En'gliyediki xeyr-saxawet orgini qeyseridiki Uyghur oqughuchilirini tamaq bilen teminlesh programmisi yolgha qoydi

Enqeredin ixtiyariy muxbirimiz erkin tarim teyyarlidi
2023.08.15
Charity-Right-qeyseri-mektep-1.jpg “Charity Right” (xeyr-saxawet hoquqi) qeyseri Uyghur mektep oqughuchilirining tamiqini teminleshni bashlash murasimida oqughuchilar shatliqqa chömdi. 2023-Yili 12-awghust, qeyseri, türkiye.
RFA/Erkin Tarim

En'gliyediki “Charity Right” (xeyr-saxawet hoquqi) dep atalghan, dunyaning her qaysi jayliridiki acharchiliqta, qiyinchiliqta qalghan kishilerge yardem körsitish orgini qeyseridiki Uyghur oqughuchilargha yardem körsitip, ularning tamiqini teminlep bérishke bashlidi.

2014-2015-Yilliri tayland we malaysiya arqiliq türkiyege kelgen Uyghurlardin 2000 dek kishi türkiyening qeyseri wilayitige orunlashturulghan bolup, ular 8 yildin buyan shu jayda yashimaqta idi. Bu Uyghurlar balilirigha Uyghur tili, dini we Uyghur tarixini ögitish üchün 2018-yili “Uyghur mektipi” qurghan bolup, mezkur mektepte hazir 200 etrapida oqughuchi oqumaqta. Bu oqughuchilar arisida ata-aniliri wetinide we tayland türmiliride yétiwatqanlar bar bolup, bulargha üch waq tamaq bérish zor bir mesilige aylan'ghanidi. En'gliyediki “Charity Right” namliq xeyr-saxawet orgini ulargha yardem qolini uzitip 200 Uyghur oqughuchining üch waq tamiqini teminlep bérishke bashlighan.

Mezkur xeyr-saxawet orgini 8-ayning 12-küni qeyseridiki Uyghur mektipide murasim ötküzüp, mezkur mektepning ashxana eslihelirini yéngilap, mexsus ma'ashliq ashpez qobul qilip, Uyghur oqughuchilarning mekteptiki tamiqini teminlep bérishke bashlighanliqini jakarlighan.

Qeyseridiki Uyghur jama'etchiliki qeyseri Uyghur mektep mudiri abdughopur hajim(ongda) ning mudirliq xizmitidiki töhpisi üchün kök bayraq chüshürülgen xatire buyumi teqdim qildi. 2023-Yili 12-awghust, qeyseri, türkiye.
Qeyseridiki Uyghur jama'etchiliki qeyseri Uyghur mektep mudiri abdughopur hajim(ongda) ning mudirliq xizmitidiki töhpisi üchün kök bayraq chüshürülgen xatire buyumi teqdim qildi. 2023-Yili 12-awghust, qeyseri, türkiye.
RFA/Erkin Tarim

Biz bu heqte tepsiliy melumat igilesh üchün bu xeyr-saxawet orginining türkiyediki mes'uli xumargül yaqup bilen téléfon söhbiti élip barduq. U, bu heqte melumat bérip mundaq dédi: “2021-Yilidin bashlap istanbuldiki ‛oqu Uyghur bilik yurti‚ bilen ‛ay bilik qizlar mektipi‚ oqughuchilirini üch waq tamaq bilen teminlep kéliwatimiz. Shundaqla Uyghur oqughuchilarning yaxshi terbiyelinishi üchün söhbet we léksiye sözlesh pa'aliyetlirini uyushturuwatimiz. Biz bu yil oqughuchilargha tamaq yardimi bérish pa'aliyitimizni qeyserigimu kéngeyttuq. Mushu munasiwet bilen 8-ayning12-küni qeyseridiki Uyghur mektipide échilish murasimi ötküzduq. Mezkur pa'aliyetke texminen 200 din artuq adem qatnashti. Pa'aliyet nahayiti janliq, köngüllük we menilik ötti. Bu échilish murasimimizgha qeyseri ma'arip tetqiqat we hemkarliq jem'iyiti ezaliri, ‛ötkür‚ jem'iyiti wekilliri, ‛oqu Uyghur bilik yurti‚ mes'ulliri we ‛ay bilik qizlar mektipi‚ wekilliri, qeyseridiki Uyghur jama'et erbabliri, ata-anilar we oqughuchilar ishtirak qildi. Shundaqla qeyseridiki Uyghur a'ililirige we Uyghur oqughuchilargha maddiy jehettin yardem qilip kéliwatqan shexsler, ammiwi teshkilat mes'ulliri qatnashti. Bu murasimda Uyghur oqughuchilar serxil nomurlarni orunlash bilen birlikte ,kelgen méhman we wekiller tebrik sözlirini qildi”.

Échilish murasimida söz qilghan qeyseri Uyghur ma'arip tetqiqat we hemkarliq jem'iyiti re'isi, qeyseri Uyghur mektipining mudiri abdughopur hajim téléfon ziyaritimizni qobul qilip, qeyseri Uyghur mektipining omumiy ehwali toghrisida melumat bérip mundaq dédi: “Bu mektepning tonulghan ismi qeyseri Uyghur mektipi. Bu mektepte 2018-yilidin bashlap mektepni bashquridighan xadimlar, oqutquchilar, taziliqchi, ashpezlerdin bolup texminen 18-20 adem ishleydu. Bu oqughuchilargha penniy, diniy dersler we dölet mektepliride ögitiliwatqan dersler birlikte ötülüp kelmekte. Mektipimizde 4 yashtin 16 yashqiche oqughuchilar bar. Biz bu mektepte qeyserige yéngi kelgen Uyghurlarning balilirigha qur'ani-kerim, Uyghur ana tili, sherqiy türkistanning tarixi we jughrapiyesi ni'ögitish bilen birlikte, fizika we matématika derslirinimu ötüwatimiz. Bu oqughuchilarning köpi dölet mektepliride oquwatqan oqughuchilar bolup, bulargha ders tekrarlap béripmu kelgeniduq. Hazir mektipimizde 200 etrapida oqughuchimiz bar.

“Charity Right” (xeyr-saxawet hoquqi) qeyseri Uyghur mektep oqughuchilirining ashpizining ma'ashini teminleydighan boldi. 2023-Yili 12-awghust, qeyseri, türkiye.
“Charity Right” (xeyr-saxawet hoquqi) qeyseri Uyghur mektep oqughuchilirining ashpizining ma'ashini teminleydighan boldi. 2023-Yili 12-awghust, qeyseri, türkiye.
RFA/Erkin Tarim

Biz bu oqughuchilarning mektepke kélip-kétish, yémek-ichmek we depter qelem bilen teminlesh ishlirini qeyseridiki tonush-bilish, ammiwi teshkilatlar we shexslerning yardem qilishi bilen qilip kelgeniduq. Kichik mashinilarning ichige köp sanda balilarni chiqirip mektepke ekélip, japaliq xizmetler bilen mektep mangghanidi. 2020-Yili 18 kishi patidighan bir mashina élip balilarni uning bilen toshushqa bashliduq”.

Abdughopur ependi mezkur mektepte ata-anisi wetende we taylandta türmilerde yétiwatqan yétim balilarningmu oquwatqanliqini, burun oqughuchilargha tamaq teminleshte zor qiyinchiliqlargha duchar bolghanliqini, emdilikte bolsa en'gliyediki “Charity Right” xeyr-saxawet orginining mektipining ashxana eslihelirining hemmisini toluqlap, ashpezlerning ma'ashini bérip, Uyghur oqughuchilarning tamaq mesilisini teltöküs hel qilip bergenlikini bildürdi.

Xumargül yaqup bu organning Uyghur mekteplirige tamaq teminlep yardem qilishidiki meqsiti toghrisida melumat bérip mundaq dédi: “Bu organning Uyghurlargha yardem qilishidiki meqsiti bolsa, öz wetinidiki zulum we cheklimiler tüpeylidin chet'ellerde musapir bolup yashashqa mejbur bolghan, qiyinchiliqi bar Uyghur a'ililerge yardem bérish, shundaqla Uyghur perzentlirining kelgüsige meblegh sélish, Uyghur balilarning yaxshi obdan ozuqlinip, yaxshi oqup kelgüside özining milliy we diniy kimlikini tonughan yaramliq Uyghur ewladlirining yétiship chiqishigha töhpe qoshushtin ibaret. Biz mushu meqsette Uyghurlarning milliy, diniy kimlikini qoghdashni özining nishani qilghan Uyghurlarning tili, tarixi, medeniyiti, diniy ilimler we qur'ani-kerim ögitish ishliri bilen shughulliniwatqan mekteplerge tamaq yardimi bérishni qarar qilghan iduq”.

U, türkiyediki Uyghurlargha 2 xil yardem bériwatqanliqini bayan qildi. U, mundaq dédi: “Bizning hazir türkiyede ikki xil yardem programmimiz dawam qiliwatidu. Uning biri iqtisadiy jehettin qiyinchiliqi bar Uyghur a'ililerge yardem bérish programmisi, yene biri bolsa Uyghur oqughuchilarni mektep tamiqi bilen teminlesh programmisidur. Biz 3 yildin buyan türkiye istanbulda yashawatqan iqtisadiy qiyinchiliqi bar 200 din artuq Uyghur a'ilisige her ay maddiy jehettin yardem bériwatimiz”.

Istanbuldiki Uyghur ilim-meripet wexpisi re'isi hebibulla küseni ependi özlirining 2 yildin buyan bu organdin yardem éliwatqanliqini, Uyghur perzentlirining yaxshi ozuqlinip, yaxshi oqushi üchün zor paydisi boluwatqanliqini tekitlidi.

Xumargül yaqup xanim “Charity Right” namliq xeyr-saxawet orginining mektep tamiqi teminlep bériwatqan döletler toghrisida melumat bérip mundaq dédi: “En'gliye ‛Charity Right‚ xeyr-saxawet orgini 2016-yili en'gliyede yashawatqan musulmanlar teripidin qurulghan yémek-ichmek yardem xizmetliri bilen shughullinidighan xelq'araliq bir organdur. Hazir sudan, yemen, pakistan, afghanistan, bangladish, éfiyopiye, maladi we türkiye qatarliq 8 dölette mekteplerdiki oqughuchilarni tamaq bilen teminlep ularning ma'arip xizmetlirini qollawatidu”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.