Enqerede ötküzülgen xelq'araliq ramizan pa'aliyitige Uyghur ösmürlermu qatnashti

Musulmanlarning muqeddes ramizan éyi munasiwiti bilen 17-iyun küni türkiyening paytexti enqere shehiride ötküzülgen 8-nöwetlik xelq'araliq ramizan pa'aliyitige istanbuldin kelgen Uyghur ösmürler ishtirak qilip, Uyghur naxsha-usulliridin örnekler körsetken. Bulardin bashqa “Uyghur medeniyet öyi” namida mexsus bölüm échilip Uyghur medeniyet buyumliri tonushturuldi.

Ramzanning 22-künidiki pa'aliyetke türkiy milletlerdin qaraqalpaqlar bilen Uyghurlargha orun bérilgen bolup, kéchi'ögen rayonluq hökümet bashliqi mustafa aqning sahibxaniliqida ötküzülgen mezkur xelq'araliq pa'aliyetke türkiye parlamént ezaliridin murat alparslan, yüsüf salahiddin beylikbey, sabiq parlamént ezaliridin murat yildirim, sherqiy türkistan ma'arip we hemkarliq jem'iyiti ayallar komitéti mes'uli munewwer özuyghur xanim, qaraqalqaplar qurultiyi re'isi seyfullah türksoy we enqerediki Uyghurlar hem türk ammisidin bolup köp sanda kishi ishtirak qildi.

Hazir hakimiyet béshida turuwatqan adalet we tereqqiyat partiyesining mu'awin re'isi murat yildirim ependi, échilish murasimida qilghan nutqida, türkiyening her da'im bésim astida éziliwatqan mezlum milletlerge ige chiqidighanliqini, ularni qollap quwwetleydighanliqini tekitlidi.

Uyghur yash-ösmürlerni élip bérip bu pa'aliyetke ishtirak qilghan we “Uyghur medeniyet öyi” ni achqan munewwer özuyghur xanim échilish murasimida qilghan nutqida, sherqiy türkistan'gha bolghan séghinishining tügimeydighanliqini, özlirining türkiyede öz wetinide yashawatqandek hés qiliwatqanliqini, türk xelqining Uyghurlargha bolghan ghemxorluqigha rehmet éytidighanliqini tekitlidi.

Murat yildirim ependi échilish murasimida qilghan nutqida Uyghurlar toghrisida toxtilip mundaq dédi: “Türkiyening qanchilik muhim ikenlikini künsayin hés qiliwatimiz. Türkiye dunyadiki mezlum ézilgen xelqlerning ümidi bolushqa dawam qiliwatidu. Bizni bu yerde bir yerge jem qilghan rayonluq hökümet bashliqigha rehmet éytimen, aldimizda kéley dep qalghan rozi héytining türkiy milletlerge we dölitimizge xeyrlik bolushini tileymen”.

Türkiyening paytexti enqerediki kéchi'ören rayoni 8 yildin béri xelq'araliq ramzan medeniyet pa'aliyiti ötküzüp kelmekte. 10 Kün dawamlishidighan pa'aliyetke 10 dölettin sen'et ömiki teklip qilip qatnashturulmaqta. Bu yilqigha Uyghurlargha wakaliten sherqiy türkistan ma'arip we hemkarliq jem'iyiti ayallar komitéti mes'uli munewwer özuyghur xanim qatnashqan.

Munewwer özuyghur xanim 8-nöwetlik xelq'araliq ramzan pa'aliyitide Uyghur ösmürlerning sen'et nomurlirini körsetkenlikini, kichik mujahit qeshqerlining shé'ir déklamatsiye qilghanliqini, yaxshi bir pa'aliyet bolghanliqini bayan qildi.

8-Nöwetlik xelq'araliq ramzan pa'aliyitige qatnashqan Uyghur ziyaliysi rena qaraxan xanim bu qétimqi pa'aliyetning intayin yaxshi ötkenlikini bayan qildi.

Rena qaraxan xanim bu pa'aliyet Uyghurlarning peqetla zulum astida yashighan bir milletla emes, belki öz medeniyitini qoghdap qalghan bir millet ikenlikini türk jama'etchilikige anglitishta zor ehmiyetke ige ikenlikini bayan qildi.
7-Iyun künidin 17-iyun künigiche dawamlashqan 8-nöwetlik xelq'araliq ramzan pa'aliyitige ezerbeyjan, qazaqistan, özbékistan, türkmenistan, bosniye qatarliq 10 dölettin sen'et ömekliri qatnashqan. Bu pa'aliyetke Uyghurlar tunji qétim qatnashqan bolup, ularning sen'et nomurliri tamashibinlarning alqishigha érishken.