Istanbuldiki iptar ziyapitide qérindashliq kücheytildi

1000 Din artuq kishi qatnashqan istanbuldiki iptar ziyapitide hidayetullah oghuzxan söz qilmaqta. 2015-Yili iyul, türkiye.

Ramizanning axiri künliride istanbuldiki Uyghurlar jem bolup birlikte iptar qildi, dostluq we qérindashliq munasiwetler kücheytildi. Sherqiy türkistan ma'arip we hemkarliq jem'iyitining uyushturushi bilen istanbulning zeytinburnu hökümet qorusining meydanida iptar ziyapiti bérildi. Ziyapetke istanbulda yashawatqan Uyghurlardin er-ayal kichik balilar bolup 1000 din artuq kishi qatnashti.

Iptar échishtin ilgiri qur'an kerim tilawet qilindi, kéyin sherqiy türkistan ma'arip we hemkarliq jem'iyitining re'isi hidayetullah oghuzxan qisqiche bir söz qildi. Hidayetullah oghuzxan sözide aldi bilen sorun'gha hazir bolghan er - ayal hemmeylenning roza ramizanini tebriklidi we hemmeylenning ramizanning pezilitidin toluq behrimen bolushqa tilekdashliq bildürdi.

Hidayetullah oghuzxan sözide yene, Uyghur diyarida bésim astida qalghan Uyghur xelqige du'a qilish shundaqla tayland xitaygha qayturup bergen 109 neper Uyghur qérindashlar üchün du'a qilishni tekitlidi.

Iptar waqti kélish bilen hemme birdek du'agha qol kötürüp Uyghur xelqining qiyinchiliqlardin qutulushi üchün du'a qildi shundaqla taylandtin xitaygha qayturulghan Uyghurlar üchünmu alahide du'a qilindi.

Méhmanlar birlikte iptar qildi we iptardin kéyin jama'et bolup namaz oquldi kéyin xushal keypiyat ichide öylirige qaytishti.

Biz bu iptar pa'aliyiti toghrisida téximu köp melumatqa érishish üchün sherqiy türkistan ma'arip we hemkarliq jem'iyitining ijtima'iy hemkarliq ishlar mes'uli kérem qarim bilen söhbet élip barduq.

Kérem qarim bu pa'aliyetni oyushturushtiki meqsetning ramzan ibaditini birlikte qilish, öz-ara qérindashliqni kücheytish we dost - qérindashlarni bir yerge jem bolup söhbetlishish, didarlishishtin ibaret ikenlikini bildürdi.