Amérikadiki boston sheherlik hökümet aldida sherqiy türkistan bayriqi chiqirildi

Muxbirimiz méhriban
2020-11-12
Share
jumhuriyet-bayraq-bostun.jpg Sherqiy türkistanning ikki jumhuriyitini xatirilesh munasiwiti bilen amérika massachustés shtatining merkizi bostunda ötküzülgen "Sherqiy türkistan bayriqi" ni chiqirish murasimida xatire süret. 2020-Yili 12-noyabi.
Photo: RFA

2020-Yili 12-noyabir küni 20-esir Uyghur tarixida qurulghan ikki qétimliq sherqiy türkistan jumhuriyitining 87 yilliqi we 76 yilliq yilliq xatire künidur. Bu munasiwet bilen amérikadiki Uyghur teshkilatliri we pa'aliyetchilirining amérikadiki munasiwetlik hökümet organlirigha sun'ghan iltimasliri testiqlinip, nyo-yorktiki birleshken döletler teshkilatining binasi aldida, amérika paytexti washin'giton shehridiki xitay elchixanisi aldida we boston sheherlik hökümet binasi aldida sherqiy türkistanning ay-yultuzluq kök bayriqi chiqirildi.

Amérika massachustés shitatining merkizi bostunda chiqirilghan sherqiy türkistanning ay-yultuzluq kök bayriqi boston sheherlik hökümetning testiqlishi bilen sheherlik hökümet belgiligen xadimlar teripidin 12-noyabir chüshtin kéyin sa'et 1:30 da chiqirilghan.

Melum bolushiche bu 2019-yili 12-noyabir küni boston shehiride tunji qétim sherqiy türkistanning ay-yultuzluq kök bayriqini chiqirish murasimidin kéyin, bu sheherde ikkinchi qétim sherqiy türkistan bayriqining chiqirilishi iken.

Bostondiki massachustés téxnik uniwérsitétining tetqiqatchisi Uyghur alime maysem mutellipowa xanim öz nöwitide yene 2019-yili qurulghan "Boston Uyghur jem'iyiti" ning bashliqi. Maysem xanim 12-noyabir küni bayraq chiqirilghan neq meydandin radiyomiz ziyaritini qobul qildi.

Maysem xanim xarword uniwérsitétida oquwatqan munewwer abdulla bilen birlikte bundin bir yérim ay ilgirila boston sheherlik hökümet ishxanisigha sherqiy türkistanning ay-yultuzluq kök bayriqini boston sheherlik hökümet binasi aldida chiqirish iltimasini yollighan bolsimu, emma boston sheherlik hökümetning ruxset xétini 10-noyabir tapshuruwalghan iken.

U 12-noyabir küni chüshtin kéyin sa'et 1:30 da boston sheherlik hökümet belgiligen ikki neper xadimning ular tapshurup bergen sherqiy türkistanning ay-yultuzluq kök bayriqini xadigha chiqarghanliqini bildürdi.

Maysem xanim yene özi bilen birlikte bayraq chiqirish murasimigha qatnashqan Uyghurlarning shu taptiki hayajanliq keypiyatini bayan qildi.

U sözide boston sheherlik hökümetning testiqi bilen sherqiy türkistanning ay-yultuzluq kök bayriqining boston sheherlik hökümet binasi aldidiki xadida amérika dölet bayriqi, masachustis shitatining shitat bayriqi bilen birlikte 24 sa'et jewlan qilidighanliqini bildürdi.

Maysem xanim buningdin 200 nechche yil ilgiri amérikaning en'giliyege qarshi élip barghan musteqilliq urushining ot piltisi bolghan "Bostondiki chay töküsh weqesi" yüz bergen boston shehride, sherqiy türkistanning ay-yultuzluq kök bayriqining jewlan qilishi Uyghurlar üchün tarixiy ehmiyetlik bir kün, dep teriplidi.

12-Noyabir küni amérikadin bashqa yene kanada, awstraliye, gérmaniye, türkiye, yaponiye, shiwétsiye, norwégiye, gollandiye qatarliq döletlerdiki Uyghurlarmu her xil pa'aliyetlerni ötküzüp, jumhuriyet bayrimini xatiriligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet