Б д т уйғур вәзийити һәққидики учурларниң кишини “толиму тәшвишкә салидиған” лиқини билдүргән
Б д т кишилик һоқуқ кеңишиниң баянатчиси руберт колвилле.
Social Media
10-Декабир бирләшкән дөләтләр тәшкилати баянат елан қилип, уйғур сот коллегийәси топлиған уйғур вәзийити һәққидики учурларниң кишини “толиму тәшвишкә салидиған” лиқини билдүргән вә өзлириниңму бу һәқтә бир доклат тәйярлаватқанлиқини, доклатниң пат йеқинда елан қилинидиғанлиқини ейтқан.
Уйғур сот коллегийәси 9-декабир лондонда һөкүм елан қилиш йиғини ечип, хитайниң уйғурлар үстидин ирқий қирғинчилиқ вә инсанийәткә қарши җинайәт садир қилғанлиқини, буларниң һәммисигә хитай баш секретари ши җинпиңниң җавабкар икәнликини җакарлиған.
Б д т кишилик һоқуқ кеңишиниң баянатчиси руберт колвилле җәнвәдә өткүзүлгән мухбирларни күтүвелиш йиғинида мундақ дегән: “уйғур соти шинҗаңдики уйғур вә башқа мусулман аз санлиқ милләтләрниң вәзийитигә мунасивәтлик кишини толиму тәшвишкә салидиған техиму көп учурларни ашкарилиди.”
У йәнә өзлириниңму мушуниңға охшап кетидиған бәзи мәлуматларға игә болғанлиқини ейтқан вә мундақ дегән: “бизму әлвәттә һәр хил орунларда охшаш шәкилдики халиғанчә тутуп туруш вә начар муамилигә учраш әндизилири, мәҗбурлаш характерлик әмгәк қилмишлири һәмдә иҗтимаий вә мәдәнийәт һоқуқлириниң вәйран қилинғанлиқини ениқлидуқ.”
Униң ейтишичә б д т кишилик һоқуқ кеңиши уйғур вәзийити һәққидики доклатини кәлгүси бир нәччә һәптә ичидә елан қилидикән.
2018-Йили сентәбирдин бир милйондин артуқ уйғурниң йиғивелиш лагерлирида тутуп турулғанлиқи оттуриға чиққандин буян б д т кишилик һоқуқ алий комиссари мичелл бачелет хитайни зиярәт қилиш шәртлирини оттуриға қоюп кәлгән.
Һалбуки, хитай униң уйғур диярини тосалғусиз зиярәт қилиш тәлипини изчил һалда рәт қилип келиватқан иди.
- Бәхтияр бөрә: “мән уйғур, мән террорчи әмәс, ирқий қирғинчилиқни тохтат”
- Америка уйғур академийәсиниң 3-нөвәтлик сайлимида алдинқи хизмәтләр хуласилинип йеңи пиланлар оттуриға қоюлди
- Нури түркәл: “мениң комиссарлиқ хизмитим болсун вә яки һазирқи рәислик хизмитим болсун һәммиси асаслиқ уйғурларниң хизмитини қилишни мәркәз қилған”
- Б д т ниң ички қисмидики нишаниға мухалип қилмишлири вә уйғур мәсилиси
- Дуня мусапирлар күнидә уйғур мусапирлирини канадаға йәрләштүрүш һәққидә тәклип лайиһәси сунулди
