Aqsudiki yaghliq cheklesh herikiti déhqanlarning qarshiliqida sugha chilashti

Uyghur ayallirining diniy yosunda kiyinishige qaritilghan cheklesh aqsu tewesidimu qattiq yürgüzülgen. Halbuki, da'irilerning shu xildiki cheklesh herikiti aqsu déhqanlirining qattiq qarshiliqida sugha chilashqan.

Égilishimizche, aqsuning beshtügmen yézisidiki déhqanlar kadirlarning yaghliq échish herikitige qattiq qarshiliq körsetkechke, hazir kadirlar yaghliq chigken ayallargha anche gep qilalmaydighan bolup qalghan.

Xitay hökümiti Uyghurlar olturaqlashqan barliq yéza-bazar, kentlergiche mexsus tesis qilghan birliksep ishxanisi arqiliq Uyghur ayallirining béshidiki yaghliqqa hujum qilish herikitini her xil wasitiler bilen dawam qilmaqta. Emma, bu heriket aqsu tewesidiki yéza-kent déhqanliri, xitay hökümitige ishleydighan ishchi-xizmetchiler, yéza kadirliri we imamlardin tartip her sahediki Uyghurlarning qattiq qarshiliqigha uchridi.

Özini ashkarilashni xalimighan bir déhqanning bildürüshiche, bultur 6-ayda atalmish teshwiqat xizmitige mes'ul birlik sep ishxanisining xadimliri aqsu sheherlik besh tügmen yézisining yéza bazirida tirikchilik qiliwatqan we nerse kérek sétiwélishqa chiqqan ayallarning hemmisini yaghliq bahaniside ikki qétim yighiwélish ornigha élip ketken we ularni 400 yüendin jerimane töleshke mejburlighan. Yighiwélin'ghanlar ichide oqutquchilar, yéza kadirlirining ayalliri imam we kent bashliqlirining ayallirimu bar iken. Ular déhqanlar bilen birlikte yaghliqqa bolghan hujumgha qarshiliq bildürgen.

Ziyaritimizni qobul qilghan déhqan mundaq deydu: ikki bazar ayallarni toplap tutqanliqi éniq. Uning ichide yéza-kent bashliqliri we yéza kadirlirining ayallirimu bar iken…qarshiliq körsitish arqiliq hazir yaghliq chigidighanlargha anche gep qilalmaydu.

Ziyaritimizni qobul qilghan yene bir déhqan ayal mundaq deydu: men u chaghda chéchimni chüshürüwetken idim, béshimgha dora qiliwatqan idim, ular méni yaghliqimni éliwétishke mejburlap bek aware qildi. Kéyin yézidiki imamlardin déhqanlarghiche hemme adem teng qarshiliq körsetkendin béri, hazir undaq bek bésim qilmaydighan boldi.

Özini ashkarilashni xalimighan déhqanning bildürüshiche, besh tügmen yézisidiki her xil qatlamdiki Uyghurlar we déhqanlarning birliship naraziliq körsitishi bilen, bu naraziliq aqsu tewesi boyiche kücheygen, netijide xitay hökümiti meqsitige yételmeydighanliqini hés qilip, hujum qilish herikitini suslashturghan. Emma, oran'ghan ayallarning yüzini échiwétish herikiti keng kölemde dawam qilmaqta.

Biz aqsuning besh tügmen yézisi birliksep ishxanisining mes'ul xadimigha téléfon qilip, ehwal igiliduq.

U, yézidiki yaghliq artqan ayallarni ikki qétim yighiwélip 400 yüendin jerimane töletkenlikini inkar qildi. Emma, u özlirining aktipliq bilen yürgüzüwatqan xizmetlirini yoshurup olturmidi.