Xitay hej ömiki terkibidiki Uyghur hajilar bésim we cheklimiler astida hej qilmaqta

2013-Yilliq musulmanlarning hej pa'aliyiti mekke-mukerrem we medine sheherliride jiddiy dawam qilmaqta. Halbuki, bu yilqi hej pa'aliyitige qatnishish üchün Uyghur élidin kelgen hajilar türlük siyasiy bésim we cheklimige uchrighanliqi melum.

Mekkidiki zhurnalist sirajidin ezizi ependining bildürüshiche, Uyghur élidin kelgen Uyghur hajilar qattiq nazaret astida bolup, ularning mekkini öz aldigha ziyaret qilishi, hetta kochida uchrighan bashqa Uyghurlargha salam qilishimu cheklen'gen.

Melum bolushiche, xitay da'iriliri Uyghur élidin kelgen hej qilghuchilargha xitay konsul xanisida mexsus terbiyilesh kursi échip, ulargha agahlandurush bergen.

Xitayning se'udi erebistanning jidde shehiridiki konsulxanisining tor békitidiki xewiride déyilishiche, 10-ayning 1-küni xitay konsulxanisining yéngidin wezipige teyinlen'gen bash konsuli enwer qatarliq xitay konsulxana xadimliri mekkige bérip xitay hej ömikidin hal sorighan we shinjang hej ömikining hajilarni terbiyilesh kursida söz qilghan.