Барак обама балтимордики мәсчитни зиярәт қилип, мусулманларниң америкиниң бир парчиси икәнликини тәкитлиди

Америка президенти барак обама 3 - феврал күни америкиниң балтимор шәһиридики мәсчитни зиярәт қилди. Барак обама 47 йиллиқ тарихқа игә мәсчиттә сөз қилип, америкиниң һәммә милләт, һәммә дин ортақ мәвҗут болуп туридиған җайлиқини тәкитлиди. У мусулманларниң америка дөлитиниң муһим бир парчиси икәнликини тәкитләп “америка президенти болуш сүпитим билән шуни кесип ейтимәнки, силәр бу йәргә тәвә. Силәр америкиниң бир парчиси. Силәр һәм америкилиқ һәм мусулман” деди. У мусулманларниң америка дөлитиниң һәр саһәсидә рол еливатқанлиқини тәкитләп, уларниң америкиниң қурулуш вә тәрәққиятиға бүгүнгичә қошуп кәлгән төһпилиригә миннәтдарлиқини билдүрди.

Барак обама сөзидә йәнә, йеқиндин буян америкида мусулманларға қарита баш көтүрүватқан бәзи хата көз қарашларни, шундақла доналд трумпқа охшаш бир қисим җумһурийәтчи партийә әзалириниң сайлам риқабити җәрянида мусулманлар һәққидә қиливатқан сәлбий сөзлирини тәнқид қилди вә “биз бундақ мутәәссипликләргә қарап турсақ болмайду. Биз америкиниң һәрқандақ бир етиқадни қоғдайдиғанлиқини көрситишимиз керәк. Биз америкини террорлуқтин қоғдаймиз, дәп террор тәшкилатлириниң идийәлири вә сәпсәтилирини мустәһкәмләп бәрсәк болмайду” деди.

У шундақла йәнә, дуня миқясида йүз бәргән террорлуқ вәқәлиридин кейин дуняда мусулманларни нишан қилған бәзи өч елиш характерлик һәрикәтләр болғанлиқини, җүмлидин буниң америка ичидиму йүз бәргәнликини, әмма буниң интайин хаталиқини әскәртти вә “бу, америкиға, америкилиқларға яришидиған һәрикәтләр әмәс” деди вә америка дөлитиниң барлиқ әзалирини мәйли у қайси милләт вә қайси диндин болушидин қәтийнәзәр өз - ара кәң қорсақ болушқа, бирлишишкә чақирди.

С н н ниң хәвәр қилишичә, америка президенти барак обама буниңдин илгири башқа әлләрдики мәсчитләрни зиярәт қилған, бирақ бу униң тунҗи қетим америка ичидики бир мәсчитни зиярәт қилиши болуп һесаблинидикән. Америка мусулман адвокатлар җәмийтиниң башлиқи фәрһанә хера с н н гә қилған сөзидә, барак обаманиң зияритиниң интайин вақтида қилинған зиярәт болғанлиқини билдүргән. У буни чүшәндүрүп “обаманиң зиярити мусулманларниң америка қурулғандин буян бу дөләтниң бир парчиси болуп кәлгәнликини кишиләрниң сәмигә салиду” деди.

Мәлум болушичә, обама балтимор шәһиридики мәсчит зиярити давамида 12 нәпәр мусулман лидири биләнму айрим сөһбәт өткүзгән. Улар оқуғучилар, паалийәтчиләр, қуран тәтқиқатчилири вә дохтор қатарлиқларни өз ичигә алидикән.