Shimaliy amérikidiki musulmanlar “Ilahi destur qur'an kerim” sheripige yighildi

“Ilahi destur qur'ani kerim” sheripige béghishlan'ghan shimaliy amérika islam chembirikining 41-nöwetlik yilliq yighilishi, 28-maydin 30-mayghiche mariland shtatining baltimor shehiride intayin ehmiyetlik ötküzüldi.

Yighilish paytext washin'gton'gha qoshna baltimor shehirining körgezme zalida 3 kün intayin mol mezmunluq dawam qildi. Shimaliy amérika qit'esi islam chembiriki bolsa amérikidiki musulmanlar jem'iyetliri we ijtima'iy teshkilatlirining birliki. ICNA Ning 2016‏-yilliq musulmanlar yighilishida asasliq qur'anni öginish we uningda körsitilgen yolda heqiqiy turushning yolliri heqqide tebligh, wez-nesihetlerni asas qildi. 20 Mingdin köpligen er ayal qéri yash we balilar birlikte namaz oqudi.

Baltimorda méhman saraylar, barliq mulazimet saheliri, musulmanlarni qarshi élishqa puxta teyyarliq qilghan, musulmanlarning pa'aliyetke waqtida, köngüllük qatnishishi üchün dostane maslashqan shara'itlar yaritilghan. Bu pa'aliyet musulmanlarghila emes, bashqilarghimu, islamgha qiziqquchilarghimu keng ishik achqan bolup, pa'aliyette bashqa dindikiler we her qit'e, her jaylardin, her irq we milletlerdin kishiler jem boldi, amérikida yashawatqan bir qisim Uyghurlarmu pa'aliyetke ishtirak qildi.

Shimaliy amérikidiki musulmanlarning bu büyük yighilishni muweppeqiyetlik orunlashturghan iknaning bash katipi muhemmet rehman bu qétimliq yighilishning dunyada bolupmu amérikida musulmanlargha qarshi selbiy inkaslar meydan'gha kéliwatqan shundaqla, amérika qoshma shtatlirida prézidént saylimi dawam qiliwatqan bir mezgilge toghra kélishining ehmiyiti zor ikenlikini tonushturdi.

U mundaq dédi: “Shimaliy amérika islam chembirikining 41-nöwetlik bu büyük yighilishi ‛ilahi destur qur'an‚ shenige béghishlandi, qur'ani kerim heqqide yüzligen alim we örnek ustazlar ehmiyetlik nutuqlar berdi, alimlirimizdin nurghun so'allar soraldi. Texminimche qatnashquchilar 23 mingdin 25 mingghiche baridu. 3 Künlük pa'aliyetlirimiz bekmu tertiplik, ehmiyetlik ötti. Körgininglardek a'ililer, yashlar hetta balilar üchünmu alahide pa'aliyet sorunlirini hazirliduq. Nechche yüzligen musulman pida'iylar pa'aliyet üchün xalis xizmet qildi. Biz bu pa'aliyet arqiliq musulmanlarning öz imani étiqadigha ilham bérish, islam jem'iyetlirimiz yüzliniwatqan bezi mesililerning hel qilish yollirini tépip hel qilish, yene bir tereptin bashqilarghimu islam dinimizni tonutushni, heqiqiy musulmanlarni chüshendürüshni meqset qilip pa'aliyetler élip barduq. Ishtirakchilar üchün meschit meydani, halal yémek-ichmekler bilen ghizalinish meydani we mexsus chong bazar, balilar üchün yesli we baghche programmilirini orunlashturduq, masha'allah pa'aliyitimiz yildin-yilgha yaxshi boluwatidu, amérikida musulmanlar jem'iyitimiz barghanche köpiyiwatidu, téximu köpligen kishiler awaz qoshuwatidu, insha'alla bu yighilishimizdin hemme menpe'et tapqusi. Allah razi bolghusi insha'alla.”

Tertiplik, mol mezmunluq, ehmiyetlik, intayin illiq a'iliwi keypiyatta dawam qilghan pa'aliyette közge körün'gen örnek diniy ustazlardin yasir ghazi, hamza andiras, noman alixan, omar sulayman, abduraxman xan qatarliqlarning qur'an kerim we uning xasiyiti heqqidiki léksiye dersliri orunlashturulghan meydanlar liq toldi.

Qur'an oqush we yadlash hemde so'allargha jawab bérish musabiqilirige hetta 4, 5 yashtiki balilarmu qatnashti.

Üch kün uda, chong bazar, yermenkiler échildi. 500Din artuq dukan we botkilarda türlük halal buyumlar, islam dinigha a'it kitablar, kiyim-kéchek, zibuzinnetler közni qamashturatti.

Pa'aliyet jeryanida balilarni eng qiziqturghini bolsa, bala we yash ösmürlerning yash perqige asasen hazirlan'ghan hedisler, peyghemberler heqqide hékaye éytish, karton filimlarni körsitish meydanliri we oyun oynash meydanliri boldi, ishtirakchilarning ghizalinishi üchün, ibadet qilishi üchün ayrim‏-ayrim sorunlar hazirlan'ghan, tébbiy yardem we her türlük yardemge mohtajlarning éhtiyajidin chiqish üchün, her türlük kesiplerge ige pida'iylar toxtimay xizmet qildi, bu musulmanlar her irq, her tilda sözleshsimu oxshash salamlishatti, yüzide oxshash tebessum jilwe qilatti.

Musulmanlar üchün bu diniy we ijtima'iy yighilish musulmanlarning chong bir a'ilisige oxshap qaldi, alim-ölimalarning teblighliri, qur'an tepsirliri muhakimilirige wez nesihetlirige qatnashqanlardin shu meydandila shahadet éytip musulman bolghanlirimu boldi, köp sanda jama'etning qatnishishi bilen bezi musulmanlarning nikahlinish murasimliri uyushturuldi.

3 Künlük pa'aliyettiki eng yarqin nuqtilarning biri, süriye musapirlirigha we yardemge mohtaj kishilerge i'ane toplash we ulargha rohiy jehettin medet bérishni meqset qilghan musulman artislarning ijrasidiki qur'an we allah küylen'gen mexsus xeyri saxawet kéchiliki bolup, besh ming kishilik zal liq toldi. Bir yérim sa'et dawam qilghan bu alahide kéchiliktin hemme ortaq tesirlendi we hayajanlandi.

Amérika musulmanlirining ijtima'iy hayatida muhim kün tertipke kirgen iknaning ötken yilliq muhemmet peyghember eleyhissalam hörmitige béghishlan'ghan -40 nöwetlik yilliq yighilishimu del mushu meydanda ötküzülgen idi.

Bu nöwetlik pa'aliyet 30-may zor ümid we tilekler bilen ghelibilik axirlashti, ishtirakchilar kéler yili ramizan kirishning harpisida yeni 14-apréldin 16-aprélghiche 42-nöwetlik yilliq yighilishta oxshash jayda uchrishishqa wediliship xoshlashti.