Bishkekte Uyghur urush qehrimanlirigha béghishlan'ghan jumhuriyetlik chélishish musabiqisi ötküzüldi

Ixtiyariy muxbirimiz féruze
2019-05-15
Élxet
Pikir
Share
Print
Uyghur urush qehrimanlirigha béghishlan'ghan jumhuriyetlik chélishish musabiqisidin körünüsh. 2019-Yili 12-may, bishkek.
Uyghur urush qehrimanlirigha béghishlan'ghan jumhuriyetlik chélishish musabiqisidin körünüsh. 2019-Yili 12-may, bishkek.
RFA/Féruze

12-May küni qirghizistan paytexti bishkekte Uyghur urush qehrimanlirigha béghishlan'ghan jumhuriyetlik chélishish musabiqisi ötküzüldi.

Bu qétimliq musabiqe ikkinchi dunya urushi mezgilide "Sowét ittipaqining qehrimani" dégen namgha érishken Uyghur jengchilerdin sülhi lutpullayéf, dadash babajanuf we mesim yaqupof qatarliqlarning namigha atap ötküzüldi.

Mezkur musabiqe qirghizistan "Sambo" fédératsiyesi we qirghizistan Uyghurliri "Ittipaq" jem'iyitining hemkarliqida ötküzüldi, Uyghur tijaretchiler iqtisadiy jehettin qollap-quwwetlidi.

Bu qétimliq chélishish musabiqisige qirghizistanning chu, osh, jalal-abad, narin we issiqköl wilayetliridin kelgen 130 din artuq chélishchi qatnashti. Musabiqe dawamida 60 kilogramdin 80 kilogramghiche éghirliqtiki chélishchilar neq meydanda öz maharetlirini körsitishti.

Mezkur pa'aliyetning teshebbuschisi, sambo fédératsiyesining re'isi nurlan tokonoyéf ziyaritimizni qobul qilip, özining Uyghur urush qehrimanliri toghrisida tunji qétim rusiyening nowosibirsk shehiride Uyghurlarning "Weten" jem'iyiti teripidin ötküzülgen putbol musabiqiside anglighanliqini tilgha aldi. U nowosirks shehiridiki putbol musabiqisining xemit toxtiyéfning bashchiliqida ötküzülgenlikini, özining u yerdiki Uyghur dostliri bilen yéqin alaqisi bolghachqa, qirghizistandimu "Sambo", yeni chélishish boyiche musabiqilerni uyushturushqa bashlighanliqini tekitlep ötti.

U yene özining Uyghur wetendashlirining jasaritidin pexirlinidighanliqini bildürdi. Shundaqla fashizimgha qarshi urushta xizmet körsetken Uyghur urush qehrimanlirining namini untumasliq üchün tötinchi qétim bu pa'aliyetni ötküzüwatqanliqini éytti.

Nurlan tokonoyéf yene bu qétimliq musabiqining tolimu süpetlik ötkenlikini tilgha élip, kélechekte Uyghur qehrimanlargha atalghan bu tiptiki musabiqilerni xelq'araliq derijide ötküzüsh pilani barliqini ilgiri sürdi.

Mezkur tenheriket pa'aliyitige sambo fédératsiyesining re'isi nurlan tokonoyéftin bashqa yene qirghizistan dölet mudapiye ministirliqining pensiyonéri malik batalof, qirghizistan Uyghurliri "Ittipaq" jem'iyitining mu'awin re'isi isma'il tahirof, sabiq sowétlar ittipaqi dewridiki tenheriket mahirliridin nurmemet abduraxmanof, tupik andréy, békténazar qilichéf qatarliq kishilermu qatnashti

Radiyomiz ziyaritini qobul qilghan qirghizistan dölet mudapi'e ministirliqining herbiy septin chékingen pénsiyonéri malik batalof bu qétimqi musabiqe arqiliq fashizimgha qarshi urushta xizmet körsetken Uyghur qehrimanlarning yadlan'ghanliqini we hazirqi yashlargha bir meydan wetenperwerlik terbiyesining bérilgenlikini tilgha aldi. U yene bu pa'aliyet ikkinchi dunya urushigha qatnashqan we xizmet körsetken jengchilerge hörmet bildürüsh arqiliq bügün qirghizistanda yashawatqan her millet xelqini ittipaqlashturush we birlikni saqlash rolini oynimaqta.

Sabiq sowétlar ittipaqi dewridiki tenheriket mahirliridin tupik andréy ependimu ziyaritimizni qobul qilip, bu qétimqi pa'aliyetni körgendin kéyinki tesiratlirini bayan qilip ötti. U egerde bezi bir sewebler tüpeyli qirghizistan Uyghurlirining "Ittipaq" jem'iyiti bu pa'aliyetke qatnishalmay qalghan teqdirdimu, qirghizistan jumhuriyitining "Sambo fédératsiyesi" Uyghur urush qehrimanlirini öz ichige alghan barliq jengchilerning namigha béghishlan'ghan bu türdiki musabiqilerni her yili uyushturup turidighanliqini tekitlidi.

Toluq bet