Җәнвәдә өткүзүлидиған бирләшмә намайиш чақириқи муһаҗирәттики уйғурларни һәрикәткә өткүзди

Мәлум болғинидәк, б д т ирқий айримичилиққа қарши туруш комитети билән кишилик һоқуқ кеңиши 2018-йилиниң ахиридин тартип уйғур диярини көздин көчүрүш тәлипини изчил оттуриға қоюп кәлгән болсиму, лекин хитай һакимийити түрлүк шәртләрни қоюп, бу тәләпниң әмәлгә ешишиға тосқунлуқ қилип кәлгәниди. 2018-Йилидин 2021-йилиғичә болған 3 йил җәрянида б д т кишилик һоқуқ кеңиши җаза лагерлири вә уйғурлар һәққидә зор һәҗимлик бир доклат һазирлап чиқип өткән йилиниң ахирлириғичә елан қилмақчи болған. Бирақ хитайниң түрлүк тосқунлуқлири сәвәблик бүгүнгичә елан қилалмиған.

Д у қ рәиси долқун әйса әпәндиниң билдүрүшичә, хитай һакимийити б д т кишилик һоқуқ кеңишиниң комиссари мишел бачелет башчилиқидики бир һәйәтниң бу йил 5-айда уйғур диярини зиярәт қилишиға рухсәт қилиши бәдилигә мәзкур доклатниң елан қилинишини тосуп қалған. У, хитайниң ялған сәһнә һазирлап, б д т хадимлирини алдайдиғанлиқини илгири сүрүп, мишел бачелет хитай зияритини башлаштин илгирила бу доклатни елан қиливетиши лазимлиқини тәкитлиди.

Долқун әйса әпәнди б д т кишилик һоқуқ кеңишиниң бу доклатни елан қилишиниң зор әһмийәткә игә икәнликини, шуниңдәк йәнә 13-май күни җәнвәдики б д т бинасиниң алдида бундақ бир намайиш өткүзүлүшиниңму әһмийәткә игә икәнликини оттуриға қойди.

Дуня уйғур қурултийи диний ишлар комитети мудири турғунҗан алавуддин әпәнди бу қетимқи намайишни явропа дөләтлиридә паалийәт елип бериватқан 15 аммиви тәшкилат билән дуня уйғур қурултийиниң ортақ уюштурғанлиқини, явропадики аммиви тәшкилатларниң буниңға актип аваз қошуши керәкликини тәкитлиди.

Турғунҗан алавуддин әпәнди җәнвәдә өткүзүлидиған бу намайиш арқилиқ б д т кишилик һоқуқ кеңишиниң комиссари мишел бачелет ханимға уйғурларниң бәзи тәләплирини йәткүзидиғанлиқини, бу хил намайишларниң үнүминиң зор болидиғанлиқини оттуриға қойди.

Җәнвәдә өткүзүлидиған бирләшмә намайиш һәққидә зияритимизни қобул қилған шиветсарийә шәрқий түркистан җәмийитиниң рәиси әндили қарахан әпәнди намайишниң 13-май күни әтигән саәт 9 дин 12 гичә бирләшкән дөләтләр тәшкилатиниң җәнвәдики баш шитаби алдида өткүзүлидиғанлиқини баян қилди.

Дуня уйғур қурултийи рәһбәрлириниң билдүрүшичә, дуня уйғур қурултийиниң сәпәрвәрлики билән 2018-йили 4-айниң 27-күни белгийәниң пайтәхти бирюссел шәһиридики явропа иттипақи бинасиниң алдида ‚5 миң кишилик намайиш‛ өткүзүлгәниди. Қурултай рәһбәрлириниң билдүрүшичә, бу хәлқаралиқ чоң намайиш явропа парламентиниң 4-өктәбир күни уйғурлар вә җаза лагерлири тоғрисида 15 маддилиқ қарариниң қобул қилинишиға түрткә болған асаслиқ амилларниң бири икән.

Арқидин д у қ 2018-йили 11-айниң 6-күни б д т да башлинидиған хитайниң кишилик һоқуқ вәзийитини көздин көчүрүш йиғини мунасивити билән җәнвәдә муһаҗирәттики уйғурларниң иккинчи қетимлиқ хәлқаралиқ чоң намайишини өткүзгәниди.