Норвегийәдики уйғурлар : тунҗи қетим өзимиз қурған мәсчиттә һейт намизи оқудуқ

8 - Аувғуст пәйшәнбә күни мубарәк рамизан ейиниң ахирлашқан күни болуп, норвегийәниң пайтәхти осло вә осло әтрапидики уйғурлар чирайлиқ кийимләрни кийишип, әрләр оғуллирини,аяллар қизлирини әгәштүрүп, осло шәһәр мәркизидики уйғур мәсчитигә рози һейит намизи оқуш үчүн җәм болди.

Намаз оқулуштин бурун, уйғур мәсчитиниң имами турғунҗан қарим рамизан ейиниң хасийити һәққидә тәблиғ қилди. Андин рамизан ейида берилидиған закат вә сәдиқә питрә тоғрилиқ чүшәнчә бәрди. Шундин кейин закат вә сәдиқә питрә пули йиғилди.

Йәрлик вақит 09:30 да башланған намаз оқулуп болғандин кейин, һейит намизи турғунҗан қаримниң вәтән, милләтниң хитай зулмидин қутулуп һөрлүккә чиқишиға болған тиләк - илтиҗалири һәмдә вәтән, милләт йолида җан бәргән вә бәдәл төлигән шеһит - қәһриманлириға атап оқулған тәсирлик дуалар билән ахирлашти.

Биз ослода уйғур мәсчити ечилғандин кейинки тунҗи қетимлиқ рамизан ейи вә рози һейт намизиниң қандақ яхши өткүзүлгәнлики һәққидики тәсиратиға ортақлишиш үчүн мәсчит имами турғунҗан қаримни зиярәт қилдуқ. Турғунҗан қарим сөзини “аллаһниң һиммити билән, биз тунҗи қетим өзимиз қурған мәсчиттә һейт намизи оқудуқ” дәп давамлаштурди.

Намаздин кейин җамаәт бир - бириниң һейитини тәбрикләшти вә мәсчит идарә һәйити һазирлиған һейитлиқ дастиханға дахил болди.