Qirghizistan Uyghurliri milliy armiye künini we barin inqilabini xatirilidi

Qirghizistandin ixtiyariy muxbirimiz féruze teyyarlidi
2024.04.08
Dilmurat-Akbarov Ixtiyariy sözge teklip qilin'ghan ittipaq jem'iyitining sabiq re'isi dilmurat ekberow. 2024-Yili 8-aprél, bishkek
RFA/Feruza

Qirghizistan Uyghurliri dunya Uyghur qurultiyining uqturushigha awaz qoshup 5-aprél barin inqilabining 34 yilliqi we 8-aprél sherqiy türkistan milliy armiyesi qurulghanliqining 79-yilliqini xatirilidi. Pa'aliyet 5-aprél küni dunya Uyghur qurultiyining qirghizistandiki wekillirining teshebbusida bishkek shehirining alamédin mehelliside uyushturuldi.

Sherqiy türkistan jumhuriyiti 1945-yili 4-ayning 8-küni özining muntizim milliy armiyesini qurghan bolup, gerche, 1950-yillarda xitay hökümitini bu armiyeni emeldin qalduruwetken bolsimu, emma chet ellerdiki Uyghur jama'iti köp yillardin buyan mezkur künni xatirilep kelmekte.

Pa'aliyetke qatnashqan  wetenperwer aqsaqallar, 2024-yili 8-aprél, bishkek
Pa'aliyetke qatnashqan wetenperwer aqsaqallar, 2024-yili 8-aprél, bishkek
RFA/Feruza

Xatirilesh pa'aliyiti dunya Uyghur qurultiyining qirghizistandiki wakaletchisi rozimuhemmet abdulbaqiyéfning riyasetchilikide élip bérildi. Murasimgha bishkek shehiri we uning etrapidiki yézilardin kelgen Uyghur jama'itining wekilliri qatnashti.

Mezkur pa'aliyet iptarliq shekilde ötküzülgen bolup ikki qisimdin terkib tapqan. Aldi bilen riyasetchi köpchilikke salam yollap barin inqilabi we xitay hakimiyitining qanliq basturushi toghrisida toluq melumat berdi.

Radiyomiz ziyaritimizni qobul qilghan dunya Uyghur qurultiyining wekili mewlan hpshurof barin inqilabi we zeynidin yüsüp toghrisida sözlep, xitay hakimiyitining dawamliq qirghinchiliq siyasitining kücheytishini tilgha aldi.

Murasim dawamida weten azadliqi yolida qurban bolghan qérindashlargha atap qur'an tilawet qilindi.

Mezkur pa'aliyetning ikkinchi qismida “Ittipaq” gézitining mu'awin muherriri ekberjan ba'udunof milliy armiyening qurulushi we érishken muweppeqiyetliri toghrisida sözlep ötti.

Barin inqilabining 34 yilliqini xatirilesh pa'aliyitige qatnashqan Uyghur xanimlar, 2024-yili 8-aprél, bishkek
Barin inqilabining 34 yilliqini xatirilesh pa'aliyitige qatnashqan Uyghur xanimlar, 2024-yili 8-aprél, bishkek
RFA/Feruza

Mezkur murasimgha qatnashqan pa'aliyetchilerdin tursun'ay islam xanim radiyomiz ziyaritini qobul qilip bu xil murasimlarning jama'et ehli, bolupmu yashlarning rohini kücheytishte muhim rol oynaydighanliqini sözlep ötti.

Milliy armiye qurulghanliqining 79-yilliqini xatirilesh pa'aliyiti yene qirghizistan jenubidiki jalal abad shehiride jama'et erbabliridin elishir nasiraxunofning teshebbusida uyushturuldi. Elishir ependi özi jama'et ehlige milliy armiye jengchiliri, xizmetliri we érishken muweppeqiyetliri toghrisida tepsiliy doklat qildi.

Qirghizistan Uyghurliri dunya Uyghur qurultiyining chaqiriqlirigha awaz qoshup Uyghur xelqining tarixidiki muhim ammiwi we siyasiy weqelerni xatirilep uni kélechek ewladlargha qaldurush, yash ewladlarning tarixni bilish we öginish rohini kücheytishke ehmiyet bermekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.