Доктор дилнур рәйһан "фирансийә 24" телевизийә қанилида хитай тәшвиқатчиси чүн йәнли билән йүзму-йүз муназириләшкән

Ихтиярий мухбиримиз азиғ
2021-07-06
Share
Доктор дилнур рәйһан Фирансийәниң даңлиқ хәлқаралиқ қанили "фирансийә 24" хитай компартийиси қурулғанлиқиниң 100-йиллиқ мунасивити билән орунлаштурған программисида явропа уйғур институтиниң мәсули доктор дилнур рәйһан билән хитай-фирансийә сода кабинетиниң мудири чүн йәнли. 2021-Йили 1-июл. (Телевизордин тартилған сүрәт)
RFA/Azigh

1-Июл күни фирансийәниң даңлиқ хәлқаралиқ қанили "фирансийә 24" хитай компартийәси қурулғанлиқиниң 100-йиллиқ мунасивити билән бир мәйдан телевизийә муназирә пирограммиси орунлаштурған.

Мәзкур пирограмма нәқ мәйдандин тарқитилған болуп, программиға явропа уйғур инсититутиниң мәсули доктур дилнур рәйһан ханим билән хитай-фирансийә сода кабинетиниң мудири чүн йәнли тәклип билән қатнашқан.

Мәзкур программида хитай компартийәсиниң сиясий тәшвиқатлирини тәкрарлиған чүн йәнли билән доктур дилнур рәйһан оттурсида бир мәйдан кәскин муназирә болған.

Доктур дилнур рәйһан ханим бу һәқтә зияритимизни қобул қилип, мәзкур пирограмма һәққидә тәпсилий мәлумат бәрди.

Мәзкур пирограмминиң муназирә темиси асасий җәһәттин хитайниң уйғурларға йүргүзүватқан қирғинчилиқ сияситигә мәркәзләшкән болуп, хитай-фирансийә сода кабинетиниң мудири чүн йәнли доктур дилнур рәйһанниң баянлириға хитай компартийәсиниң сиясий тәшвиқат метуди билән рәдийә биришкә урунған. Чүн йәнли программа җәрянида "уйғур қирғинчилиқи мәсилисини амирика башчилиқидики ғәрб дөләтлири ойдуруп чиққан" дәп җар салған.

Доктур дилнур рәйһан ханимниң күчлүк рәдийәлиригә чидимиған чүн йәнли риясәтчиниң тосқунлиқиға қаримай программиға қатнашқан мутәхәсисләрниң сөзини ушшуқлуқ билән қайта-қайта тартивелишқа урунған.

Мәзкур пирограммини нәқ мәйдандин көргән көрүрмәнләр хитайниң сиясий тәшвиқатлирини тәкрарлиған вә телервизийәдики нәқ мәйдан муназирә әхлақиға писәнт қилмиған чүн йәнлидин бәкму бизар болған. Болупму "уйғур қирғинчилиқи" мәсилиси демократик дөләтләр тәрипидин тушму-туштин етирап қилиниватқан бүгүнкидәк күндә, фирансийәниң даңлиқ ахбаратида хитай һөкүмити билән қоюқ алақиси бар кишиләрни телевизийәгә тәклип қилип хитайниң қирғинчилиқ сияситини ақлишиға йол қоюлуши нурғун бәс-муназириләргә сәвәп болған.

Дилнур рәйһан ханимниң ейтишичә, уйғур қирғинчилиқи мәсилисигә охшаш муназирә тәләп қилмайдиған бир мәсилидә "фирансийә 24" қанилиниң хитайниң сиясий тәшвиқатини тәкрарлайдиған чүн йәлидәк кишиләргә сөз қилиш пурсити беришиму нурғун кишиләрниң әйиблишигә учриған.

Фирансийә турушлуқ абдувәли әпәндим зияритимизни қубул қилип, бу қетимлиқ муназирә пирограммисиниң қозғиған тәсири һәққидә тәпсилий тохталди.

Хитайниң уйғурларға йүргүзиватқан қирғинчилиқ сиясити көплигән демократик дөләтләр вә кишилик һоқуқ қурулушлири тәрипидин етирап қилишқа еришмәктә. Көзәткүчиләрниң қаришичә, бу хил сиясий вәзийәттә хитайниң ғәрб ахбарат вастилирида өзиниң сиясий тәшвиқатлирини елип бериши бурунқидәк оңайға тохтимайдикән, хитайниң қирғинчилиқ сияситини ақлимақчи болғанлар техиму қаттиқ әйиблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт