Tijaretchi xélil hashim oghlini 15 yilning aldida dini sawat kursigha bergenliki üchün 19 yilliq késilgen

Muxbirimiz shöhret hoshur
2019-04-16
Élxet
Pikir
Share
Print
Bigunah 19 yil késilgen tijaretchi xélil hashim.
Bigunah 19 yil késilgen tijaretchi xélil hashim.
Social Media

Ghuljida közge körün'gen tijaretchilerdin biri bolghan xélil hashim burun xitayche oqughanliqi we Uyghur örp-adetlirige puxta bolmighanliqi üchün turmushta buning, bolupmu diniy sawati bolmasliqning xijaletchilikini köp tartqan. Shunga u bashlan'ghuch mektepte oquwatqan oghli merdan xélilni derstin sirt mezgilide mehellidiki bir a'iliwi qur'an kursigha bergen. 15 Yil awwalqi bu qilmish ötken yilgha kelgende xélil hashimning 19 yilliq késilishi, merdan xélil we apisining bolsa lagérgha ekitilishige seweb bolghan.

Weziyettin xewerdar kishining ghuljida tutqun qilin'ghan tijaretchiler heqqide radiyomizgha yazghan xétide, ghuljida közge körün'gen tijaretchilerdin xélil hashimning 19 yilliq késilgenliki bayan qilin'ghan. Inkasta xélil hashimgha misirni ziyaret qilish, balisini qur'an kursigha bérish we milliy öchmenlik peyda qilishtin ibaret üch xil qilmish seweblik dölet bixeterlikige xewp yetküzüsh jinayiti artilghanliqi yézilghan. Ghuljidiki alaqidar xadimlar xélil hashimning késilishi heqqide héchqandaq melumat bermidi. Inkasta, xélil hashimning köpinche uruq-tughqanlirining qazaqistanda ikenliki we bir mezgil qazaqistanda tijaret qilghanliqi yézilghan. Biz bu yip uchigha asasen, xélil hashimning qazaqistandiki akisi hakim hashimning oghli wahap hakimni ziyaret qilduq. U taghisining 19 yilliq késilgenlik xewiridin téxi üch kün awwal xewer tapqanliqini éytti.


Inkasta déyilishiche xélil hashim ottura mektepni xitayche oqughan, mektep püttürgüche Uyghur balilargha asasen arilashmighan. U xitay tiligha puxta bolghanliqi üchün dadisining ichkiri ölkilerde qiliwatqan tijaretlirige yaxshi masliship béreligen bolsimu, emma özi el-jama'etke arilishishta bir qatar qiyinchiliqlargha duch kelgen, bolupmu 1990 ‏-yillarda anisi wapat bolghanda, anisining ölümini uzitish dawamida diniy sawati bolmasliqning bir qatar xijaletchilikini tartqan. Shunga u 2000 ‏-yillarning axiri bashlan'ghuchta oquwatqan oghli mewlan xélilni tetil mezgilide mehellidiki bir a'iliwi qur'an kursigha bergen. Bu qilmish bu nöwet uning diniy esebiylik bilen eyiblinishige pakit qilin'ghan. Mana bu uchurning toghriliqini delilligen wahap hakim, xélil hashimning ayaliningmu we ötken yili aliy mektepni yéngi püttürgen oghli merdan xélilningmu ene shu qatnash kursi seweblik lagérda ikenlikini ashkarilidi.

Téléfon ziyaretlirimiz dawamida, melum bir idare xadimi xélil hashimning deslepte lagérgha xitay tili oqutquchiliqi üchün ekétilgenliki, arqidin shu lagérda atalmish oqutulush üchün tutup qélin'ghanliqini bayan qilghan idi. Xélil hashimni burundin bilidighan chet'eldiki tijaretchilerdin birining anglighanlirigha asasen bayan qilishiche, u misirgha barghanliqi üchün tutulghan, xitay tili bilgenliki üchün lagérda bir mezgil oqutquchiliqqa sélin'ghan. 

Radiyomizgha kelgen inkasta déyilishiche, u, lagérda özini tekshürüsh we mesile tapshurush dawamida 15 yil awwal oghlini qur'an kursigha bergenlikini iqrar qilghan. Emma u bu iqrarini lagérdin burunraq chiqishigha paydisi bolidu dep oylighan؛ biraq u buning, ayali we balisining tutulushi hem özining késilishige seweb bolushini oylap baqmighan. 

Xélil hashimning qazaqistandiki akisining oghli wahap hakim, taghisining yaramliq bir tijaretchi ikenlikini ilgiri sürse, shahitlar, xélil hashimning her xil sahede utuq qazan'ghan bir tijaretchi ikenlikini bayan qildi. 

Hörmetlik radi'o anglighuchilar, radiyomizgha kelgen mektupta, uning misirgha barghanliq we balisini qur'an kursida oqutqanliqi qilmishi heqqide konkrét uchur bérilgen bolsimu, uning üchinchi qilmishi, yeni milliy öchmenlik peyda qilish qilmishi heqqide melumat bérilmigen.

Toluq bet