Istanbulda "Islam dunyasining qanighan yarisi sherqiy türkstan" dégen témida yighin échildi

Ixtiyariy muxbirimiz arslan
2014-11-06
Share
kanighan-yara-sherqiy-turkistan-yighin-islam.jpg Istanbuldiki "Islam dunyasining qanighan yarisi sherqiy türkstan" dégen témida yighindin bir körünüsh
RFA/Arslan


Istanbulda pa'aliyet qiliwatqan "Hamle genchlik jem'iyiti" teripidin "Islam dunyasining qanighan yarisi sherqiy türkistan" dégen témida bir yighin ötküzüldi.

2014 - Yili 2 - noyabir yekshenbe küni istanbulning ösküder yashlar merkizi yighin zalida ötküzülgen bu yighin'gha sherqiy türkistan wexipining sabiq bash katipi hamut köktürk, elixan törening oghli qutluqxan shakiruf teklip bilen qatnashti we yighinda Uyghurlar we sherqiy türkistan mesilisi toghrisida söz qildi.

Qur'an kerim tilawet qilish bilen bashlan'ghan bu yighinda istiqlal marshi oqulghandin kéyin "Hamle genchlik jem'iyiti"ning re'isi ekrem kubulay qaradéngiz échilish nutiqi sözlidi. U mundaq dédi: "Sherqiy türkistan islam dunyasining eng muhim bir diyari we ümmetning eng muhim mesililiridin biri. Sherqiy türkistan mesilisi epsuslinarliq bilen tashlap qoyuldi. Bu bolsa bizning chong bir kemchilikimiz dep qaraymen.Türkiyidiki musulmanlar bolush süpitimiz bilen islam dunyasining eng ajiz we mezlum xelqi bolghan musulman Uyghur qérindashlirimizgha ige chiqishimiz kérek."

Yighinda yene 23 - féwral yashlar herikitining bayanatchisi serdar fikret qilich ependi söz qilip mundaq dédi: "Epsuslinarliq bilen sherqiy türkistan dawamliq tashlinip qaldi. Xususen islamiy ammiwi teshkilatlarning bu mesilisige yéterlik derijide köngül bölelmigenlikimizni qayghu ichide ipadileymen. Ghezze, pelestin we bashqa mezlum xelqlerge ehmiyet bergen'ge oxshash sherqiy türkistanliq qérindashlirimizgha ehmiyet bérelmiduq. Bu heqiqeten azablaydighan bir weziyet. Emma buningdin kéyin bu mesilige her zaman küntertipke keltürüp sherqiy türkistan mesilisige sel qarashtin ibaret kemchilliklirimizni tüzitishimiz kérek."

Kéyin bir yash yigit sehnige chiqip sherqiy türkistan üchün yézilghan bir shé'irni oqudi we qisqiche bir höjjetlik filim körsitildi.

Yighin'gha teklip bilen qatnashqan qutluqxan shakiruf ependi, 1944 - yili qurulghan sherqiy türkistan jumhuriyitining re'isi bolghan dadisi elixan töre toghrisida söz qildi we sherqiy türkistanning türkistan jughrapiyiside tarixtin buyan dawam qilip kéliwatqan, siyasiy, tarixiy we medeniyet jehettiki ehmiyiti toghrisida toxtaldi.

Yighinda yene sherqiy türkistan wexpining sabiq bash katipi hamut köktürk ependi söz qilip, sherqiy türkistan tarixi we Uyghurlarning hazirqi ehwali toghrisida muhim söz qildi.

Biz bu yighin toghrisida téximu köp melumatqa ige bolush üchün hamut köktürk ependi bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet