolghan ermek itimiz, uning xuy-mijezini yaxshi bilimen, intayin shox, saghlam haywan, uning tuyuqsizla bir kéchide qérip yaki késel bilen ölüp qélishi mumkin emes.

Üchinchidin, her türlük délolar üstide uzun yil ishligen bir adwokat bolush süpitim bilen kespiy tejribem, sezgüm, bu itning qesten we bixeterlik téxnikaliridin xewiri bar kespiy xadimlar teripidin öltürülgenlikidin bésharet béridu.

Ayman yene uning itini öltürüsh arqiliq özige qorqunchluq agahlandurush yaki tehdit salmaqchi dep guman qilishining sewebini chüshendürüp yene mundaq deydu:

"Itimni kimning yaki kimlerning öltürgenlikige ispatim bolmisimu emma men buni, aghzimni yumdurmaqchi bolghanlarning qestenlik bilen qilghan suyiqesti dep qaraymen. Chünki, bu méning lagér shahiti sayragül sawutbayni erkinlikke chiqarghinimdin kéyin we ete 6-iyun sérikjanning soti bolidighan künlerning ariliqida yüz berdi. Buni tasadipiyliq dep qarimaymen, bularning meqsiti manga tehdit sélip qorqutush arqiliq qiliwatqan xizmitimdin qol üzdürüsh".

Uning üstige bu xil haywanning ölüki bilen tehdit qilish tunji qétimliqi emes, bu weqe yüz bérishtin ikki aylar burunmu bir qétim yüz bergen, u chaghda bir küni sheher öydin sirtqa chiqishimgha, ishik aldimgha tashlap qoyulghan bir müshükni körüp könglümge bir ghum chüshken idi. Itimning öltürülüshi ikkinchi sirliq weqe. Bu bir türlük klassik tehdit qilish usuli, yeni ölüm arqiliq qorqutushni meqset qilghan.

U: "Siz qorqtingizmu?" dégen so'alimizgha nahayiti keskin jawab berdi: "Elwette qorqtum, özüm üchün emes, balilirim üchün qorqtum, endishilendim. Chünki balilar bek qorqup ketti. Chünki u itni balilirim yaxshi köretti, men bilenmu dawamliq oynaytti biz barsqa bir yigitke mu'amile qilghandek mu'amile qilattuq. U a'ilimizning ezasidek bolup qalghan, isit! u mushundaq échinishliq öltürüldi".

Ayman omarowa weqe yüz bergendin kéyin yerlik saqchigha melum qilghan bolsimu ulardin héchqandaq inkas kelmigen, axiri itining ölüsh sewebini éniqlash üchün özi itini kespiy qanun doxturigha apirip bergen we ijtima'iy taratqular arqiliq weqeni anglatqan. Bu sirliq weqe ghulghula qozghashqa bashlighandin kéyinla saqchilar uning öyige kélip shekilge itning ölümi heqqide so'allarni sorap ketken, emma hazirghiche héchqandaq éniqlash élip barmighan.

Bu heqte toxtalghan ayman epsuslan'ghan halda: "Men saqchilarning inkasidin bu weqeni yépiwétishni xalaydighanliqini hés qildim." deydu. U saqchi tereptin qoghdinishqa érisheleydighanliqidin ümidini üzüp, öyi etrapigha mexsus kaméra ornitish üchün shirketler bilen alaqilishiwatqaniken.

Weqedin xewerdar bolghan "Ata yurt pida'iyliri" teshkilatining wekilliridin qayretning éytishiche, adwokat aymanning itining sirliq halda qorusida ölüp qélishi bir binormal hadise bolsimu hazirche uni kim qilghanliqini késip éytish tes iken. Qayret bu weqening dangliq we merdane adwokat ayman'gha tesir körsitishi we uni sérikjanning délosi üstide ishleshtin tosup qalalishigha ishenmeydighanliqini bildürdi.

Qazaqistanda lagérlar heqqide guwahliq toplashtek pida'iy xizmetlerni élip bériwatqan tilshunas géné bonn öziningmu bu weqedin xewer tapqan bolsimu hazirche késip bir néme démek tes dep qaraydighanliqini bildürdi.

Ayman, 10-marttin bashlap mirza qamaqta turuwatqan "Ata yurt pida'iyliri" ning yétekchisi sérikjanning shexsiy adwokati bolush süpiti bilen, ete yeni 6-iyun qazaqistan paytextide sotqa chiqmaqchi. Ayman gerche bu weqe a'ilisige azab we tehdit tughdurghan bolsimu, biraq buning özining adalet üchün des turushtin hem özining kespiy we insaniy burchini ada qilishtin tosup qalalmaydighanliqini tekitlidi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar