Büyük birlik partiyesining yashlar qurultiyida Uyghur mesilisi anglitildi

Ixtiyariy muxbirimiz erkin tarim
2021-11-30
Share
Büyük birlik partiyesining yashlar qurultiyida Uyghur mesilisi anglitildi Büyük birlik partiyesi yashlar qurultiyida “Irqiy qirghinchiliq toxtitilsun” témisida imza toplash pa'aliyitidin körünüsh. 2021-Yili 28-noyabir, enqere, türkiye.
RFA/Erkin Tarim

28-Noyabir küni enqerede ötküzülgen büyük birlik partiyesi yashlar qurultiyigha türkiyening 81 wilayitidin zor sandiki yash wekiller qatnashti. Yighin'gha Uyghurlargha wakaliten türkiyening konya wilayitidin kelgen xitayning Uyghurlargha qaratqan qirghinchiliq siyasitini türk xelqige anglitish meqsiti bilen uzundin buyan türkiyening herqaysi sheher, wilayetlirige biwasite bérip, teshwiqat pa'aliyitini qanat yayduruwatqan Uyghur yashlirimu ishtirak qildi. Büyük birlik partiyesi burundin tartip Uyghur mesilisige köngül bölüp kéliwatqan siyasiy partiye bolup, bu qurultaydimu alahide orun bérildi. Güldüras alqish sadasi ichide bashlan'ghan murasimda aldi bilen büyük birlik partiyesi re'isi mustafa destichi ependi Uyghurlarning hazirqi éghir weziyitini “Irqiy qirghinchiliq” dep atidi. U, mundaq dédi: “Sherqiy türkistanliqlar bir esirdin buyan musteqilliq körüshi élip barmaqta. Ular bügünki künde éghir irqiy qirghinchiliq bilen assimilyatsiyege uchrimaqta. Xojaniyaz haji we eysa yüsüp aliptékin ependiler baturlarche élip barghan köreshni bügünlerge élip kelgen erkinlik we musteqilliq körüshini élip bériwatqan sherqiy türkistanliq qérindashlirimizning heqliq dewasini qollap quwwetleydighanliqimizni, her da'im ularning yénida bolidighanliqimizni yene bir qétim tekitlimekchimen”.

Büyük birlik partiyesining yashlar qurultiyida qurultay ehlige büyük birlik partiyesining türk we musulman dunyasi siyasiti anglitilghan höjjetlik filimlar körsitilgendin sirt, türkiyediki dangliq sen'etchiler konsért bergen. Birqanche ming kishi qatnashqan yighinda Uyghurlar qollirida kök bayraqni lepilditip, Uyghurlarni tonushturghandin sirt, “Irqiy qirghinchiliq toxtitilsun” témisida imza yighish pa'aliyiti ötküzgen.

Büyük birlik partiyesi yashlar qurultiyigha ishtirak qilghan Uyghur yashliri ay yultuzluq kök bayraqlirini lepildetmekte. 2021-Yili 28-noyabir, enqere, türkiye.
Büyük birlik partiyesi yashlar qurultiyigha ishtirak qilghan Uyghur yashliri ay yultuzluq kök bayraqlirini lepildetmekte. 2021-Yili 28-noyabir, enqere, türkiye.

Merkizi istanbulda turushluq sultan satuq bughraxan wexpisining konya shöbisining re'isi ablet udun ependi yighinning échilish murasimida büyük birlik partiyesining re'isi mustafa destichi ependi bilen yashlargha mes'ul re'isi samet baghchi ependining Uyghurlarning hazirqi éghir weziyiti heqqide toxtalghanliqini, buningdin intayin xursen bolghanliqini otturigha qoydi.

Ablet udun ependi qurultayda Uyghurlarning ikki qolida kök bayraqni lepilditip türkiyening 81 wilayitidin kelgen yashlargha sherqiy türkistan mesililirining anglitilghanliqini bayan qildi.

Türkiyede milletperwerlik idiyesini ilgiri süridighan büyük birlik partiyesi milletchi heriket partiyesidin ayrilip chiqqan muxsin yaziji'oghlu bashchiliqidiki 5 neper parlamént ezasi teripidin 1993-yili 1-ayning 24-küni qurulghan partiyedur. Mezkur partiyening qurghuchisi muhsin yaziji'oghlu 2009-yili ayropilan qazasida wapat bolghanidi. Uyghurlar qurultaygha kelgen yashlar bilen birlikte aldi bilen merhumning qebrisini ziyaret qilghan. Yighin zalighiche qollirida kök bayraq kötürgen halda yürüp Uyghurlarni tonushturghan. Ablet udun ependi bu heqte melumat berdi.

Lagér tutqunliri yéqinliridin medine nazimi xanim bashchiliqidiki bir guruppa Uyghurning qurultay jeryanida “Xitay lagérni taqiwetsun” témisida imza yighish pa'aliyiti élip barghanliqini, bu imzalarni birleshken döletlerge tapshurup béridighanliqini bayan qildi.

Büyük birlik partiyesi qurulghan kündin bashlap, türkiy milletlerning mesililirige, bolupmu Uyghur mesilisige alahide köngül bölüp kelmekte. Jaza lagérliri mesilisi chiqqandin kéyinmu türkiye parlaméntida we öz partiyeside köp qétim muxbirlarni kütüwélish yighini chaqirip, Uyghurlarning hazirqi éghir weziyitini otturigha qoyup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet