Америкидики мусулманларниң 40 - нөвәтлик йиғилиши пәйғәмбәр муһәммәт әләйһиссаламниң һаятиға беғишланди

Мухбиримиз гүлчеһрә
2015-05-26
Share

Шималий америка ислам чәмбирикиниң 40 - нөвәтлик йиллиқ йиғилиши, пайтәхт вашингтонға қошна болған балтимор шәһиридә 23 - майдин 25 - майғичә 3 күн давамлашти. Шималий америка қитәсидики мусулманларниң әң бүйүк йиғилиши болған бу универисал паалийәт пәйғәмбәр муһәммәд әләйһиссаламниң һөрмитигә беғишланған болуп,америка, канада вә дуняниң башқа әллиридин 20 миңдин артуқ мусулманлар қатнашти.

140 Нәпәр тонулған ислам алимлири, ислам дунясидики өрнәк дәвәтчи шәйих, имамлар муһакимиләргә, қираәт мусабиқилиригә қатнашти. Паалийәт йәнә базар вә башқа көп хил мәзмунларда универисал байрам шәклидә өткүзүлди. Мусулманларниң бу бүйүк йиғилишиға иштирак қилған бәзи уйғурлар зияритимизни қобул қилип, өзлириниң бу әркин дөләттики диний әркинлик, мусулманлар бәһриман болуватқан имтиязлардин һаяҗанланғанлиқини вә шуниң билән бир вақитта коммунист хитай һакимийитиниң бастурушиға учраватқан уйғурларниң вәзийитини, диний қериндашларға аңлитишниң муһимлиқини һес қилғанлиқини билдүрүшти.

Америкида тәхминән 6 милйондин 8 милйонғичә мусулман яшайду, шималй америка қитәси ислам чәмбирики болса 1968 йилидин башлап америкидики мусулманлар җәмийәтлири вә иҗтимаий тәшкилатлар оттурисида алақини күчәйтип, мусулманларниң өз - ара иҗтимаий ярдәм вә диний маарип ишлири үчүн көврүклүк рол ойнап хизмәт қилип келиватқан иҗтимаий тәшкилатлар бирлики. Йәни қисқартилип ICNA дәп атилиду.

Icna Ниң 2015 - йиллиқ мусулманлар йиғилиши балтиморда қоюқ исламий кәйпиятта үч күн давам қилди. Бу аммиви йиғилиштики барлиқ паалийәт вә 200мәйдандин көпрәк муһакимиләр муһәммәд пәйғәмбәрниң һаятини өгиниш вә униң ислам динини һәқиқий тонуштики роли һәққидики һәдисләрни шәрһлиди, тәблих, вәз - нәсиһәтләрни асас қилди. 20Миң мусулман бирликтә намаз оқуди вәз нәсиһәтләргә иштирак қилди, шәхс яки достлар, аилиләр бойичә бирликтә, мусулман дунясиға тәвә түрлүк һалал йемәк - ичмәкләрдин ғизаланди. Паалийәт тәртиплик, мол мәзмунлуқ, әһмийәтлик, интайин иллиқ аиливи кәйпиятта давам қилди.

Мусулманларниң бу бүйүк йиғилишни мувәппәқийәтлик орунлаштурған ICNAниң америка қошма шитатлиридики дөләтлик мәсул әмири наим бәгни зиярәт қилдуқ. У соалимизға җаваб берип мундақ деди:

- Әссаламу әләйкум, мән нейимбәг, Icnaниң америкидики мәсул президенти болимән. Әлһәмдулилла бу 40 - нөвәтлик йиғилишимиз һесаблиниду. 20 Миңдин артуқ мусулман вә ислам диниға қиззиққучи қериндашлар иштирак қилди, 140 нәпәр ислам алим, өлималар 200 қетимдин көп мәхсус лексийә дәрслирини бәрди, бу, қериндашларға ислам өгиништики интайин кәң һәм қиммәтлик бир пурсәт. 400Дин артуқ дукан вә боткилар болған интайин чоң базар, йәрмәнкиләр ечилди вә һалал йимәк - ичмәк, яш, қери, балиларниң еһтияҗиға лайиқ лексийиләр орунлаштурдуқ, балиларға мәхсус вақитлиқ беқиш орни вә оюн мәйданлириниму орунлаштурдуқ, қериндашларниң мәниви вә башқа еһтияҗи үчүн бу 3 күн җәрянида имканийитимизниң йетишичә хизмәт қилишқа тиришиватимиз вә қолимиздин келишичә дуняниң һәр қайси җайлиридики мусулманлар учраватқан қийинчилиқларға ярдәмдә болушқа йол издәватимиз.

- Мусулманлар үчүн бу диний вә иҗтимаий йиғилишни орунлаштурушта һөкүмәт яки башқуруш даирилириниң бирәр тосқунлуқ яки чәклимигә учридиңларму ?

- Бу сиясәттин хали иҗтимаий аммиви бир йиғилиш, бизниң паалийәтлиримиз асасән ислам җәмийәтлири вә мусулман аммисиниң қоллиши билән боливатиду, дөләттин һечқандақ иқтисадий ярдәм алмаймиз. Бу әркин дөләттә һәр қандақ аммиви тәшкилат, диний тәшкилатларниң өз алдиға паалийәт елип беришигә имканийәтләр бар, шуңа һечқандақ тосқунлуққиму учрап бақмидуқ. Әмәлийәттә бизниң бу хил учришиш паалийәтлиримизниң мувәппәқийәтлик ечилишиға җайлардики органлар қилишқа тегишлик хизмәтлирини орунлап, қолайлиқ яритип кәлмәктә.

- Неим бәг әпәнди, өзиңиз вә ICNAниң уйғурлар учраватқан диний вә сиясий бесимлардин хәвири барму ?

- Әлвәттә бар, әлвәттә асаслиқи дуня ахбаратлиридин мәлум болған әһвалларни көздә тутиватимән. Хитай һөкүмитиниң уйғур мусулманларниң диний етиқад әркинликини чәкләп келиватқанлиқи һәммигә мәлум, алдимизда рамизан келиватиду, бу вақитта хитай һөкүмитиниң уйғур қериндашларға қарита бундақ чәклимә сияситини техиму күчәйтидиған пәйти, уларниң роза тутуши, намаз оқуши, һиҗаб тақиши дегәндәк һәр җәһәттә чәклимиләргә дучар болуватқанлиқи биздә әндишә қозғайду.

- Уйғурларғиму icna ниң паалийәтлиридә өзлириниң дәрдини аңлитиш имканийити барму ?

- Имканлар бар, иншаалла, америкидики мусулманлар әлвәттә уйғур мусулманларғиму ярдәмдә болушни халайду, уйғур қериндашларниң, уйғур җәмийәтлириниң биз билән алақә бағлишини, паалийәтлиримиздә програмлиримизға қатнишип уйғурларниң дәрдини аңшлитишини халаймиз. Биз өз - ара ярдәмдә болуш үчүн бу йәрдә биз. Һәтта һөкүмәтләргә қәдәр уйғур мусулманларниң учраватқан бесимлиридин әндишә қиливатқанлиқимизни аңлитиш имканлиримиз бар, уйғур мусулман қериндашлиримизниң паалийәтлиримизгә қатнишишини қизғин қарши алимиз.

Пәйғәмбәр әләйһиссалам мундақ дәйду: "бир адәмниң өзи билгән һәқиқәтни сөзлишигә, инсанларниң һәйвиси тосалғу болуп қалмисун."

Демәк яхшилиққа буйруп яманлиқтин тосушниң ваҗип әмәл қилип бекитилиши, мусулманларниң өз қарашлирини оттуриға қоюш әркинликидин бәһримән болушиниң зөрүр икәнликини билдүриду. Пикир әркинлики һәр бир мусулманниң һоқуқидур. Исламниң бу хил мәдәнийәтлири бу паалийәттә мукәммәл әксини тапти.

Муһакимиләргә тәклип қилинип вәз нәсиһәтләргә қатнашқан ислам алим өлималири "дин дегән аллаһ үчүн, аллаһниң китаби үчүн, аллаһниң пәйғәмбири үчүн, мусулманларниң имамлири, башлиқлири үчүн вә омумйүзлүк мусулманларниң мәнпәәти үчүн нәсиһәт қилиштур" дегән нуқтини асас қилди. Мушу темидики бир лексийини аңлап чиққан америкидики мәлум универиситетта өсмә кесәлликлири тәтқиқати елип бериватқан бир муслимә қиз зияритимизни қобул қилип, өзиниң бу хил йиғилишқа кичикидин қатнишип келиватқанлиқини әскәртип, өзидә әң һаяҗан қозғайдиғини, бири өлималарниң тәблиғлири болса, йәнә бири һәдсләрдә ейтилғандәк "аллаһ таалла пәрштиләрни мусулманлар йиғилған җайға "уммәтлирим немиләрни қиливатиду, немиләрни дейишиватиду " дәп әвәтидикән, бунчә көп мусулманлар йиғилған җайда иншаалла пәрштиләргә оринип туруптимиз дәп ойлаймән вә бу мени бәкму һаяҗанға салиду" деди.

20 Миң мусулман иштирак қилған бу бүйүк йиғилишта уйғур доппилири алаһидә диққитимизни татти, вашингтон вә униң әтрапида яшаватқан бир қисим уйғурларму америкидики мусулманлар топиниң бир қисми болуш сүпити билән аилиләр бойичә бу мурасимға қатнишиватқан икән. Америкидики муһаҗирәттики уйғурлардин әнвәр әпәнди вә билал әпәндиләр мусулманларниң бу бүйүк йилғилишидин алған тәсиратлирини ипадә қилди.

Мәзкур буюк йиллиқ йиғилишниң тәртип билән давам қилишиға миңға йеқин пидаий яшлар халс хизмәт қилған болуп, америка мусулманлириниң иҗтимаий һаятида муһим күн тәртипкә киргән ICNAниң йилда бир өткүзидиған бу универисал паалийити, маддий вә мәниви җәһәтләрдин пүтүнләй мусулман аммисиниң қоллиши, ярдими вә һәмкарлиқлири билән барғанчә техиму кәң көләмлик вә мувәппәқийәтлик өткүзүлүп давам қилип кәлмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт