Канада әлчиси б д т ни уйғурларға қаритилған ирқий қирғинчилиққа аит дәлил-испатларни тәкшүрүшкә чақирди

Канаданиң бирләшкән дөләтләр тәшкилатида турушлуқ баш әлчиси б д т ниң кишилик һоқуқ кеңишини хитайниң уйғурларға қаратқан зиянкәшликлириниң ирқий қирғинчилиқ категорийәсигә ятидиған ятмайдиғанлиқи үстидин тәкшүрүш елип беришқа чақирған.

Боб рей бу сөзләрни канада медия ширкити с б с ниң зияритини қобул қилғанда оттуриға қойған.

У мундақ дегән: “шүбһисизки, хитайниң қиливатқанлириниң ирқий қирғинчилиқ әһдинамисидики ирқий қирғинчилиқниң ениқлимисиға мас келидиған тәрәплири бар. Әмма, әһвал шундақ икән, у сиздин учур топлаш җәрянини баштин кәчүрүшни һәмдә бу хил әйибләшни қоллайдиған дәлил-испатларға еришкәнликимизни җәзмләштүрүшни тәләп қилиду.”

Алдинқи айда, канада авам палатаси тармақ комитети доклат елан қилип, хитайниң мусулман аз санлиқ милләтләргә қарита йүргүзүватқан җаза лагерлири, кәң көләмлик тутуп туруш, мәҗбурий әмгәккә селиш вә нопусни контрол қилиш қатарлиқ қилмишлириниң ирқий қирғинчилиққа берилгән ениқлимиларға дәл келидиғанлиқи билдүргән иди.

Мәлум болушичә, боб рей илгири канаданиң бирмида турушлуқ алаһидә әлчиси болуп вәзипә өтигән. У зиярәт җәрянида йәнә, канаданиң уйғур хәлқиниң нидасиға қулақ йопуруп туралмайдиғанлиқини билдүргән.