Gérmaniyediki Uyghurlar xitay konsolxanisi aldida iptar qilip xitaygha naraziliq bildürdi

Ramizan éyi boyiche bezi döletlerde bolghinidek gérmaniyening myunxén shehiridiki Uyghurlarmu xitay konsolxansi aldida iptar qilip, xitayning Uyghurlargha qaratqan diniy we bashqa basturush siyasetlirini eéyiblidi. D u q we yawrupa sherqiy türkistan birliki ortaqliship oyushturghan bu pa'aliyette Uyghurlar xitay hökümitini Uyghurlargha élip bériwatqan bésim siyasitini toxtitishqa chaqirdi.

7 - Ayning 24 - küni ötküzülgen bu pa'aliyetke teshkilat ezaliri we Uyghurlardin bolup 65 etrapida kishi qatnashti.

Kishiler iptar qilishqa yérim sa'et qalghanda, xitayning myunxéndiki konsolxanisi aldigha yighilip, qolida “Xitay Uyghurlarning roza tutushini chekligen”, “Xitayning sherqiy türkistandiki ishghali axirlashsun!”, “Uyghurlargha erkinlik”, “Xitay sherqiy türkistandin yoqal” dégendek sho'arlar yézilghan lozunkilarni we kökbayraqni kötürgen halda turushti.

Kéyin konsolxana aldigha chidir qurup, iptar tamiqi yep rozisini achti we du'a qilishti hemde xitayning Uyghurlargha élip bériwatqan zulum siyasitini eyiblidi.

Bu pa'aliyetni uyushturghan d u q ijra'iye komitéti mudiri dolqun eysa bilen yawrupa sherqiy türkistan birliki re'isi eniwer jan ependiler radi'omizgha bu heqte melumat berdi.