Barak obama baltimordiki meschitni ziyaret qilip, musulmanlarning amérikining bir parchisi ikenlikini tekitlidi

Muxbirimiz irade
2016-02-03
Share
baltimore-mesjid.jpg Amérika prézidénti barak obama ziyaret amérikining baltimor shehiridiki meschit
alrahma.org

Amérika prézidénti barak obama 3 - féwral küni amérikining baltimor shehiridiki meschitni ziyaret qildi. Barak obama 47 yilliq tarixqa ige meschitte söz qilip, amérikining hemme millet, hemme din ortaq mewjut bolup turidighan jayliqini tekitlidi. U musulmanlarning amérika dölitining muhim bir parchisi ikenlikini tekitlep "Amérika prézidénti bolush süpitim bilen shuni késip éytimenki, siler bu yerge tewe. Siler amérikining bir parchisi. Siler hem amérikiliq hem musulman" dédi. U musulmanlarning amérika dölitining her saheside rol éliwatqanliqini tekitlep, ularning amérikining qurulush we tereqqiyatigha bügün'giche qoshup kelgen töhpilirige minnetdarliqini bildürdi.

Barak obama sözide yene, yéqindin buyan amérikida musulmanlargha qarita bash kötürüwatqan bezi xata köz qarashlarni, shundaqla donald trumpqa oxshash bir qisim jumhuriyetchi partiye ezalirining saylam riqabiti jeryanida musulmanlar heqqide qiliwatqan selbiy sözlirini tenqid qildi we "Biz bundaq mute'essipliklerge qarap tursaq bolmaydu. Biz amérikining herqandaq bir étiqadni qoghdaydighanliqini körsitishimiz kérek. Biz amérikini térrorluqtin qoghdaymiz, dep térror teshkilatlirining idiyeliri we sepsetilirini mustehkemlep bersek bolmaydu" dédi.

U shundaqla yene, dunya miqyasida yüz bergen térrorluq weqeliridin kéyin dunyada musulmanlarni nishan qilghan bezi öch élish xaraktérlik heriketler bolghanliqini, jümlidin buning amérika ichidimu yüz bergenlikini, emma buning intayin xataliqini eskertti we "Bu, amérikigha, amérikiliqlargha yarishidighan heriketler emes" dédi we amérika dölitining barliq ezalirini meyli u qaysi millet we qaysi dindin bolushidin qet'iynezer öz - ara keng qorsaq bolushqa, birlishishke chaqirdi.

S n n ning xewer qilishiche, amérika prézidénti barak obama buningdin ilgiri bashqa ellerdiki meschitlerni ziyaret qilghan, biraq bu uning tunji qétim amérika ichidiki bir meschitni ziyaret qilishi bolup hésablinidiken. Amérika musulman adwokatlar jem'iytining bashliqi ferhane xéra s n n ge qilghan sözide, barak obamaning ziyaritining intayin waqtida qilin'ghan ziyaret bolghanliqini bildürgen. U buni chüshendürüp "Obamaning ziyariti musulmanlarning amérika qurulghandin buyan bu döletning bir parchisi bolup kelgenlikini kishilerning semige salidu" dédi.

Melum bolushiche, obama baltimor shehiridiki meschit ziyariti dawamida 12 neper musulman lidiri bilenmu ayrim söhbet ötküzgen. Ular oqughuchilar, pa'aliyetchiler, qur'an tetqiqatchiliri we doxtor qatarliqlarni öz ichige alidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet