Уйғур диний алимлири ғәйрәт салйефниң мақалисигә рәддийә бәрди

Уйғур аптоном районлуқ партком тәшвиқат бөлүми ташқи тәшвиқат ишлар муавин мудири ғәйрәт салйеф уйғурларниң очуқ йоруқ, әпучан вә илғар мәдәнийәтни қобул қилидиған есил әхлақи пәзилитигә варислиқ қилайли дегән темида бир мақалә елан қилған болуп, бу мақалидә уйғурлардин сақал-бурут қойғанларни вә йүзини япқан яки исламий кийим кийгән аялларни тәнқид қилған. Сақал-бурут қоюш вә йүзини йепиш тоғрисида қуран кәримидә айәт йоқлуқини оттуриға қойған.

Ғәйрәт салйеф мақалисидә йәнә аялларниң йүзини йепиш, исламий кийим кийишини вә әрләрниң сақал-бурут қоюшини қалақлиқ дәп ипадилигән. Бу мақалә чәтәлләрдә яшаватқан қаттиқ тәнқидигә учриди. У, миллий мунапиқ вә диндин чиққан муртәд дәп һөкүм қилинди.

Истанбулда яшаватқан дини алим абдулһәкимхан мәхсум вә пешқәдәм вәтәнпәрвәр затлардин абдуләзиз әпәнди ғәйрәт салйефниң бу мақалисигә рәддийә бәрди.

Абдулһәкимхан мәхсум бу мақалини язғучи ғәйрәт салйеф ислам дининиң асасий принсиплирини инкар қилиш биләнла чәклинип қалмай, қаттиқ һақарәт қилғанлиқи үчүн диндин чиққан муртәд дәп һөкүм чиқирилидиғанлиқини ипадилиди вә исламниң асасий принсплиридин һәр қандақ бир принсипни инкар қилған киши диндин чиққан муртәд болидиғанлиқини ипадилиди.

Ғәйрәт салйеф мақалисидә йәнә, йеқиндин буян уйғур диярида йүз бериватқан қанлиқ вәқәләрниң келип чиқишини, вәзийәт муқимлиқиға тәсир йәткүзди, хәлқниң турмушиға қалаймиқанчилиқ елип кәлди дәп язған вә бу вәқәләрниң һәммисини диний әсәбий күчләрниң қутратқулуқ қилиши вә тәшкиллиши билән йүз бәргәнликини дава қилған.

Пешқәдәм вәтәнпәрвәр затлардин абдуләзиз әпәнди бу һәқтә тохтилип ғәйрәт салйефқа рәддийә бәрди вә уни миллий мунапиқ дәп баһа бәрди вә хитайни хош қилиш үчүн мушундақ қиливатқанлиқини, әмма хитай һечқачан хош болмайдиғанлиқини ипадилиди вә униң бу мақалә арқилиқ уйғурларни хитайға қул болушқа тәшәббус қиливатқанлиқини билдүрди.

Абдуләзиз әпәнди, уйғурларниң гүзәл-әхлақ өлчимини хитай уйғурларниң аҗизлиқи дәп қарап кәлгәнликини ипадилиди.

Игилинишичә уйғур аптоном районлуқ партком тәшвиқат бөлүми ташқи тәшвиқат ишлар муавин мудири ғәйрәт салийеф чәтәлләргә көп қетим берип келидиған шәхс болуп, 2003-йили хизмәт билән сәуди әрәбистанниң мәккә шәһиригә барған вә у йәрдики уйғурларни мәхпий рәсимгә тартиватқанда сәуди әрәбистанниң сақчилири келип униң рәсим аппаратини мусадирә қилған.

Ғәйрәт салийеф телевизийә программисида, 2010-йили йәнә сәуди әрәбистанниң мәккә шәһиригә хизмәт мунасивити билән барғанлиқини сөзләп өткән, әмма қайси хил хизмәт билән барғанлиқини ейтмиған.