Amérikidiki Uyghur jama'iti üch qétim kolléktip iptarliq pa'aliyiti ötküzdi

Muxbirimiz qutlan
2017.06.19
Share on WhatsApp
Share on WhatsApp
iptar-elshat-hesen-ilshat-hesen-305.jpg Uyghur jama'iti yighilip ötküzgen iptarda, amérika Uyghur birleshmisining re'isi ilshat hesen ependi söz qilmaqta. 2017-Yili 16-iyul.
Photo: RFA

Uyghur xelqi 2017-yilliq ramizanni xitayning eng qattiq diniy cheklimisi astida kütüwaldi.

Muhajirettiki Uyghur jama'iti, shu jümlidin amérikidiki Uyghur jama'iti ramizan kirgendin buyan 3 qétim kolléktip iptarliq ötküzüp, hör dunyadiki Uyghurlarning barghanséri küchiyiwatqan jama'etchilik rohini, diniy we milliy kimlikini namayan qildi.

Ötken jüme, yeni 6-ayning 16-küni amérika Uyghur birleshmisining uyushturushi bilen paytext washin'gton etrapidiki Uyghur jama'iti yene bir qétimliq kolléktip iptarliq pa'aliyiti ötküzdi.

Iptarliq bashlinip, éghiz échilghandin kéyin, amérika Uyghur birleshmisining re'isi ilshat hesen ependi söz qildi. U sözide “Uyghur xelqi xitayning qattiq diniy cheklimisi astida bu yilliq ramizanni dawamlashturuwatqan bir shara'itta, chet'eldiki Uyghurlarning bir jaygha jem bolup kolléktip iptarliq pa'aliyiti ötküzüshi muhim ehmiyetke ige” dédi.

Ilshat ependi, bir yilda bir qétim kélidighan ramizan éyida jama'etning bir jaygha jem bolup kolléktip iptarliq ötküzüshining diniy jehettinla emes, belki muhajirettiki Uyghur perzentlirige Uyghurlarning diniy we milliy en'enilirini ögitishte we ularning jama'etchilik éngini östürüshte sel qarashqa bolmaydighan roli barliqini tekitlidi.

Ilshat ependi sözining axirida ramizan axirlishishi bilen jama'etning yene bir qétim jem bolup, bu yilliq roza héyt namizini birlikte oquydighanliqini uqturdi.

Iptarning axirida jama'et diniy bilim ademliridin ablikim idrisning riyasetchilikide du'agha qol kötürdi. Weten we milletning bügüni hem kélechiki shundaqla muhajirettiki Uyghur jama'itining ittipaqliqi üchün oqulghan tesirlik du'a jama'etning qelbini lerzige saldi.

Iptarliq pa'aliyitige qatnashqan kishilerdin dunya Uyghur qurultiyining sabiq bash katipi nurmuhemmet musabay ziyaritimizni qobul qildi. U, “Hazirqi pewqul'adde shara'itta muhajirettiki Uyghur jama'itining köprek jem bolup, iptarliq we koléktip ibadet pa'aliyetlirini ötküzüshi meyli milliy ittipaqliq, diniy eqide yaki perzentlerge bérilidighan terbiye nuqtisidin bolsun, intayin zörür” dédi.

Axirida söz qilghan ablikim idris ependi “Nöwette wetendiki qiyin shara'it bilen sélishturma qilghanda, erkin dunyadiki Uyghur jama'itining kolléktip iptar, kolléktip du'a we kolléktip ibadet qilishi Uyghurlarning diniy étiqadi hem milliy rohigha küch-quwwet béghishlaydu” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet