Gérmaniyede "Bir awaz, bir qedem" resim körgezmisi pa'aliyiti ötküzüldi

Ixtiyariy muxbirimiz ekrem
2019-03-15
Élxet
Pikir
Share
Print
Gérmaniyede ötküzülgen "Bir awaz, bir qedem" resim körgezmisi pa'aliyitidin bir körünüsh. 2019-Yili 15-mart. Myunxén, gérmaniye.
Gérmaniyede ötküzülgen "Bir awaz, bir qedem" resim körgezmisi pa'aliyitidin bir körünüsh. 2019-Yili 15-mart. Myunxén, gérmaniye.
RFA/Ekrem

Bügün 15-mart küni gérmaniyening myunxén shehiridiki soda we sayahet merkizi bolghan meryem meydanida "Bir awaz, bir qedem" namidiki resim körgezmisi bashlandi.

Bu pa'aliyetning teshkilligüchisi, amérikadiki Uyghur siyasiy aktiplardin roshen abbas xanimning bildürüshiche, tünügün tunji körgezme washin'gtonda netijilik ötküzülgen. Bu resim körgezmisi pa'aliyiti yene dunyadiki 15 dölet, 33 sheherde oxshimighan waqitlarda ötküzülidiken. Bu pa'aliyetning gérmaniyening 4 chong shehiride arqa-arqidin élip bérilishi pilanlan'ghan iken.

Myunxén shehiridiki meryem meydanida bügün ötküzülgen resim körgezmisi pa'aliyitige dunya Uyghur qurultiyi wekilliridin bashqa yene myunxénda yashaydighan bir qisim Uyghur er-ayallar we balilar qatnashti. Pa'aliyette körgezme qilin'ghan resimler xitayning Uyghur diyarida tesis qilghan jaza lagérlirigha qamalghan ziyaliylar, diniy zatlar, her sahe Uyghur meshhur shexsliri, lagérda hayatidin ayrilghan kishiler we Uyghur diyarining jughrapiyilik hem siyasiy muhitlirini eks ettüridighan körünüshlerdin terkib tapqan idi.

Bu pa'aliyetke qatnashqan d u q fondining mudiri abdujélil emet ependining bildürüshiche, xitay hökümiti b d t da we xelq'ara metbu'atlarda bu lagérlarning jaza lagérliri emes, belki "Téxnikiliq terbiyilesh merkizi" ikenlikini tekrar ilgiri sürüwatqan bir chaghda dunyaning her yerliride resim körgezmisi pa'aliyiti arqiliq bu yalghanchiliqni pash qilish, xitayning epti-beshirisini échip tashlash, muhajirettiki Uyghur milliy herikitining éhtiyaji nuqtisidin zor ehmiyetke ige bir hadise hésablinidiken. 

Myunxén shehiridiki chonglar meshripining qazisi, jama'et erbabi ablimit tursun ependi neq meydanda ziyaritimizni qobul qilghanda "Bizning xitaygha qarshi bu kürishimiz peqet jaza lagérliri taqalghichila emes, belki wetinimiz sherqiy türkistan toluq azad bolghuche dawamlishidu," dégenlerni tilgha aldi. 

Pa'aliyet chüshtin kéyin sa'et 15:30 da bashlinip, 17:00 da axirlashti. Pa'aliyetchiler peqet resim körgezmisi ötküzüpla qalmay, belki yene xitayning jaza lagérliri siyasitige qarshi aldin hazirlan'ghan teshwiqat wereqilirini tarqatti hemde qiziqquchi yerlik ammigha Uyghur diyarining nöwettiki weziyitini chüshendürüp, xitay hakimiyitining jinayetlirini pash qildi.

Bu pa'aliyetke ishtirak qilghan "Gérmaniye Uyghur anilar birliki" ning mu'awin re'isi helime xanimmu pa'aliyet heqqide öz tesiratlirini bayan qilip ötti.

Igilishimizche, bügündin bashlap awstraliye, kanada we yawropaning köpligen merkiziy sheherliride "Bir awaz, bir qedem" namidiki resim körgezmisi pa'aliyetliri qanat yayidiken.

Toluq bet