Kent sékrétari: toxti hamutning gunahi dubeyni ziyaret qilish we gumanliq diniy zatqa yéqin yolash

Qeshqer peyziwatning barin yéza birinchi kent sékrétari, bu yil kirgendin buyan öz kentidin nöwette tutup turulup nahiyede terbiye körüwatqan 18 kishining herbirining tutulush sewebi heqqide melumat berdi.

Melum bolushiche, tutqunlardin biri toxti hamut dégen kishi bolup, u bultur yil axirida a'ilisi bilen dubeyni ziyaret qilip kelgenliki we qeshqerde siyasiy jehettin gumanliq bir imamda telim alghanliqi üchün tutulghan. Sékrétar, toxti hamutning tutulushigha qeshqer tuwaq baziridiki sadiq qarimda telim alghanliqining seweb bolghanliqini éniq bayan qilghan bolsimu, sadiq qarimining kimliki heqqide melumat bérelmidi. Muxbirimizning éniqlishi dawamida, sadiq qarimining tuwaq baziridiki qazanchi meschitning imami ikenliki ashkarilandi.

Bu yil kirgendin buyan Uyghur rayonida dawam qiliwatqan siyasiy tutqunlarning hazirghiche ashkarilan'ghan tutulush sewebliridin melum bolushiche, xitay ilgiriki yillarda özliri qanunsiz dep qarighan bir heriket yaki sorun'gha qatnashqanlarni tutup we jazalap kelgen bolsa, bu yilqi tutqunda, atalmish qanunsiz yaki gumanliq dep qarighan kishi yaki orunlargha bilip yaki bilmey yéqin yolap qalghanlarmu tutqun qilin'ghan we jazalan'ghan. Esli peyziwatning 6-yézisidin bolghan we kéyin barin'gha köchüp kelgen we nöwette peyziwat nahiyilik atalmish terbiyelesh merkizide 3 aydin béri tutup turuluwatqan toxti hamutning qismiti, ene shu weziyetning bir misalidur.

Sékrétarning yuqiriqi bayanliridin, toxti hamutning dubeyni sayahet qilishining neri gumanliq yaki qanunsizliq ikenliki melum emes. Emma u, burun telim alghan sadiq qarimining esebiylikni teshwiq qilghuchi dep qaralghanliqi, yeni esebiylik gumandari ikenliki melum. Sékrétarning bayanliridin yene, toxti hamutning sadiq qarimgha yéqin yolap qalghinidin bashqa, uning atalmish esebiylikning tesirige uchrighanliqi heqqidimu melumat yoq. Toxti hamut yéqin yolighanliqi üchün 3 aydin béri tutup turuluwatqan iken, undaqta sadiq qarim kim? uning bügünki ehwali qeyerdin qeyergiche? biz bu so'allargha jawab tépish üchün qeshqerdiki saqchixanilargha téléfon qilduq.

Téléfon ziyaritimizdin, sadiq qarimining qeshqer tuwaq baziridiki qazanchi meschitining imami ikenliki aydinglashti. Emma, uning hazir nede, néme kün körüwatqanliqi melum emes.