B d t Uyghur weziyiti heqqidiki uchurlarning kishini “Tolimu teshwishke salidighan” liqini bildürgen

10-Dékabir birleshken döletler teshkilati bayanat élan qilip, Uyghur sot kollégiyesi toplighan Uyghur weziyiti heqqidiki uchurlarning kishini “Tolimu teshwishke salidighan” liqini bildürgen we özliriningmu bu heqte bir doklat teyyarlawatqanliqini, doklatning pat yéqinda élan qilinidighanliqini éytqan.

Uyghur sot kollégiyesi 9-dékabir londonda höküm élan qilish yighini échip, xitayning Uyghurlar üstidin irqiy qirghinchiliq we insaniyetke qarshi jinayet sadir qilghanliqini, bularning hemmisige xitay bash sékrétari shi jinpingning jawabkar ikenlikini jakarlighan.

B d t kishilik hoquq kéngishining bayanatchisi rubért kolwillé jenwede ötküzülgen muxbirlarni kütüwélish yighinida mundaq dégen: “Uyghur soti shinjangdiki Uyghur we bashqa musulman az sanliq milletlerning weziyitige munasiwetlik kishini tolimu teshwishke salidighan téximu köp uchurlarni ashkarilidi.”

U yene özliriningmu mushuninggha oxshap kétidighan bezi melumatlargha ige bolghanliqini éytqan we mundaq dégen: “Bizmu elwette her xil orunlarda oxshash shekildiki xalighanche tutup turush we nachar mu'amilige uchrash endiziliri, mejburlash xaraktérlik emgek qilmishliri hemde ijtima'iy we medeniyet hoquqlirining weyran qilin'ghanliqini éniqliduq.”

Uning éytishiche b d t kishilik hoquq kéngishi Uyghur weziyiti heqqidiki doklatini kelgüsi bir nechche hepte ichide élan qilidiken.

2018-Yili séntebirdin bir milyondin artuq Uyghurning yighiwélish lagérlirida tutup turulghanliqi otturigha chiqqandin buyan b d t kishilik hoquq aliy komissari michéll bachélét xitayni ziyaret qilish shertlirini otturigha qoyup kelgen.

Halbuki, xitay uning Uyghur diyarini tosalghusiz ziyaret qilish telipini izchil halda ret qilip kéliwatqan idi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar