B d t kishilik hoquq aliy komissari lagérlarni cheklimisiz ziyaret qilishni telep qildi

Muxbirimiz jüme
2019-06-14
Élxet
Pikir
Share
Print
B d t kishilik hoquq aliy komissari méshél bachélot xanim kishilik hoquq kéngishining yighinida sözlimekte. 2019-Yili 13-iyun, jenwe.
B d t kishilik hoquq aliy komissari méshél bachélot xanim kishilik hoquq kéngishining yighinida sözlimekte. 2019-Yili 13-iyun, jenwe.
REUTERS

B d t kishilik hoquq aliy komissari méshél bachélot xitay da'iriliridin lagérlarni cheklimisiz ziyaret qilishni telep qilghanliqini bildürdi.

Bu sözlerni méshél bachélotning ishxanisi radiyomizning bu heqte sorighan so'allirigha yazma shekilde yollighan jawabida éytti.

Méshél bachélotning taratqu we axbarat ishxanisining xadimi murta hurtado jawabida munularni dédi: "Aliy komissar xitayni ziyaret qilishqa teklip qilindi. Hazir biz xitay hökümiti bilen cheklimisiz ziyaret qilish mesilisini munazire qiliwatimiz."

13-Iyun xitayning b d t da turushluq bash elchisi chén shü jenwede muxbirlarni kütüwélip, b d t kishilik hoquq aliy komissari méshél bachélotning atalmish "Qayta terbiyelesh merkezliri" ni öz közi bilen körüp kétishini ümid qilidighanliqini bildürgenidi.

Radiyomizgha yollan'ghan jawabta yene b d t kishilik hoquq aliy komissarining xitayning b d t da turushluq bash elchisi bilen ötken hepte körüshkenliki delillen'gen.

B d t ning munasiwetlik idariliri ötken yili xitayning Uyghur rayonida atalmish "Qayta terbiyelesh merkezliri" namida 1 milyondin artuq Uyghurni lagérlargha qalmighanliqini eyibligen.

Xitay hökümiti ilgiri b d t emeldarlirining Uyghur élide mislisiz derijide kéngeytilgen lagérlarni cheklimisiz tekshürüsh telipini izchil halda ret qilip kéliwatqan idi.

B d t kishilik hoquq aliy komissarining bu nöwet qandaq shertler bilen xitaygha teklip qilin'ghanliqi hemde uninggha lagérlarni cheklimisiz tekshürüsh ruxsiti bérilidighan yaki bérilmeydighanliqi hazirche namelum.

Halbuki, xitayning b d t kishilik hoquq aliy komissarini Uyghur rayonigha teklip qilishi, amérikining lagér mesiliside xitaygha qaratqan eyibleshliri kücheygen, lagérlargha qamalghanlar sanining 2 milyondin 3 milyon'ghiche ikenliki qeyt qiliniwalghan mezgilde otturigha chiqti.

Toluq bet