Uyghurlar istimalidiki quwwet doriliri halalmu?

Muxbirimiz gülchéhre
2016-03-11
Share
choshqa-konserwa-halal-keng.jpg "Halal yémeklik" markisi chaplan'ghan choshqa konsérwasi.
Social Media

Yéqinqi yillardin buyan Uyghur élide, Uyghur markiliridin bashqa chet'ellerning türlük markiliq yémek - ichmekliri we witamin türidiki quwwet doriliri, saghlamliq buyumlirining istimali alahide ashmaqta, Uyghurlar istimalidiki rengga - reng quwwet dorilar we saghlamliq buyumliri halalmu? bu heqte Uyghurlardin igiligen uchurlirimizdin bolupmu witamin türdiki kapsulluq dora we saghlamliq quwwet dorilirining halalliqida shübhe barliqi melum bolmaqta.

Melum bolushiche, her xil türdiki saghlamliq yémeklik we dorilarning terkibide, asasliq ozuqluq terkibliridin bashqa kem bolsa bolmaydighan yene bir xil matériyal bar, u bolsimu yémeklik xuruchliridin bir bolghan "Söngek yélimi" (骨胶gujyaw) din ibaret. Gerche söngek yélimining yémeklik terkibidiki miqdari köp bolmisimu, emma oynaydighan roli nahayiti chong bolup, adette pishshiqlap ishlesh jeryanida siliqlash,, turaqlashturush, qétishturush qatarliq nurghun halqilargha éhtiyajliq bolidiken.

Igilishimche, Uyghur élidimu kishilerning turmush sewiyisining ösüshi, saghlamliq bilimlirining yuqiri kötürülüshi bilen witamin'gha bolghan éhtiyajmu mas qedemde ashqan bolup, buning bilen hamilidar we bala émitiwatqan ayallar, ösüp yétilish basquchidiki balilar, alahide turmush we xizmet muhitidiki kishiler, késelliktin saqiyiwatqan kishilerning witamin we quwwet dorilirini istémal qilishimu omumlishishqa bashlighan.

Halbuki, bezi Uyghurlarning inkasigha qarighanda, yémekliklerning halal bolushigha alahide ehmiyet bérip kelgen Uyghurlar nöwette bazardiki quwwet we saghlamliq yémeklirining halalliq ölchimi boyiche ishlen'gen - ishlenmigenlikidin shübhilenmekte.

Emma yene beziler Uyghurlar ishligen yaki satqan nersiler bolghanliqi üchün "Musulman bolghandikin aldimaydighu ?!" depla ishinip mehsulatlarning ishlepchiqirish jeryanlirini sürüshte qilmaydiken.

Witamin bolsa organizmning normal hayatliq pa'aliyetlirini saqlashta zörür bulghan bir türlük organik birikme. Witamin dorilarning türi nahayiti köp bolup, ular beden saghlamliqini ashurushta intayin muhim rol oynaydu. Undaqta, Uyghurlar istémalidiki türlük witamin we bashqa saghlamliq mehsulatlirining hemmisila ishenchlik "Halal" midu?

Biz bu so'alni Uyghur élide saghlamliq quwwet doriliri we yémekliri sodisini asas qilghan bir shirketning diréktoridin sorap körduq, shirketning namini yoshurup qélish sherti bilen ziyaritimizni qobul qilghan bu shirketning diréktori, hetta özliri bazargha séliwatqan Uyghurche marka chaplan'ghan witaminlarningmu xuruchlirining pütünley halal ikenlikige ishench qilalmaydighanliqini éytti. Uning bundaq dep késip éytishidiki seweb, Uyghur élide yéshil yaki halal xam eshya qilin'ghan kapsul yasash téxnikisi bar birmu zawut yoq bolup, kapsulluq dora yaki witaminlarni ishlepchiqirishta yenila xitay ölkiliridiki zawutlargha tayinishqa mejbur iken.

Bu heqte ürümchidiki istémalchilar jem'iyitidin ziyaritimizni qobul qilghan xadimning jawabliri, Uyghurlarning witamin we quwwet dorilirining halalliqigha bolghan shübhisining asassiz emeslikini yenimu delillidi.

Bu xadimning chüshendürüshiche, witamin yaki dorilarni ishlepchiqirish jeryanida ishlitilidighan turaqlashturush we qétishturush roligha ige bolghan söngek yélimigha oxshash her xil xuruchlar eslidiki xam matériyalning xorishining ünümlük aldini alalaydu shundaqla mehsulat ünümini yuqiri kötürüp, ishlepchiqirish tennerxini töwenlitip, jem'iyetke mu'eyyen derijide iqtisadiy ünüm yaritip béridu.

Uning éytishiche yene, yémek ishlepchiqirishtiki bu muhim halqini emelge ashuridighan téxnika téxi Uyghur élide bolmighachqa, xitay ölkiliri we bashqa jaylarda ishlepchiqirilghan Uyghurlar istémalidiki quwwet doriliri, girim buyumliri yaki yémekliklerde musulmanche (halal) bolmighan terkiblerning qétilip qélishining aldini élishqa kapaletlik qilish tes. Gerche bu jehette shübhe bolsimu, istémalchilardin bashqa süpet tekshürüsh organlirimu mesilige sel qarap kelmekte iken.

Ilgiri bir qanche yil ilgiri linshyang sheherlik musulmanlar teshwiqat komitéti bésip tarqatqan "Musulmanlar istémaldiki haram yémeklikler" namliq maqale Uyghurche tor béketlerde keng taralghan idi.

Uningdimu yuqiriqi mesile üstide alahide toxtalghan bolup, aptor maqaliside, tyenjin shehiridiki musulman nurunji nechche yilliq japaliq tekshürüsh arqiliq érishken pakitlirigha asasen, hazirqi jem'iyette türlük yémekliklerning halal - haramliqi ayrilmay turupla bazargha tolup ketkenlikini qeyt qilip, musulmanlar semige istémal qilishta sel qarashqa bolmaydighan birinchi chong mesile, "Söngek yélimi" (骨胶gujyaw) dep körsetken.

Söngek yélimi bolsa herxil haywanlarning söngikidin we térisidin pishshiqlap ishlen'gen, yépishqaqliqi küchlük bolghan yélim.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet