Qazaqistanda hijab kiyish mesilisi yene talash - tartish qozghimaqta

Qazaqistanda hijab kiygenlerge nisbeten ikki xil köz qarashning shekillen'genliki heqqide ammiwi axbarat wasitiliride maqaliler élan qilinmaqta. Hazir qazaqistan musulmanlirining diniy bashqarmisi we memliketning bilim we pen ministirliqi otturisida ene shundaq ehwal mewjut.

“Séntir asiya” da élan qilin'ghan gülmira metxaliqowaning “Yaghliq shiltidi. Qazaqistanda alahide bir ehwal shekillinip, mektep we aliy oqush orunlirining oqughuchiliri hijabni yéshishtin qet'iy bash tartmaqta” dégen maqaliside diniy bashqarmining bash muptisi érjan haji malghaji oghli élan qilghan petiwaning diqqettin sirt qalghanliqini tekitligen. Aptorning éytishiche, hijab kiyishni qoghdaydighan bu petiwa noruz bayrimi waqtida élan qilin'ghanliqtin uninggha köpchilik étibar bermigen. Petiwada derske kirgen her qandaq bir kishige yaghliq yaki bashqimu bash kiyim kiyishni meniy qilishning qanuniy diniy pa'aliyetni chekligenlik, shexsiylerning grazhdanliq hoquqlirini buzghanliq bolup hésablinidighanliqi tekitlen'gen. Bilim idarisining wekili janil jontayéwa buninggha jawap bérip, “Bilim toghriliq qanun” telepliri boyiche oqughuchilarning belgilimide bekitilgen mektep kiyimini saqlash kéreklikini éytqan.

Qazaqistan musulmanlirining diniy bashqarmisi merkiziy meschitining mexsus “Ezen kz” tor béti arqiliq musulmanlarning yaghliq téngish hoquqini chüshendürüp, buning memliket qanunlirigha mas kélidighanliqini körsetken. “Tén'grinyus agéntliqi” bu heqqide maqale élan qilip, uningda köpligen teshkilatlarning ötünishige béna'en mezkur petiwaning élan qilin'ghanliqi éytilghan. Uningda musulman ayal kishilerning kiyim kiyish qa'idiliri chüshendürülgen. Diniy bashqarma sheri'etke muwapiq kélidighan niqabsiz kiyim kiyishni toghra dep tépip, ereb, pakistan istilidiki kiyimni tekrarlashning shert emeslikini eskertken, eng aldi bilen ewretlirini yapidighan en'eniwiy kiyimlerni kiyish mumkinlikini tekitligen. Uningda shundaqla yaghliq téngish hoquqining heqiqetenmu shexsiylerning din'gha bolghan munasiwitini körsitidighan grazhdanliq hoquqi ikenliki éytilghan. Shu munasiwet bilen qazaqistan musulmanlirining diniy bashqarmisi ishxanilar we oqush orunliri rehberliri teripidin körsitiliwatqan mundaq cheklimilerni qanunsiz dep hésablidi.

Radi'omiz ziyaritini qobul qilghan almata shehiri turghunliri péshqedem ustaz memliket alimowa we asiyem turdiyéwa bu heqte öz qarashlirini otturigha qoydi.