Istanbulda Uyghur muhajirlarning jem bolushi bilen iptar ziyapiti ötküzüldi

Uyghur muhajirlar üchün bérilgen iptar ziyapitidin körünüsh. 2016-Yili 18-iyun, istanbul.

Ramizan éyi munasiwiti bilen 18-iyun shenbe küni istanbuldiki sherqiy türkistan ma'arip we hemkarliq jem'iyitining uyushturushi bilen zeytinburnu sheherlik hökümet qorusining meydanida Uyghur muhajirlar üchün iptar ziyapiti bérildi. Istanbulda yashawatqan Uyghurlardin er - ayal we ösmürler bolup 1000 gha yéqin kishi jem bolup birlikte iptar qildi.

Mubarek ramizan éyi munasiwiti bilen uyushturulghan iptar ziyapitige istanbulning sefaköy, zeytinburnu, aqsaray qatarliq her qaysi jayliridin er -ayal we ösmürler bolup 1000 gha yéqin kishi qatnashti.

Iptar orunlashturulghan meydanda ayallar bir terepte, erler bir terepte ayrim qoyulghan orunduqlarda olturdi.

Iptargha zeytinburnuning sabiq mu'awin sheher bashliqi shundaqla exmet yesewiy ilim we irpan wexpining re'isi ilyaz saka, xelq'ara türkistanliqlar hemkarliq jem'iyitining bash katipi doktor namaz normömin ependi, sherqiy türkistan wexipining idare hey'et mes'ulliridin abdujélil turan qatarliq shexslermu qatnashti.

Iptar qur'an kerim tilawet qilish bilen bashlandi. Seyfiddin isimlik Uyghur qariyning mungluq awazi bilen qur'an tilawet qilishi meydanni lerzige saldi. Kéyin sherqiy türkistan ma'arip we hemkarliq jem'iyitining re'isi hidayetullah oghuzxan söz qilip iptargha kelgenlerni qizghin qarshi aldi we mubarek ramizan éyining dostluq qérindashliq munasiwetlerning téximu küchiyishige wesile bolushigha tilekdashliq bildürdi.

Hidayetullah oghuzxan iptargha qatnashqan méhmanlargha xitab qilip mundaq dédi: “Eziz muhtirem qérindashlar!, bu yighilishimizning meqsiti, pütün muhajirettiki pütün derdmen, köngli sunuq muhajir qérindashlirimizning bir yerge jem bolup, bu ulugh ramizan éyining bizge qaldurup ketken telimati we yolyoruqi boyiche dostluq, barawerlik, qérindashlishish, yardemlishish, hemkarlishish rohini yükseltish üchün, shundaqla ghéripliqimizni yoqitish üchün, dertlishish üchün we uchrishish üchün we buningdin kéyinki hayatimizning maddiy we menwiy jehette qulayliq we asanchiliqqa érishishi üchün her biringlarni bu yerge topliduq.”

Hidayetullah oghuzxan sözide yene, ramizan éyi munasiwiti bilen jem bolghan méhmanlarning meniwi jehette qérindashliq, dostluq munasiwetlerning küchiyishi shundaqla yaxshi ishlarda ortaq hemkarlishish üchün qol tutushup, mürini - mürige tirep birlik we barawerlik ichide méngishqa tilekdashliq bildürdi.

Kéyin jama'et erbabi abdul'eziz ependi söz qilip xitay zulumi astida cheklime we tosuqlar astida roza tutuwatqan Uyghur musulmanlarning ramizan éyini tebriklesh bilen birge ularning roza -ramizan ibadetlirining qobul bolushi shundaqla du'alirining ijabet bolup zulumdin qutulushigha tilekdashliq bildürdi.

Abdul'eziz ependi sözide yene, Uyghurlarning diniy, milliy, medeniyet jehetlerde yoq bolup kétish xewpige duch kéliwatqanliqini, emma milliy mewjutluqni qoghdash üchün tedbir élish kéreklikini shundaqla Uyghurlarning mewjutluqini qoghdashta iman we islami étiqadta ching turush kéreklikini, islami kimlik we iman sho'ari astida üzimizning mewjudiyitini saqlap qélish üchün her qandaq bedel tüleshke teyyar turush kéreklikini ipadilidi.

Iptar qilishtin ilgiri méhmanlar birdek du'agha qol kötürüp Uyghur musulmanlarning azadliqi üchün du'a oquldi. Iptarda yene diniy alim ibrahim damollam söz qilip ramizan éyining ehmiyiti toghrisida toxtaldi. Iptar qilish jeryanida chimliq meydanda jama'et bolup sham namizi oquldi. Iptar ziyapitidin kéyin yighin ehli xushal halda öylirige qaytishti.

Biz bu iptar pa'aliyiti toghrisida pikir - qarashlirini élish üchün pa'aliyetke qatnashqan zeytiburnunining sabiq mu'awin re'isi ilyaz saka bilen söhbet élip barduq. Ilyaz saka ependi, sherqiy türksitanliq muhajir qérindashlar bilen bir yerge jem bolup iptar qilishning alahide ehmiyetke ige ikenlikini, her yili sherqiy türkistan ma'arip we hemkarliq jem'iyiti teripidin uyushturulghan bu ramizan iptar pa'aliyitige qatniship kéliwatqanliqini, bu yilqi iptarda muhajir hemsheherlerni körgendin kéyin qattiq xushal bolghanliqini, chünki bu yerdiki ösmürlerning köpinchisining sherqiy türksitanda tughulup andin bu yerge kelgen ösmürler ikenlikini, shuning üchün u ösmürlerge ige chiqish, ularning oqu - oqutush ishlirigha ehmiyet bérish, ularni intérnét we kompyutér oyunliridin uzaq tutup, saghlam chüshenche bilen telim élishigha köngül bölüsh kéreklikini, buning üchün barliq ata - anilarni bu heqte diqqet qilishqa chaqiriq qilidighanliqini ipadilidi.