Bélgiye höriyet uniwérsitétida Uyghurlar toghriliq léksiye uyushturulghan

Ixtiyariy muxbirimiz Uyghur'ay
2021-10-14
Share

13-Öktebir küni bélgiye höriyet uniwérsitéti ereb oqughuchilar birleshmisi Uyghurlar heqqide mexsus léksiye uyushturghan.

Mezkur pa'aliyetke bélgiye parlaméntida Uyghur irqiy qirghinchiliqni étirap qilishta bashlamchiliq rol oynighan we alahide küch chiqarghan bélgiye yéshillar partiyesining ezasi, fédératsiye wekili samu'il gogulati ependi, bélgiye höriyet uniwérsitéti xitay tetqiqat inistitutining piroféssori, sherqshunas wanisa xanim we gollandiyede turushluq lagér shahiti qelbinur sidiq xanim qatarliq kishiler alahide teklip bilen qatniship, Uyghurlar heqqide doklat bergen.

Mezkur léksiye bérish pa'aliyiti bélgiye waqti kech sa'et 6 de bashlinip 8 giche dawamlashqan, léksiye jeryanida mutexessisler bilen we uniwérsitét oqughuchiliri arisida xitayning Uyghurlargha yürgüzüwatqan irqiy qirghinchiliqi heqqidiki munaziriler nahayiti qizghin keypiyatta élip bérilghan.

Bélgiye Uyghur jem'iyiti bélgiye höriyet uniwérsitéti ereb oqughuchilar birleshmisining teklipige bina'en bu pa'aliyetke qatnashqan Uyghur teshkilatlirining biridur.

Bélgiye Uyghur jem'iyitining re'isi abdumutellip imir ependi ziyaritimizni qobul qilip, bu qétimliq léksiye pa'aliyiti heqqide melumat berdi. U bu pa'aliyetning nahayiti qizghin keypiyatta ötküzülgenlikini, Uyghurlarning nöwettiki weziyitini bélgiyediki aliy mektep oqughuchilirigha tonushturushta intayin ehmiyetlik bir pa'aliyet bolghanliqini bildürdi.

Radiyomiz ziyaritimizni qobul qilghan lagér shahiti qelbinur sidiq xanim bu qétimliq léksiyege qatniship, bélgiyediki uniwérsitét oqughuchilirigha Uyghurlarning weziyiti heqqide melumat bérish pursitige érishkenlikidin nahayiti memnun bolghanliqini éytti

Bu qétimliq léksiye axirlashqandin kéyin, bélgiye Uyghur jem'iyiti özining inistigram hésabigha yollighan mezkur léksiye heqqidiki uchurlar zor diqqet qozghighan.

Bélgiye yawropa ittipaqining bash orgini jaylashqan dölet bolup, bu dölette élip bérilghan Uyghurlar heqqidiki pa'aliyetler yawropadiki her qaysiy döletler we organlarning küchlük diqqitini qozghap kelmekte. Bu yil 8-iyun küni bélgiye parlaménti "Uyghur irqiy qirghinchiliqi" heqqide resmiy qarar élan qilghan idi.

Melumki, bélgiye parlaménti amérika hökümiti we en'gliye, kanada, gollandiye, litwa parlaméntliridin kiyin, xitayning Uyghurlargha qaratqan basturushlirini "Irqiy qirghinchiliq" dep tonughan 6-dölet idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet