Peyghemberge qarshi hejwiy filim ishligen adem musulman boldi

Gollandiyelik parlamént ezasi “Andorofan” isimlik bir shexs mundin bir yérim yil burun islam peyghembiri muhemmed eleyhissalamni haqaretlep hejwiy filim ishligen, andin yene shundaq bir filim ishlesh üchün diniy matériyallarni körüsh jeryanida 3 ay burun musulman bolghanliqini élan qildi.

Andorofan isimlik bu shexsning musulman bolghanliq qissisi heqqide köprek melumat élish üchün se'udi erebistan radi'osi türk bölümining mudiri ustaz abdul'ehed hapiz hajimgha muraji'et qilghan iduq. Töwende, abdul'ehed hajim bilen élip barghan söhbitimizni diqqitinglargha sunimiz.

Abdul'ehed hajim bilen söhbet

Abdul ehed hajim mundaq dédi:“Islam ölimalirining tekitlishiche, musulmanlar eger özining dinigha sadiq bolup, bu dinning ewzellik tereplirini emeliyitide körsiteleydighan bolsa, dunyada nurghun kishilerning silamgha toghra baha béridighan halgha kélishide we nurghunlirining musulman bolushida shek yoq iken. Démek, bu mesilidiki yétersizlik musulmanlarda iken. Chünki bu dinning ehli bolghan musulmanlar uni bashqilargha yaxshi tonushturalighandila, andin bashqilar uni tonuydiken we ewzellikini bilidiken. Ilim - pen tereqqiy qilghan we saheliri köpeygenséri ilahiy heqiqetler otturigha chiqishi seweblik iman éytqan bilim ademlirimu dunyada köp iken.

Se'udi erebistanida chiqidighan gézitlerning xewirige asaslan'ghanda, gollandiyelik parlamént ezasi “Andorofan” isimlik shexs islam dinigha we musulmanlargha öchmenliki bilen tonulghan we muhemmed eleyhissalamni haqaretlep hejwiy filim ishligen adem bolup, yene shundaq bir hejwiy filim ishlesh üchün matériyal izdesh jeryanida islam dini bilen yéqindin tonushup, uning ewzellikige qayil bolghan we özining musulman bolghanliqi élan qilghan. Shundaqla ilgiriki din'gha qarshi qilmishlirigha qattiq pushayman qilip, mundin kéyinki ömrini allahning dinigha xizmet qilish bilen ötküzidighanliqini jakarlighan.

Gézitlerde xewer qilinishiche, andorofan mundin 3 ay ilgiri musulman bolghan we 2013 - yil 4 - ay 18 - küni medine munewwer shehirige kelgen, andin mekkige bérip ömre ibaditini ada qilghan. Andorofan se'udi erebistanigha kélish munasiwiti bilen se'udi erebistanidiki katta ölimalar bilen uchrashqan. Se'udi erebistan muftisining alahide qobul qilishigha érishken we mufti bilen söhbetleshken shundaqla uningdin islam heqqide telimatlarni alghan.”

Andorofanning musulman bolush sewebi

Se'udi erebistanida chiqidighan gézitlerde yézilishiche, andorofan özining musulman bolush sewebini bayan qilip mundaq dégen: “Men islamgha we uning peyghembirige qarshi yene bir hejwiy filim ishlesh üchün izdinip matériyal körüsh jeryanida nöwettiki teshwiqat qorallirining méning idiyemni qanchilik bormilighanliqini bildim, men 48 yil islamni bilmey ötken hayatimgha bek ükünimen, men nöwette xizmitimdin istipa berdim, qalghan hayatimni islamni öginish we uninggha xizmet qilish üchün atidim. Chünki men izdewatqan asayishliq bilen xatirjemlikni islamdin taptim. Kashki mundin burun musulman bolghan bolsam néme dégen yaxshi bolar idi. Shundaqtimu men qalghan ömrümni islamgha atidim.”

Andorofan yene mundaq dégen:“Nawada biz musulmanlar islam dinini pütün ish - heriket we ijtima'iy alaqimizda eynen eks ettürüp bérelisek, aldi bilen dunyadiki bezi teshwiqat wasitilirining islamgha qarshi tetür teshwiqatlirigha eng küchlük reddiye bergen bolimiz. Andin bashqilarning diqqitini islamgha tartalisaq, shu seweblik gheplettiki insanlar islam heqqide az tola izdinip qalsa, biz yashawatqan bu dunya bashqiche bir dunyagha aylinishigha ishenchim kamil. Qéni qérindashlirim, biz hemmimiz öz nöwitide emeliyitimiz bilen qur'anche musulman bolayli, biz hazirghiche islamdin pexirlinip kelduq, emdi islamning biz bilen pexirlinidighan waqti yétip keldi, biz emdi özimizni ispatlayli!”