2 Милйон хитай компартийә әзасиниң ғәрб дөләтлиригә йәрләштүрүлүши дуня үчүн тәһдит дәп қаралмақта

Мухбиримиз меһрибан
2020-12-16
Share
2 Милйон хитай компартийә әзасиниң ғәрб дөләтлиригә йәрләштүрүлүши дуня үчүн тәһдит дәп қаралмақта Компютердики иккилик рәқәмниң үстигә чүшүрүлгән хитай дөләт хәритиси. 2014-Йили 2-январ, сингапор.
REUTERS

13-Декабир йәкшәнбә күнидин башлап австралийә, әнгилийә қатарлиқ ғәрп дөләтлиридики мустәқил таратқулар 2 милйонға йеқин хитай компартийәси әзасниң ғәрп демократик дөләтлирини мәркәз қилған һалда дуняниң һәрқайси җайлиридики даңлиқ университетлар, тәтқиқат орунлири вә ширкәтләргә һәр хил салаһийәтләрдә орунлишивалғанлиқини хәвәр қилди.

Мәлум болушичә, хитай компартийәсиниң әзалири америка, әнглийә, германийә, шиветсийә, австралийә қатарлиқ дөләтләрниң хитайдики әлчиханилири вә консулханилириғичә сиңип киргән. Шуниңдәк хитай компартийәси әзалириниң дуняниң һәр қайси җайлиридики университет вә хәлқаралиқ чоң ширкәтләрдә қурған партийә ячейкилириниң сани 79 миңға йәткән икән.

Хитай компартийәси әзалириниң дуняниң җай-җайлириға тарқилиши вә буниң ғәрб дөләтлиригә елип келиватқан тәһдитлири һәққидә бирнәччә күндин буян ғәрб таратқулирида бәс-бәстә хәвәр анализлири берилмәктә.

Бу хил анализларда йеқинқи йилларда ғәрб дөләтлириниң хитайни демократийәләштүрүш мәқситидә йолға қойған сиясий-иқтисадий етибар бериш тәдбирлириниң әксичә үнүм бәргәнлики оттуриға қоюлған. Анализларда хитай компартийәси әзалириниң даңлиқ университетлар тәтқиқат орунлириға, ширкәтләргә һәр хил салаһийәтләрдә орунлишивалғанлиқи тилға елинған. Униңда йәнә хитай һөкүмитиниң чәт әлләргә әвәткән компартийә әзалириниң һәтта ғәрп демократик дөләтлириниң демократик қиммәт қаршлириға тосқунлуқ қиливатқанлиқи вә уни өзгәртишкә уруниватқанлиқи, һәтта уларниң һәрқайсий дөләтләр һөкүмәтлириниң сиясий қатламлириғичә сиңип кириштәк дәриҗигә йетип берип, тәһдит пәйда қилғанлиқи илгири сүрүлгән.

Голландийәдики сиясий паалийәтчи асийә уйғур ханим радийомиз зияритини қобул қилип, бу санлиқ мәлуматниң ашкарилиниш җәряни һәққидә өзи игилигән әһвалларни аңлатти.

Асийә ханимниң билдүрүшичә, бир қанчә күндин буян хәлқара таратқуларда җиддий муназирә темиси болуватқан 1милйон 950 миң нәпәр хитай компартийәси әзасиниң тизимлики әң дәсләп, йәни бу йил 8-ай мәзгилидә ашкариланған. Бу һәқтә “ипәк” намлиқ хәлқаралиқ тәшкилат мәхсус тәкшүрүш елип барған икән.

Асийә ханим йәнә тәкшүрүш арқилиқ хитай компартийәси әзалириниң ғәрб демократик дөләтлиридики һәрқайсий университетларға, тәтқиқат орунлириға, һсбч, боең, ролс-ройс, физер, астира, зеника, җагуар, волкесвагендәк чоң банка вә хәлқара ширкәтләргә орунлишивалғанлиқи ашкарилинип, пүткүл дуня бойичә вәһимә вә тәһдит пәйда қилғанлиқини билдүрди.

Америка нйо-йорк шәһәр университениң сиясий пәнләр профессори, хитай вәзийити анализчиси шямең әпәндиму зиярәтимизни қобул қилип, бу һәқтә өз қарашлирини ортақлашти.

Шямең әпәнди алди билән хитай компартийәси әзалириниң ғәрб демократик дөләтлиригә тарқилиш әһвали һәққидә тохталди.

У америка қатарлиқ ғәрб дөләтлиридики хитай әлчиханилири вә консулханилиридики дипломатик хадимларниң һәммисиниң дегүдәк хитай компартийәсиниң әзалири икәнликини билдүрди. У хитай һөкүмитиниң чәт әлләрдики даңлиқ тәтқиқат орунлириға әвәткән әвәткән юқири дәриҗилик тәтқиқатчиларниң, дөләт хираҗити билән чәт әлләрдики университетиларға билим ашуруш үчүн әвәткән тәтқиқатчи хадимларниң мутләқ көп қисминиң хитайдики вәзийәт еһтияҗи сәвәбидин хитай һөкүмитиниң ишәнчисигә игә болуш йолида хитай компартийәсигә әза болған кишиләр икәнликини баян қилди.

Шя мең әпәнди йәнә хитай компартийәсигә әза болған бу хадимларниң хитайға қайтиши муқәррәр болғини үчүн, уларниң һәр вақит хитай һөкүмитиниң бесими вә тәһдитигә дуч келидиғанлиқи вә хитай һөкүмити тапшурған вәзипиләрни орунлашқа мәҗбур икәнликини билдүрди.

Асийә ханим хитай коммунист һөкүмитиниң чәт әлләрдики даңлиқ университетлар вә мустәқил таратқулар һәмдә башқа муһим орунларға устилиқ билән орунлаштурған компартийә әзалири арқилиқ хитай һөкүмитиниң әң қаттиқ бастурушиға учраватқан уйғурлар, тибәтләр вә хитай демократлириниң паалийәтлиригә, шундақла хәлқара кишилик һоқуқ тәшкилатлириниң паалийәтлиригә, һәтта ғәрп дөләтлиридики һөкүмәтләрниң хизмәтлиригә қәдәр тосқунлуқ қиливатқанлиқини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт