Bishkektiki Uyghur jama'iti "Uyghur medeniyet küni" pa'aliyiti ötküzdi

Ixtiyariy muxbirimiz féruze
2019-07-16
Élxet
Pikir
Share
Print
"Uyghur xelqining medeniyet küni" pa'aliyitide Uyghurche ussul. 2019-Yili 14-iyul, bishkek.
"Uyghur xelqining medeniyet küni" pa'aliyitide Uyghurche ussul. 2019-Yili 14-iyul, bishkek.
RFA/Féruze

14-Iyul küni bishkek shehiridiki eng chong soda merkezlirining biride "Uyghur xelqining medeniyet küni" dep atalghan chong bir pa'aliyet ötti.

Mezkur pa'aliyet dawamida Uyghur naxsha-sazliri yangrap we milliy ussullar orundaldi.

Pa'aliyet bishkek shehiridiki "Aziya mol" soda merkizining teshebbusi hem qirghizistan xelq assambléyesi, yeni xelq qurultiyining terkibidiki "Ittipaq" jem'iyitining hemkarliqida uyushturuldi. Mezkur pa'aliyetke "Yultuz" Uyghur milliy ussul ansambili qatniship "Chine ussuli", "Texse ussuli" we yene bashqa ussullarni mahirliq bilen oynap tamashibinlarni hayajan'gha saldi. Ziyaritimizni qobul qilghan "Yultuz" ansambilining bedi'iy rehbiri gülnaz mexsutowa Uyghur diyaridiki éghir weziyet tüpeylidin, Uyghur sen'itini saqlap qélishta muhajirettiki Uyghurlarning mes'uliyiti bek éghirliqini tilgha élip, töwendikilerni körsetti.

Bügünki künlerde Uyghur élide Uyghur tili, medeniyiti, ma'aripi we sen'iti jiddiy xirislargha duch kelmekte. Köpligen tetqiqatchilar, jümlidin gherbtiki tetqiqatchilar Uyghur medeniyitige, jümlidin Uyghur ussulliri, naxsha-sazliri we edebiyatighimu alahide köngül bölmekte. Bu heqte ziyaritimizni qobul qilghan "Ittipaq" jem'iyitining ayallar kéngishining mu'awin re'isi tursun'ay islam xanim Uyghur sen'itining muhimliqini tekitlidi. U mundaq dédi؛

Mezkur pa'aliyet dawamida qirghizistanda tonulghan yash naxshichilar rishat sadiqof we erkin sadiqoflar shox Uyghurche naxshilarni orundap, tamashibinlarni ussulgha teklip qilishti. Qirghizistan ehli Uyghur naxshilirini bek yaqturup, her bir toy-tökünlerde Uyghur naxshiliri we usulliridin huzurlinidu. Qirghizistandiki Uyghur sen'et topliri ichide "Eziz diyar", "Meshrep", "Etles könglek we bashqilar" alahide közge tashlanmaqta. Ziyaritimizni qobul qilghan rishat sadiqof "Aziya mol" soda merkizide ötken pa'aliyetning ehmiyiting zor ikenliki, jümlidin Uyghur medeniyitini tonushturushta paydiliq rol oynighanliqini bildürdi. U: "Qirghizistan xelqi yene bir qétim Uyghur xelqining bay medeniyitige shahit boldi" dédi.

Igilinishiche, mezkur Uyghur medeniyet küni pa'aliyitige tamashibinlar we soda merkezning xadimliridin bolup 200 din oshuq kishi qatnashti. Ular Uyghur milliy ussulliri we naxshiliridin bek xushal bolushti. Qisqisi mezkur "Uyghur xelqining medeniyet küni" yuqiri keypiyatta ötti. Mezkur pa'aliyetke tamashibin qatarida qatnashqan shérzat ziyaritimizni qobul qilip, bu pa'aliyettin hemme kishi söyün'genlikini bildürdi.

Bu yil 7-aydin tartip bishkek shehiridiki "Aziya mol" soda merkizi "Dostluq öy" layihesini teshebbus qilghanidi. Mezkur layihening tarmiqida her yekshenbe küni merkezning ichide her bir millet öz medeniyitini namayan qilmaqta. Uyghurlar qirghizistan jumhuriyitining her saheliride zor töhpilerni qoshup, qirghizistan milletliri ichide alahide orunni igilep, birinchilardin bolup bu layihege qoshulushti.

Qirghizistandiki Uyghurlar asasliqi bishkek shehiri we uning etrapigha tarqalghan bolup, ular öz milliy medeniyiti, milliy kimlikini bir qeder yaxshi saqlap qalghan. Yéqinqi yillardin buyan Uyghur élide boluwatqan xitay hökümitining Uyghurlarni lagérlargha solap, ménge yuyush, Uyghur tilini we ma'aripini yoqitish qilmishliri bu jumhuriyettiki Uyghurlarningmu qattiq naraziliqigha uchrighan. Ular Uyghur medeniyiti, tili we örp-adetliri hem milliy sen'itini qoghdash we rawajlandurushqa alahide ehmiyet bermekte.

Toluq bet