Türkiyening kastamonu we qahramanmarash sheherliride 5-aprél barin shéhitlirini xatirilesh pa'aliyiti ötküzüldi

5-Aprél küni barin inqilabining 31 yilliqi munasiwiti bilen türkiyening kastamunu we qahramanmarash sheherliride süret körgezmisi échildi.

Körgezmide barin weqeside hayatidin ayrilip qalghan shéhitlarning süretliri we shu qétimliq weqeler eks ettürülgen resim we matériyallar körsitilgen. Shuning bilen bir waqitta yene xitayning Uyghur diyarida tesis qilghan yighiwélish lagérlirining körünüshliri, mezkur lagérlargha qamalghan Uyghur ziyaliyliri, diniy zatlar, sen'etchiler, yazghuchilar we bashqa her sahediki serxillerning süretliri körsitilgen.

Bu qétimliq körgezmini sherqiy türkistan teshkilatlar birlikining orunlashturushi bilen kastamonu uniwérsitétida oquwatqan Uyghur oqughuchilar uyushturghan bolup, mezkur körgezmini kastomunidiki türk ammiwi teshkilat mes'ulliri, bezi siyasiy partiyelerning mes'ulliri we xelqtin bolup köp sanda kishi ékskursiye qilghan.

Bu qétimliq körgezmini uyushturghan Uyghur oqughuchilardin abduzahir ziyaritimizni qobul qilip, mezkur körgezmining meqsiti barin shéhitlirini eslesh we Uyghurlarning hazirqi éghir weziyitini türk xelqige höjjetler arqiliq bildürüsh ikenlikini tekitlidi.

Abduzahirning bildürüshiche süret körgezmisi kastamonu shehirining merkizidiki tarixiy meschitning aldida ötküzülgen bolghachqa, tarixiy jaylarni sayahet qilish üchün kelgen nurghun kishi ékskursiye qilghan. Abduzahir körgezmini aylan'ghan kishilerning özlirige “Her da'im silerni qollap quwwetleymiz” dep inkas qayturghanliqini tekitlidi.

Kastamunu türkiyening gherbiy shimaligha jaylashqan bolup, bu shehirige 2016-yilidin kéyin Uyghurlar kélip olturaqlishishqa bashlan'ghan. Hazir kastomu uniwérsitétida 100 etrapida Uyghur oqughuchi oquwatqan bolup, ular 4 yildin buyan izchil aktip pa'aliyet élip barmaqta. Abdul'eziz ependi 4 yildin buyan bu sheherde izchil halda pa'aliyet élip bériwatqanliqini, kastamonu xelqining Uyghurlargha hésdashliq qiliwatqanliqini otturigha qoydi.

5-Aprél küni türkiyening sherqiy jenub rayonigha jaylashqan qahramanmarash shehiridimu barin weqeside shéhit bolghan Uyghurlarni xatirilesh pa'aliyiti ötküzülgen. Pa'aliyetni sherqiy türkistan teshkilatlar birlikining orunlashturushi bilen sultan satuq bughraxan wexpisining qahramanmarash shöbisi uyushturghan bolup, pa'aliyette barin weqesi eks ettürülgen foto-süretler qoyulghandin sirt, barin weqesi we Uyghurlarning hazirqi éghir weziyiti bayan qilin'ghan axbarat bayanati oqup ötülgen.

Sultan satuq bughraxan wexpisining qahramanmarash shöbisining mes'uli seferjan pa'aliyetning tepsilati toghrisida melumat berdi.

Seferjan qahramanmarash Uyghur oqughuchilar eng köp sheherlerdin biri bolup qalghanliqini, qahramanmarash xelqining Uyghurlargha qattiq hésdashliq qilidighanliqini bayan qildi.

5-Aprél barin weqesi shéhitlirini eslesh we Uyghurlarning éghir weziyitini anglitish pa'aliyiti türkiyening istanbul we konya qatarliq sheherliridimu ötküzülgen bolup, korona wirusidin tüpeyli bir kün ötküzüshke ruxset bérilgen.